സൗദി അറേബ്യയുടെ ആഗ്രഹം സഫലമാകുന്നു: ഒപെക് തീരുമാനിക്കും, ക്രൂഡ് ഓയില്‍ ഒഴുകും; വരുമാനവും വർധിക്കും

Updated: Tuesday, September 30, 2025, 8:09 [IST]

ക്രൂഡ് ഓയില്‍ ഉത്പാദനം വീണ്ടും വർധിപ്പിക്കാനുള്ള തീരുമാനവുമായി പെട്രോളിയം ഉൽപ്പാദക രാജ്യങ്ങളുടെ സംഘടനയായ ഒപെക്+. നവംബറിലെ ക്രൂഡ് ഓയില്‍ ഉത്പാദനത്തില്‍ ദിവസവും കുറഞ്ഞത് 137000 ബാരലിന്റെ വർധനവ് അനുവദിക്കാന്‍ സാധ്യതയുണ്ടെന്നാണ് വിവിധ സ്രോതസ്സുകളെ ഉദ്ധരിച്ച് അന്തർദേശീയ മാധ്യമങ്ങള്‍ റിപ്പോർട്ട് ചെയ്യുന്നത്.

അടുത്തതായി ചേരുന്ന ഒപെക്+ യോഗത്തില്‍ വർധനവിന് അംഗീകാരം ലഭിക്കാൻ സാധ്യതയുണ്ടെന്ന് റോയിട്ടേഴ്സും ബ്ലൂംബെർഗും റിപ്പോർട്ട് ചെയ്യുന്നു. 2023 ല്‍ ഏർപ്പെടുത്തിയ ഉത്പാദന വെട്ടിക്കുറവ് അടുത്ത കാലത്തായി ഒപെക്+ ഘട്ടം ഘട്ടമായി കുറച്ചുകൊണ്ടുവരുന്നതിന്റെ ഭാഗമായിട്ട് കൂടിയാണ് പുതിയ നീക്കം. ഈ വർഷം തുടക്കത്തിൽ ബാരലിന് 80 ഡോളറിന് മുകളിലായിരുന്ന എണ്ണവില ഇപ്പോൾ 60-70 ഡോളർ പരിധിയില്‍ സ്ഥിരമായി നിലനില്‍ക്കുകയാണ്.

യുഎസ്, ബ്രസീൽ തുടങ്ങിയ രാജ്യങ്ങളിലെ ഉൽപ്പാദന വർധനവും ചൈനയിലെ സാമ്പത്തിക മന്ദഗതിയും വില പിടിച്ച് നിർത്തുന്നതില്‍ നിർണ്ണായകമായിട്ടുണ്ട്. ഇതോടൊപ്പം തന്നെയാണ് ഉത്പാദനം വർധിപ്പിക്കാനുള്ള ഒപെക്+ തീരുമാനവും വരുന്നത്. ഉത്പാദനത്തിലെ വർധനവ് ഒപെക്+ ലെ പ്രധാന രാജ്യമായ സൗദി അറേബ്യയെ സംബന്ധിച്ച് നിർണ്ണായകവുമാണ്. ഇത് അവർക്ക് പല വിധത്തില്‍ സാമ്പത്തിക ലാഭവും നല്‍കുന്നു.

ഉൽപ്പാദനം വർധിപ്പിച്ചുള്ള വരുമാന വളർച്ച

സൗദി അറേബ്യയുടെ ദിവസേനയുള്ള ഉൽപ്പാദനം ഇപ്പോൾ 9 മില്യൺ ബി പി ഡിയില്‍ അധികമാണ്. നവംബറിലെ 137000 ലെ ബി പി ഡിയുടെ വർധന സൗദിയുടെ വിഹിതത്തിൽ (OPEC+ ക്വോട്ട പ്രകാരം ഏകദേശം 40%) ഏകദേശം 50000-60000 bpd-ആയി വരാം. വില 65 ഡോളറിലും മുകളിലാണെങ്കിൽ, ഇത് ദിവസവും 30-40 മില്യൺ ഡോളറിന്റെ അധിക വരുമാനം സൗദിക്ക് ഉണ്ടാക്കിയേക്കാം. സൗദിയുടെ സാമ്പത്തിന്റെ 40% എണ്ണയെ ആശ്രയിക്കുന്ന സാഹചര്യത്തിൽ ബജറ്റ് കുറവ് പരിഹരിക്കാൻ ഇത് സഹായകരമാകുമെന്നും വിലയിരുത്തപ്പെടുന്നു.

വിപണി വിഹിതം ശക്തിപ്പെടുത്തൽ

അമേരിക്കയിലെ ഷെല്ല് ഓയിലും റഷ്യയുടെ ഉൽപ്പാദനവും കാരണം OPEC+ യുടെ വിപണി ഷെയർ 2023-ൽ 5% കുറഞ്ഞിരുന്നു. ഈ വർധന സൗദിക്ക് തങ്ങളുടെ വിപണി വിഹിതം തിരിച്ചുപിടിക്കാന്‍ അവസരമൊരുക്കും, പ്രത്യേകിച്ച് ഏഷ്യൻ വിപണികളിൽ (ചൈന, ഇന്ത്യ) ഡിസ്കൗണ്ട് വാഗ്ദാനം ചെയ്ത് ഏറ്റവും വലിയ കയറ്റുമതി രാജ്യമായി നിലനില്‍ക്കാം. അതുകൊണ്ട് തന്നെ ഇത് സൗദിയുടെ 'പോസ്റ്റ്-കട്ട്' യുഗത്തിലേക്കുള്ള മടങ്ങിവരവാണെന്നും റിപ്പോർട്ടുകള്‍ പറയുന്നു.

വിഷൻ 2030

സൗദി കിരീടവകാശി മുഹമ്മദ് ബിൻ സൽമാന്റെ വിഷൻ 2030 ലൂടെ രാജ്യം പ്രധാനമായും ലക്ഷ്യമിടുന്നത് ക്രൂഡ് ഓയില്‍ ഇതര വ്യാപാരം വർധിപ്പിക്കുകയെന്നതാണ്. അധിക ക്രൂഡ് ഓയില്‍ ഉൽപ്പാദനം വരുമാനം വർധിപ്പിച്ച് ടൂറിസം, ഡൈവേഴ്സിഫിക്കേഷൻ പോലുള്ള പദ്ധതികൾക്ക് ഫണ്ട് ഒരുക്കും. അതേസമയം, വില സ്ഥിരത നിലനിർത്തി ഭാവി അനിശ്ചിതത്വങ്ങൾ (ഇലക്ട്രിക് വെഹിക്കിൾ ട്രെൻഡ്) നേരിടാനും സഹായിക്കും.

ഉത്പാദന വർധനവിനുള്ള തീരുമാനം ആഗോളവിപണിയിൽ വില വർധനവ് സംബന്ധിച്ചുള്ള അസ്ഥിരത കുറയ്ക്കുമെങ്കിലും, യുഎസ് ഫെഡറൽ റിസർവിന്റെ നയങ്ങള്‍, ജിയോപൊളിറ്റിക്കൽ റിസ്കുകൾ എന്നിവയാണ് വിലയെ സ്വാധീനിക്കുന്ന മറ്റ് പ്രധാന ഘടകങ്ങള്‍. ചുരുക്കത്തില്‍ ഒപെക് + ന്റെ ഉത്പാദന വർധനവ് സൗദി അറേബ്യയെ 'എണ്ണ രാജാവ്' എന്ന പദവിയിൽ ഉറപ്പിക്കുമെന്ന് വിദഗ്ധർ വിലയിരുത്തുന്നു.

അതേസമയം, ആഗോള തലത്തില്‍ ഡിമാന്‍ഡ് വലിയ തോതില്‍ ഉയരാതിരുന്നിട്ടും ക്രൂഡ് ഓയില്‍ വിലയില്‍ കഴിഞ്ഞ ദിവസങ്ങളില്‍ വർധനവ് ഉണ്ടാക്കിയിട്ടുണ്ട്. യു.എസില്‍ നിന്നുള്ള ക്രൂഡ് വരവ് കുറഞ്ഞതാണ് വില ഉയരാനുള്ള പ്രധാന കാരണങ്ങളില്‍ ഒന്ന്. റഷ്യ, ഇറാന്‍, വെനസ്വേല തുടങ്ങിയ രാജ്യങ്ങളുടെ എണ്ണ വാങ്ങുന്നതിനെതിരേ യു.എസിന്റെ ഉപരോധം നിലനില്‍ക്കുന്നു. ഇന്ത്യ പോലുള്ള ഏതാനും രാജ്യങ്ങള്‍ മാത്രമാണ് ഉപരോധം മറികടന്ന് റഷ്യയില്‍ നിന്നും ക്രൂഡ് ഓയില്‍ വാങ്ങുന്നത്.