ഒരു ഒമാന്‍ വീരഗാഥ: 2020-ൽ 17-ാം സ്ഥാനം മാത്രം: ഇന്ന് യുഎഇയേയും സ്വിറ്റ്സർലാൻഡിനെയും പിന്തള്ളി നാലാമത്

മസ്കത്ത്: കഴിഞ്ഞ ഒരു ദശാബ്ദത്തിനിടെ ലോകത്തിലെ ഏറ്റവും വലിയ ജീവിതനിലവാര കുതിപ്പ് സ്വന്തമാക്കി ചരിത്രം സൃഷ്ടിച്ച് ഒമാന്‍. 2015-ൽ നമ്പിയോയുടെ (Numbeo) ഗ്ലോബൽ ക്വാളിറ്റി ഓഫ് ലൈഫ് ഇൻഡക്സിൽ റാങ്ക് പോലും ഇല്ലാതിരുന്ന ഒമാൻ, 2025 മിഡ്-ഇയർ പട്ടികയിൽ 215.1 പോയിന്റോടെ ലോകത്ത് നാലാം സ്ഥാനം കരസ്ഥമാക്കിയിരിക്കുന്നുവെന്നതാണ് ശ്രദ്ധേയം. ലക്സംബർഗ് (220.1), നെതർലാൻഡ്സ് (211.3), ഡെൻമാർക്ക് (209.9) എന്നിവയ്ക്ക് പിന്നിൽ നാലാമത് നില്‍ക്കുന്ന ഒമാന്‍ സ്വിറ്റ്സർലാൻഡിനെ (205.0) പിന്നിലാക്കുകയും ചെയ്തു.

എട്ട് പ്രധാന മാനദണ്ഡങ്ങളുടെ അടിസ്ഥാനത്തിലാണ് ഏജന്‍സി ഇത്തരമൊരു സൂചിക തയ്യാറാക്കിയിരിക്കുന്നത്. ക്രയശേഷി, സുരക്ഷ, ആരോഗ്യസംവിധാനം, ജീവിതച്ചെലവ്, പ്രോപ്പർട്ടി വില-വരുമാന അനുപാതം, ഗതാഗത സമയം, മലിനീകരണ നിലവാരം, കാലാവസ്ഥാ സൂചിക എന്നിവയാണ് ഈ എട്ട് സൂചികകള്‍. സാമ്പത്തികം, പരിസ്ഥിതി, സാമൂഹിക സാഹചര്യങ്ങൾ എങ്ങനെ ദൈനംദിന ജീവിതത്തെ സ്വാധീനിക്കുന്നു എന്നതിന്റെ സമഗ്ര ചിത്രമാണ് ഈ സൂചിക നൽകുന്നത്.

2015 മുതൽ 2019 വരെ തുടർച്ചയായി റാങ്ക് ലിസ്റ്റിൽ ഇടംപിടിക്കാതിരുന്ന ഒമാൻ 2020-ൽ ആദ്യമായി 17-ാം സ്ഥാനത്തെത്തി. അന്നത്തെ സ്കോർ 168.0 മാത്രമായിരുന്നു. പിന്നീടുള്ള വർഷങ്ങളിൽ ക്രമേണ കുതിച്ചുയർന്നു. 2023-ൽ എട്ടാം സ്ഥാനവും 2024-ൽ ആറാം സ്ഥാനവും സ്വന്തമാക്കിയ ഒമാൻ, 2025-ൽ തുടർച്ചയായി നാലാം റാങ്ക് ഉറപ്പിച്ചു.

ഈ അത്ഭുതകരമായ പുരോഗതിക്ക് പിന്നിൽ ഒമാൻ വിഷൻ 2040 എന്ന ദീർഘകാല ദേശീയ പദ്ധതിയാണെന്നും വിദഗ്ധർ ചൂണ്ടിക്കാട്ടുന്നു. സാമ്പത്തിക വൈവിധ്യവൽക്കരണം, സാമൂഹിക ക്ഷേമം, സുസ്ഥിര വികസനം എന്നിവയെ മുൻനിർത്തിയുള്ള ഈ പദ്ധതി ആരോഗ്യ-വിദ്യാഭ്യാസ മേഖലകളെ വിപുലീകരിക്കുകയും അടിസ്ഥാന സൗകര്യങ്ങൾ മെച്ചപ്പെടുത്തുകയും പൊതുസുരക്ഷ ഉറപ്പാക്കുകയും ചെയ്തു.

പരിസ്ഥിതി നയങ്ങൾ ശക്തിപ്പെടുത്തലും നിക്ഷേപകരെയും വിദഗ്ധ തൊഴിലാളികളെയും ആകർഷിക്കലും ഒമാനിന്റെ ലിവബിലിറ്റി, സുരക്ഷ, താങ്ങാനാവുന്ന ജീവിതച്ചെലവ് എന്നിവയിൽ അന്താരാഷ്ട്ര തലത്തിൽ മികച്ച പ്രശസ്തി നേടിക്കൊടുത്തു. ഫലമോ, ലോകത്തിലെ ഏറ്റവും ജീവിക്കാൻ പറ്റിയ രാജ്യങ്ങളിൽ ഒമാൻ ഇന്ന് മുൻനിരയില്‍ എത്തുകയും ചെയ്തു. ഈ നേട്ടം ഒമാനിലെ നിവാസികൾക്ക് മാത്രമല്ല, പ്രവാസികൾക്കും അഭിമാനകരമാണ്. ആഗോള തലത്തിൽ മത്സരാധിഷ്ഠിതമായ ഈ ലാൻഡ്സ്കേപ്പിൽ ഒമാൻ തന്റെ പ്രതിബദ്ധത വീണ്ടും തെളിയിച്ചു. ഭാവിയിൽ ഒന്നാം സ്ഥാനം പോലും അപ്രാപ്യമല്ലെന്ന ആത്മവിശ്വാസമാണ് ഈ റാങ്ക് ഒമാനിലെ ജനങ്ങൾക്ക് നൽകുന്നത്.

ഒമാൻ വിഷൻ 2040

ഒമാൻ വിഷൻ 2040 എന്നത് സുൽത്താൻ ഹൈതം ബിൻ താരിഖ് അൽ സയീദിന്റെ നേതൃത്വത്തിൽ 2021 ജനുവരി 11-ന് ഔദ്യോഗികമായി പ്രഖ്യാപിച്ച ഒമാനിന്റെ ദീർഘകാല ദേശീയ തന്ത്രപദ്ധതിയാണ്. പെട്രോളിയം ആശ്രിത സമ്പദ്‌വ്യവസ്ഥയിൽ നിന്ന് വൈവിധ്യമാർന്നതും സുസ്ഥിരവും സാങ്കേതികവുമായ സമ്പദ്‌വ്യവസ്ഥയിലേക്ക് 2040-ഓടെ ഒമാനിനെ മാറ്റുക എന്നതാണ് ഈ ദർശനത്തിന്റെ പ്രധാന ലക്ഷ്യം.

ജനങ്ങളും സമൂഹവും

നാല് പ്രധാന സ്തംഭങ്ങളാണ് വിഷന്‍ 2040 ന് ഉള്ളത്. ഒന്നാമതായി ജനങ്ങളും സമൂഹവും - ലോകോത്തര വിദ്യാഭ്യാസം, ആരോഗ്യ സംരക്ഷണം, യുവതലമുറയുടെ കഴിവ് വികസനം, ഒമാനി സാംസ്കാരിക-കായിക പൈതൃക സംരക്ഷണം എന്നിവ ഉറപ്പാക്കുന്നു.

സമ്പദ്‌വ്യവസ്ഥയും വികസനവും

പെട്രോളിയത്തിന്റെ ജിഡിപി പങ്ക് 2020-ലെ 38% ൽ നിന്ന് 2040-ഓടെ 8.4% ആക്കി കുറയ്ക്കുകയാണ് ലക്ഷ്യം. ടൂറിസം, ലോജിസ്റ്റിക്സ്, മാനുഫാക്ചറിംഗ്, ഫിഷറീസ്, അഗ്രി-ടെക്, റിന്യൂവബിൾ എനർജി, മൈനിംഗ് തുടങ്ങിയ മേഖലകളിൽ ശ്രദ്ധ കേന്ദ്രീകരിക്കുന്നു. 2040-ഓടെ വിദേശ നിക്ഷേപം ജിഡിപിയുടെ 10% ആക്കി ഉയർത്തും.

ഭരണവും ഭരണനിർവഹണവും

സുതാര്യതയും കാര്യക്ഷമതയും ഉറപ്പാക്കുന്ന ഡിജിറ്റൽ ഗവൺമെന്റ് സംവിധാനം കൊണ്ടുവരുന്നു. അഴിമതി പൂർണമായും നിർമാർജനം ചെയ്ത് ലോക റാങ്കിംഗിൽ മുൻനിരയിലെത്തുക, നിയമനിർമാണവും നീതിന്യായ വ്യവസ്ഥയും ആധുനികവൽക്കരിക്കുക എന്നിവയും ലക്ഷ്യമിടുന്നു.

പരിസ്ഥിതിയും സുസ്ഥിരതയും

2040-ഓടെ 30% ഊർജം റിന്യൂവബിൾ സോഴ്സുകളിൽ നിന്ന് (സോളാർ, വിൻഡ്) ഉത്പാദിപ്പിക്കും. കാർബൺ എമിഷൻ 7% കുറയ്ക്കുക, 10 മില്യൺ മരങ്ങൾ നടുക (ഇതിനകം 8 മില്യൺ പിന്നിട്ടു), സർക്കുലർ ഇക്കോണമി മാതൃകയിലേക്ക് മാറുക എന്നിവയും പദ്ധതിയിലുണ്ട്.

12 ദേശീയ മുൻഗണനകള്‍

12 ദേശീയ മുൻഗണനകളാണ് വിഷൻ 2040-ന്റെ നട്ടെല്ല്. വിദ്യാഭ്യാസം-പഠനം-ഗവേഷണം-ദേശീയ കഴിവുകൾ, ആരോഗ്യം, പൗരത്വവും ദേശീയതയും, ക്ഷേമവും സാമൂഹിക സംരക്ഷണവും, സാമ്പത്തിക വൈവിധ്യവൽക്കരണം, തൊഴിൽ വിപണിയും തൊഴിലവസരങ്ങളും, സ്വകാര്യ മേഖലയും നിക്ഷേപവും, ഗതാഗത-ലോജിസ്റ്റിക്സ്-ടെക്, പരിസ്ഥിതി-സുസ്ഥിരത, ഭരണം-നിയമം-നീതി, ഗവർണൻസസ്-പെർഫോമൻസ്, അന്താരാഷ്ട്ര സഹകരണം എന്നിവയാണ് അവ.

English summary

Oman Rises From 17th In 2020 To 4th Today, Surpassing The UAE And Switzerland In Quality Of Life Index