ഖത്തറിലും ഗോൾഡൻ വീസ; പ്രവാസികൾക്കും നിക്ഷേപകർക്കും വൻ അവസരം

ഖത്തറിലെ പ്രവാസികൾക്കും ആഗോള നിക്ഷേപകർക്കും വലിയ ആവേശം പകരുന്ന ഒരു പ്രഖ്യാപനമാണ് അടുത്തിടെ ഉണ്ടായിരിക്കുന്നത്. രാജ്യത്തിന്റെ സാമ്പത്തിക അടിത്തറ ഭദ്രമാക്കുന്നതിനും ലോകമെമ്പാടുമുള്ള പ്രമുഖ സംരംഭകരെയും പ്രതിഭകളെയും ആകർഷിക്കുന്നതിനുമായി പത്ത് വർഷത്തെ ദീർഘകാല റസിഡൻസി പദ്ധതി(Qatar 10 Year golden Visa) ഖത്തർ ഔദ്യോഗികമായി പ്രഖ്യാപിച്ചു. ദോഹയിൽ നടന്ന 'വെബ് സമ്മിറ്റ് ഖത്തർ 2026' ന്റെ വേദിയിൽ വെച്ച് ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുറഹ്മാൻ ബിൻ ജാസിം അൽ താനിയാണ് ഈ സുപ്രധാന പ്രഖ്യാപനം നടത്തിയത്.

എന്താണ് പുതിയ റസിഡൻസി പദ്ധതി?

നിലവിലുള്ള ഹ്രസ്വകാല വിസ രീതികളിൽ നിന്ന് വ്യത്യസ്തമായി, വിദേശികൾക്ക് സ്പോൺസർമാരുടെ സഹായമില്ലാതെ തന്നെ ഖത്തറിൽ ദീർഘകാലം താമസിക്കാനും ബിസിനസ് ചെയ്യാനും ഈ പദ്ധതി അവസരമൊരുക്കുന്നു. വിദേശ നിക്ഷേപകർക്കും ഉന്നത ഉദ്യോഗസ്ഥർക്കും കൂടുതൽ സുരക്ഷിതത്വവും സ്ഥിരതയും വാഗ്ദാനം ചെയ്യുന്നതാണ് ഈ പത്ത് വർഷത്തെ റസിഡൻസി പദവി.

ആർക്കൊക്കെ അപേക്ഷിക്കാം?

പുതിയ നിയമപ്രകാരം പ്രധാനമായും രണ്ട് വിഭാഗങ്ങളിലുള്ളവർക്കാണ് ഈ ദീർഘകാല വിസയ്ക്ക് അർഹതയുള്ളത്. സ്വന്തമായി ബിസിനസ് ആശയങ്ങളുള്ളവർക്കും ഖത്തറിൽ നിക്ഷേപം നടത്താൻ താല്പര്യമുള്ളവർക്കും ഈ വിഭാഗത്തിൽ അപേക്ഷിക്കാം. എന്നാൽ ഇതിന് ചില നിബന്ധനകളുണ്ട്. ഖത്തർ ഫിൻടെക് ഹബ്, ഖത്തർ ഡെവലപ്‌മെന്റ് ബാങ്ക് തുടങ്ങിയ അംഗീകൃത ബിസിനസ് ഇൻകുബേറ്ററുകളിൽ നിന്നുള്ള എൻഡോഴ്സ്‌മെന്റ് (സാക്ഷ്യപത്രം) നിർബന്ധമാണ്.കുറഞ്ഞത് 2,50,000 ഖത്തർ റിയാൽ നിക്ഷേപവും കൃത്യമായ ബിസിനസ് പ്ലാനും ഉണ്ടായിരിക്കണം. രാജ്യത്തിന് അകത്തുള്ളവർക്കും പുറത്തുള്ളവർക്കും ഈ വിസയ്ക്കായി അപേക്ഷിക്കാവുന്നതാണ്.

സീനിയർ എക്സിക്യൂട്ടീവുകൾ

ഖത്തറിൽ നിലവിൽ ജോലി ചെയ്യുന്ന ഉന്നത ഉദ്യോഗസ്ഥർക്കുള്ളതാണ് ഈ വിഭാഗം. ഇതിനായി താഴെ പറയുന്ന യോഗ്യതകൾ ആവശ്യമാണ്. സിഇഒ, സിഎഫ്ഒ തുടങ്ങിയ ഉന്നത തസ്തികകളിൽ ഇരിക്കുന്നവർക്ക് പ്രതിമാസ ശമ്പളം കുറഞ്ഞത് 50,000 റിയാൽ ഉണ്ടായിരിക്കണം.മറ്റ് എക്സിക്യൂട്ടീവ് ഡയറക്ടർ തസ്തികയിലുള്ളവർക്ക് കുറഞ്ഞത് 80,000 റിയാൽ മാസശമ്പളം നിർബന്ധമാണ്. അഞ്ചു വർഷത്തെ പ്രവൃത്തിപരിചയവും ഖത്തർ ഐഡിയും അപേക്ഷകർക്ക് ഉണ്ടായിരിക്കണം.

ഈ വിസ ലഭിക്കുന്നവർക്ക് പിന്നീട് ജോലി മാറിയാലും ദീർഘകാല റസിഡൻസി പദവി നഷ്ടപ്പെടില്ല എന്നത് വലിയൊരു സവിശേഷതയാണ്. കൂടാതെ, സ്പോൺസറുടെ ഇടപെടലില്ലാതെ തന്നെ ബിസിനസ് കാര്യങ്ങൾ കൈകാര്യം ചെയ്യാനും കുടുംബത്തോടൊപ്പം സ്ഥിരമായി താമസിക്കാനും ഇത് സഹായിക്കും.

സൗദി അറേബ്യ, യുഎഇ തുടങ്ങിയ അയൽരാജ്യങ്ങൾ നടപ്പിലാക്കിയ 'ഗോൾഡൻ വിസ' മാതൃകയിലുള്ള ഈ നീക്കം ഖത്തറിനെ ഒരു ആഗോള ബിസിനസ് ഹബ്ബാക്കി മാറ്റാൻ സഹായിക്കുമെന്നാണ് വിലയിരുത്തപ്പെടുന്നത്. അന്താരാഷ്ട്ര കമ്പനികൾക്ക് തങ്ങളുടെ ആസ്ഥാനം ഖത്തറിലേക്ക് മാറ്റാനും ഇത് പ്രേരണയാകും, ഇത് രാജ്യത്ത് കൂടുതൽ തൊഴിലവസരങ്ങൾ സൃഷ്ടിക്കുമെന്നും പ്രതീക്ഷിക്കുന്നു.