ഗൾഫിന് വേണ്ടി എംഎ യൂസഫലിയുടെ മാസ്റ്റർ പ്ലാൻ, ടൺ കണക്കിന് ചരക്കുമായി കേരളത്തിൽ നിന്ന് പറന്ന് വിമാനങ്ങൾ

പ്രമുഖ മലയാളി വ്യവസായിയും ലുലു ഗ്രൂപ്പ് ചെയർമാനുമായ എംഎ യൂസഫലിക്ക് ഗൾഫ് മറ്റൊരു ജന്മനാട് പോലെയാണ്. അതുകൊണ്ട് തന്നെ പശ്ചിമേഷ്യയിൽ യുദ്ധം മുറുകുമ്പോൾ ഗൾഫിന് ഭക്ഷ്യസുരക്ഷ ഉറപ്പാക്കുകയാണ് അദ്ദേഹം. അതിനായി ലുലു ഗ്രൂപ്പിന്റെ ചാർട്ടേഡ് കാർഗോ സർവീസുകൾ സജീവമായി രംഗത്തുണ്ട്. ഇന്നലെ രാത്രിയോടെ കൊച്ചി നെടുമ്പാശ്ശേരി വിമാനത്താവളത്തിലെത്തിയ കുവൈത്ത് എയർവേയ്‌സ് കാർഗോ വിമാനം 36 ടൺ പഴം-പച്ചക്കറികളുമായി ഇന്ന് രാവിലെ 10:45-ന് മടങ്ങി. ഇതിനു മുൻപ്, അബുദാബിയിലേക്ക് ഇത്തിഹാദ് എയർവേയ്‌സ് 80 ടൺ ഭക്ഷ്യോത്പന്നങ്ങൾ പ്രത്യേക കാർഗോ വിമാനത്തിൽ എത്തിച്ചിരുന്നു.

ലുലു ഹൈപ്പർമാർക്കറ്റുകളിൽ ഭക്ഷ്യവസ്തുക്കളുടെ ലഭ്യതയും വിലസ്ഥിരതയും ഉറപ്പാക്കുകയാണ് ലുലു മാനേജ്‌മെന്റും എം.എ. യൂസഫലിയും ലക്ഷ്യമിടുന്നത്. അബുദാബി ഉൾപ്പെടെയുള്ള ജി.സി.സി. രാജ്യങ്ങളിലെ ലുലു ഹൈപ്പർമാർക്കറ്റുകളിലേക്ക് ഭക്ഷ്യോത്പന്നങ്ങൾ സുസ്ഥിരമായി എത്തിക്കാൻ ഈ നീക്കങ്ങൾ സഹായകമാകും.

ചാർട്ടേഡ് വിമാനങ്ങൾക്ക് പുറമെ, ലുലു ഫെയർ എക്സ്പോർട്ട് വഴി പ്രതിദിനം 5 മുതൽ 6 ടൺ വരെ ഭക്ഷ്യോത്പന്നങ്ങൾ പതിവ് യാത്രാവിമാനങ്ങളിൽ ഗൾഫിലേക്ക് കയറ്റി അയക്കുന്നു. ഇത്തിഹാദ് എയർ, എയർ അറേബ്യ, സൗദി എയർ, ഫ്ലൈ എമിറേറ്റ്സ്, ഒമാൻ എയർ, എയർ ഇന്ത്യ തുടങ്ങിയ എയർലൈനുകൾ ഈ സേവനം ഉപയോഗിക്കുന്നു.

പ്രാദേശിക കാർഷിക വിപണിക്ക് ഊർജ്ജം പകരുന്ന ഈ സംരംഭം, വരും ദിവസങ്ങളിലും കേരളത്തിൽ നിന്ന് കൂടുതൽ കാർഗോ വിമാന സർവീസുകൾ തുടരാൻ ലുലു ഗ്രൂപ്പ് തീരുമാനിച്ചു. ഡൽഹി, ബംഗളൂരു, മുംബൈ എന്നിവിടങ്ങളിൽ നിന്നും പ്രത്യേക വിമാനങ്ങളിൽ ഇവർ ഗൾഫ് മേഖലയിലേക്ക് ഭക്ഷ്യോത്പന്നങ്ങൾ കയറ്റുമതി നടത്തുന്നുണ്ട്.

പശ്ചിമേഷ്യൻ സംഘർഷം കാരണം കേരളത്തിലെ കയറ്റുമതി മേഖല കോടികളുടെ നഷ്ടം നേരിട്ടപ്പോൾ, ലുലു ഗ്രൂപ്പ് ചെയർമാൻ എം.എ. യൂസഫലി അടിയന്തരമായി വിഷയത്തിൽ ഇടപെട്ട് സർക്കാർ സംവിധാനങ്ങളുമായി ചർച്ച നടത്തി. മേഖലയിലെ പ്രതിസന്ധിക്ക് അദ്ദേഹം വലിയ പരിഹാരം കണ്ടെത്തുകയും കൂടുതൽ സർവീസുകളിലൂടെ ഗൾഫ് മേഖലയിൽ ഭക്ഷ്യസുരക്ഷ ഉറപ്പാക്കുമെന്ന് ഉറപ്പുനൽകുകയും ചെയ്തു.

ലുലു ഗ്രൂപ്പിന്റെ ഈ നടപടി കേരളത്തിലെ കയറ്റുമതിക്കാർക്കും, വ്യാപാര സംരംഭങ്ങൾക്കും, തൊഴിലാളികൾക്കും പുതിയ അവസരങ്ങൾ വർദ്ധിപ്പിക്കാൻ സഹായകമാകുമെന്ന് വിലയിരുത്തപ്പെടുന്നു. ഇത് സംസ്ഥാനത്തിന്റെ സാമ്പത്തിക മേഖലയ്ക്ക് കാര്യമായ ഉണർവ് നൽകും.