ഇന്ത്യയല്ല... യുഎഇയിലേക്കുള്ള മാമ്പഴ കയറ്റുമതിയില് മുന്നില് പാകിസ്ഥാന്; കാരണമിത്
വേനല്ക്കാലത്ത് എല്ലാവരുടേയും ഇഷ്ടപ്പെട്ട പഴങ്ങളിലൊന്നാണ് മാമ്പഴം. ജലാംശവും പോഷകങ്ങളും ഏറെയുള്ള മാമ്പഴം പഴങ്ങളുടെ രാജാവ് എന്നാണ് അറിയപ്പെടുന്നത്. വേനല്ച്ചൂട് ആരംഭിക്കുമ്പോള്, യുഎഇയിലുടനീളമുള്ള നിവാസികള് മാമ്പഴം വാങ്ങാനായി തിരക്ക് കൂട്ടാറുണ്ട്. ലോകമെമ്പാടുമുള്ള വിവിധ രാജ്യങ്ങളില് നിന്നുള്ള മാമ്പഴങ്ങള് ഇവിടെ ലഭ്യമാണെങ്കിലും പാകിസ്ഥാനില് നിന്നുള്ള മാമ്പഴങ്ങള്ക്കാണ് ഇവിടെ ഡിമാന്ഡ്.
എന്തുകൊണ്ടാണ് പാകിസ്ഥാനി പഴങ്ങള്ക്ക് ഇത്രയേറെ ഡിമാന്ഡ് ഉണ്ടാകുന്നത് എന്ന് അറിയാമോ? പാകിസ്ഥാന്റെ ദേശീയ ഫലമായതിനാല്, വളരെ ശ്രദ്ധയോടെയും ജാഗ്രതയോടെയുമാണ് മാമ്പഴം വളര്ത്തുന്നത്. സിന്ധ്, പഞ്ചാബ് പ്രവിശ്യകളിലാണ് ഇവ പ്രധാനമായും കൃഷി ചെയ്യുന്നത്. അതേസമയം ഖൈബര് പഖ്തൂണ്ഖ്വയിലും ചില ചെറുകിട കൃഷികള് നടക്കുന്നു. കാലാവസ്ഥാ വ്യതിയാനങ്ങള് കാരണം സിന്ധില് അല്പം ചൂടുള്ള കാലാവസ്ഥയാണ് അനുഭവപ്പെടുന്നത്.
ഇത് മറ്റ് പ്രദേശങ്ങളെ അപേക്ഷിച്ച് നേരത്തെ വിളവെടുപ്പ് നടത്താന് കാരണമാകുന്നു. അതിനാല്, എല്ലാ സീസണിലും ആദ്യ ബാച്ച് മാമ്പഴം സിന്ധില് നിന്നാണ് വരുന്നത്. അതേസമയം പഞ്ചാബില് വളര്ത്തുന്ന മാമ്പഴം പലപ്പോഴും ജൂലൈ മുതല് ഓഗസ്റ്റ് വരെയാണ് എത്തുന്നത്. ഓരോ പ്രദേശത്തും അതിന്റേതായ തനതായ ഇനങ്ങള് ഉണ്ട്. ഉദാഹരണത്തിന് സിന്ധില് സിന്ധ്രി പോലുള്ള പ്രാദേശിക ഇനങ്ങള് ഉണ്ട്.
അതേസമയം അന്വര് റാട്ടോള് ഇനങ്ങള് പഞ്ചാബില് ജനപ്രിയമാണ്. മൊത്തത്തില്, ലാംഗ്ര, ദസേരി, ഫജ്രി, സരോളി തുടങ്ങി 100-ലധികം ഇനം മാമ്പഴങ്ങള് പാകിസ്ഥാനില് ഉണ്ട്. അവ സാധാരണയായി കാര്ഡ്ബോര്ഡ് പെട്ടികളിലോ മരപ്പെട്ടികളിലോ കയറ്റുമതി ചെയ്യുന്നു, പലപ്പോഴും 5 കിലോഗ്രാം, 8 കിലോഗ്രാം, 10 കിലോഗ്രാം എന്നിങ്ങനെയുള്ള വലുപ്പത്തിലുള്ള ഇനങ്ങളില് വരുന്നു.
യുഎഇയില് മാമ്പഴത്തിന്റെ ജനപ്രീതിക്ക് പിന്നിലെ ഒരു കാരണം എമിറേറ്റ്സിലെ വലിയ പാകിസ്ഥാനി, ദക്ഷിണേഷ്യന് പ്രവാസികളാണ്. ഇവരുടെ ആവശ്യങ്ങള് നിറവേറ്റുന്നതിനായി യുഎഇയിലേക്ക് പഴങ്ങളുടെ വലിയ ഇറക്കുമതി നടക്കുന്നുണ്ട്. ഇത് പാകിസ്ഥാന് മാമ്പഴം കയറ്റുമതി ചെയ്യുന്ന മുന്നിര രാജ്യങ്ങളിലൊന്നായി യുഎഇയെ മാറ്റുന്നു. സിന്ധ്രി, ചൗന്സ, അന്വര് റാറ്റോള് ഇനങ്ങളുടെ വ്യത്യസ്തമായ രുചി, യുഎഇയിലെ എല്ലാവര്ക്കും പ്രിയപ്പെട്ട ഒന്നാക്കി ഇതിനെ മാറ്റുന്നു.
ഏറ്റവും ഉയര്ന്ന നിലവാരമുള്ള മാമ്പഴങ്ങള് മാത്രമേ വിദേശത്തേക്ക് കയറ്റുമതി ചെയ്യുന്നുള്ളൂവെന്ന് പാകിസ്ഥാന് ഉറപ്പാക്കുന്നു, ഇത് എല്ലായ്പ്പോഴും അവയുടെ ആകര്ഷണം വര്ധിപ്പിക്കുന്നു. യുഎഇക്ക് പുറമേ, പാകിസ്ഥാന് മാമ്പഴങ്ങള് യുകെ, കാനഡ, കസാക്കിസ്ഥാന്, ഒമാന്, ഖത്തര്, ജര്മ്മനി എന്നിവിടങ്ങളിലും ജനപ്രിയമാണ്. ജപ്പാന്, ദക്ഷിണ കൊറിയ, ഓസ്ട്രേലിയ തുടങ്ങിയ പാരമ്പര്യേതര വിപണികളിലേക്കും യുഎസിലേക്കും മാമ്പഴ കയറ്റുമതി വ്യാപിപ്പിക്കാന് പാകിസ്ഥാന് ശ്രമിക്കുന്നുണ്ട്.
മാമ്പഴം കൊണ്ടുള്ള ഉല്പ്പന്നങ്ങള്ക്കും യുഎഇയില് വലിയ ഡിമാന്ഡാണ്. പാകിസ്ഥാനില് നിന്നുള്ള ജനപ്രിയ മാമ്പഴ അധിഷ്ഠിത ഉല്പ്പന്നങ്ങളില് ജാം, അച്ചാറുകള്, ജെല്ലികള്, കോണ്സെന്ട്രേറ്റുകള് എന്നിവ ഉള്പ്പെടുന്നു. മാമ്പഴ ഐസ്ക്രീം, മില്ക്ക് ഷേക്കുകള്, പുഡ്ഡിംഗ് തുടങ്ങിയ മധുരപലഹാരങ്ങള്ക്കും യുഎഇയില് ഡിമാന്ഡുണ്ട്. പാകിസ്ഥാന് മാമ്പഴം രാജ്യത്തുടനീളം വ്യാപകമായി ലഭ്യമാണ്.
Click it and Unblock the Notifications
Sign in with Google