സൗദി അറേബ്യ കുതിക്കും: പുത്തന്‍ പ്രഖ്യാപനവുമായി എംബിഎസ്, തൊഴില്‍ അവസരങ്ങളും വർധിക്കും

റിയാദ്: സൗദി അറേബ്യയിലെ പരിഷ്കരണങ്ങള്‍ കൂടുതല്‍ ശക്തമാക്കി കിരീടവകാശി മുഹമ്മദ് ബിന്‍ സല്‍മാന്‍. ഹോട്ടല്‍ വ്യവസായ രംഗത്താണ് സല്‍മാന്‍ രാജകുമാരന്റെ പുതിയ പരിഷ്കാരം. രാജ്യത്തെ ഹോട്ടലുകൾക്കും ഹോട്ടൽ അപ്പാർട്ടുമെൻ്റുകൾക്കും റെസിഡൻഷ്യൽ റിസോർട്ടുകൾക്കുമുള്ള വാണിജ്യ പ്രവർത്തന ലൈസൻസുകൾ നൽകുന്നതിനുള്ള ഫീസ് റദ്ദാക്കാൻ സൗദി അറേബ്യ തീരുമാനിച്ചെന്നാണ് ഔദ്യോഗിക വാർത്താ ഏജന്‍സിയായ എസ് പി എ റിപ്പോർട്ട് ചെയ്യുന്നത്.

സൗദി അറേബ്യയെ ആഗോള ടൂറിസം രഗംത്തെ പവർഹൗസാക്കി മാറ്റുക എന്ന ലക്ഷ്യത്തോടെ മാർച്ചിൽ ആരംഭിച്ച ടൂറിസം ഇൻവെസ്റ്റ്‌മെൻ്റ് എനേബിളർ പ്രോഗ്രാമിൻ്റെ ഭാഗമാണ് പുതിയ പ്രഖ്യാപനം. തീരുമാനം സെപ്റ്റംബർ 4 മുതൽ പ്രാബല്യത്തിൽ വന്ന് കഴിഞ്ഞു. ഹോട്ടൽ , റെസിഡൻഷ്യൽ റിസോർട്ട് രംഗത്ത് പ്രവർത്തിക്കുന്ന മലയാളികള്‍ ഉള്‍പ്പെടേയുള്ള വ്യവസായികള്‍ക്കും തീരുമാനം ഗുണകരമാണ്.

'സൗദിയെ ലോകത്തിലെ ഏറ്റവും പ്രമുഖ ടൂറിസ്റ്റ് കേന്ദ്രമാക്കി മാറ്റാനുള്ള കിംഗ്ഡം വിഷൻ 2030 ൻ്റെ ലക്ഷ്യങ്ങൾക്കനുസൃതമായാണ് പുതിയ ഈ തീരുമാനം.' എസ് പി എ റിപ്പോർട്ട് ചെയ്യുന്നു. ടൂറിസം മേഖലയിലേക്ക് കൂടുതൽ പണം നിക്ഷേപിക്കാൻ പുതിയ തീരുമാനം നിക്ഷേപകരെ പ്രോത്സാഹിപ്പിക്കുമെന്നും ഇത് മൊത്ത ആഭ്യന്തര ഉൽപ്പാദനത്തിൽ ടൂറിസം മേഖലയുടെ സംഭാവന വർദ്ധിപ്പിക്കുമെന്നും എസ് പി എ കൂട്ടിച്ചേർക്കുന്നു.

രാഷ്ട്രത്തെ നവീകരിക്കുക, എണ്ണ കയറ്റുമതി വരുമാനത്തെ ആശ്രയിക്കുന്നത് കുറയ്ക്കുക എന്നീ ലക്ഷ്യങ്ങള്‍ മുന്‍ നിർത്തിയാണ് വിഷന്‍ 2030 സൗദി അറേബ്യ പ്രഖ്യാപിച്ചിരിക്കുന്നത്. സമ്പദ്‌വ്യവസ്ഥയെ വൈവിധ്യവത്കരിക്കുന്നതിന് 800 ബില്യൺ ഡോളറിലധികം നിക്ഷേപം നടത്താനും മുഹമ്മദ് ബിന്‍ സല്‍മാന്‍ ലക്ഷ്യമിടുന്നു.

ടൂറിസം മേഖലയുടെ അടിസ്ഥാന സൗകര്യങ്ങൾ, പ്രത്യേകിച്ച് ഹോസ്പിറ്റാലിറ്റി സൗകര്യങ്ങൾ വികസിപ്പിക്കുന്നതിലും പ്രവർത്തന ചെലവ് കുറയ്ക്കുന്നതിലും പുതിയ തീരുമാനം സ്വാധീനം ചെലുത്തിയേക്കും. ബലഡി പ്ലാറ്റ്‌ഫോമിലൂടെ ഹോട്ടലുകൾക്കും ഹോട്ടൽ അപ്പാർട്ടുമെൻ്റുകൾക്കും റെസിഡൻഷ്യൽ റിസോർട്ടുകൾക്കുമായി വാണിജ്യ പ്രവർത്തന ലൈസൻസ് നൽകുകയോ പുതുക്കുകയോ ചെയ്തുകൊണ്ട് തീരുമാനത്തിൽ നിന്ന് പ്രയോജനം നേടണമെന്ന് അധികൃതർ ഈ മേഖലയിലെ നിക്ഷേപകരോട് ആഹ്വാനം ചെയ്യുന്നു.

ടൂറിസം സേവനങ്ങളിൽ സുസ്ഥിരതയും ഗുണനിലവാരവും ഉറപ്പാക്കുന്നതിനും സൗകര്യങ്ങൾ മെച്ചപ്പെടുത്തുന്നതിനും വികസിപ്പിക്കുന്നതിനും മികച്ച രീതിയില്‍ പ്രവർത്തിക്കണമെന്നും മന്ത്രാലയം നിക്ഷേപകരോട് ആവശ്യപ്പെടുന്നുണ്ട്.

പുതിയ തീരുമാനം വിശദീകരിക്കാനും വ്യക്തത വരുത്താനും ടൂറിസം മേഖലയിലെ നിക്ഷേപകർക്ക് ആവശ്യമായ പിന്തുണയും ഉപദേശവും നൽകാനും ഹോട്ടലുകൾ, ഹോട്ടൽ അപ്പാർട്ട്‌മെൻ്റുകൾ, റെസിഡൻഷ്യൽ റിസോർട്ടുകൾ എന്നിവയുടെ ഉടമകൾക്കായി പ്രത്യേക യോഗങ്ങളും ശില്‍പ്പശാലകളും സംഘടിപ്പിക്കുമെന്നും മന്ത്രാലയങ്ങൾ അറിയിച്ചു.

രാജ്യത്ത് പുതിയ തൊഴിലവസരങ്ങൾ സൃഷ്ടിക്കുന്നതിനും മൊത്ത ആഭ്യന്തര ഉൽപ്പാദനത്തിൽ ഈ മേഖലയുടെ സംഭാവന വർദ്ധിപ്പിക്കുന്നതിനും സഹായിക്കുന്ന ടൂറിസം മേഖലയിലേക്ക് കൂടുതൽ നിക്ഷേപം പമ്പ് ചെയ്യാനും പുതിയ തീരുമാനം സഹായകരമാകും. ഈ രംഗത്തെ നിക്ഷേപകരെ പിന്തുണയ്ക്കുന്നതിനും അവരെ പ്രോത്സാഹിപ്പിക്കുന്നതിനുമുള്ള ഒരു തന്ത്രപരമായ ചുവടുവെപ്പായിരിക്കും ഈ തീരുമാനമെന്നും മന്ത്രാലയം പ്രതീക്ഷിക്കുന്നു.