ഖത്തറിനെ വെല്ലാന് സൗദി അറേബ്യ: മലനിരകള്ക്ക് സമീപം ഒരുങ്ങുന്നത് പുതിയ 'ലോകാത്ഭുതം'
2034 ലെ ലോകകപ്പ് ഫുട്ബോള് ലക്ഷ്യമിട്ട് പുതിയ സ്റ്റേഡിയം നിർമ്മിക്കാന് സൗദി അറേബ്യ ഒരുങ്ങുന്നു. കിരിടവകാശ് മുഹമ്മദ് ബിന് സല്മാന്റെ പേരിട്ടിരിക്കുന്ന സ്റ്റേഡിയത്തിന്റെ നിർമ്മാണ പ്രവർത്തികള്ക്ക് തുടക്കം കുറിച്ചതായി ഖിദ്ദിയ ഇൻവെസ്റ്റ്മെന്റ് കമ്പനി (ക്യുഐസി) തിങ്കളാഴ്ച പ്രഖ്യാപിച്ചു. സൗദി അറേബ്യയില് അരങ്ങേറുന്ന ഏറ്റവും വലിയ കായിക, വിനോദ, സാംസ്കാരിക പരിപാടികൾ നടത്തുകയെന്ന ഉദ്ദേശത്തോടെയാണ് പുതിയ സ്റ്റേഡിയത്തിന്റെ നിർമ്മാണമെന്നാണ് ഖലീജ് ടൈംസ് റിപ്പോർട്ട് ചെയ്യുന്നത്.
കഴിഞ്ഞ ലോകകപ്പ് ഫുട്ബോളിനോട് അനുബന്ധിച്ച ദോഹയില് അത്യാധുനിക സൗകര്യങ്ങളോട് കൂടിയ സ്റ്റേഡിയങ്ങള് നിർമ്മിക്കപ്പെട്ടിരുന്നു. ഇതിനെയെല്ലാം വെല്ലുന്ന തരത്തിലായിരിക്കും മുഹമ്മദ് ബിന് സല്മാന് സ്റ്റേഡിയത്തിന്റെ നിർമ്മാണം. റിയാദിൽ നിന്ന് 40 മിനിറ്റ് മാത്രം അകലെ സ്ഥിതി ചെയ്യുന്ന, 200 മീറ്റർ ഉയരമുള്ള തുവൈഖ് മലഞ്ചെരുവിലെ ക്വിദ്ദിയ സിറ്റിയിലാണ് നിർദ്ദിഷ്ട സ്റ്റേഡിയം നിർമ്മിക്കുന്നത്. ഭാവിയില് രാജ്യത്ത് എത്തുന്ന സന്ദർശകർ പോലും സന്ദർശിക്കാന് താല്പര്യപ്പെടുന്ന തരത്തില് വേദി മാറുമെന്നും അധികൃതർ പറയുന്നു.
പരമ്പരാഗത സ്റ്റേഡിയം അനുഭവത്തോടൊപ്പം അതുല്യമായ സാങ്കേതിക സവിശേഷതകളും ഉപയോഗിച്ച് നിർമ്മാണത്തില് പുതിയ വിപ്ലവം സൃഷ്ടിക്കാനും സൗദി ലക്ഷ്യമിടുന്നു. ആവശ്യാനുസരണം കൂട്ടിച്ചേർക്കാന് കഴിയുന്ന മേൽക്കൂരയും അത്യാധുനിക പിച്ചും എൽഇഡി ഭിത്തിയും ഉള്ള ലോകത്തിലെ ആദ്യത്തെ സമ്പൂർണ്ണ സംയോജിത വേദിയായി സ്റ്റേഡിയം മാറുമെന്നാണ് പ്രതീക്ഷിക്കുന്നത്. സമാനതകളില്ലാത്ത വൈദഗ്ധ്യം വാഗ്ദാനം ചെയ്യുന്ന വാസ്തുവിദ്യാ നവീകരണത്തിലൂടെ മണിക്കൂറുകൾക്കുള്ളിൽ വ്യത്യസ്ത "ഇവന്റ് മോഡുകൾ" ആയി മാറാൻ സ്റ്റേഡിയത്തെ അനുവദിക്കുന്നുവെന്നും റിപ്പോർട്ടുകള് പറയുന്നു.
തത്സമയ ഇവന്റ് പ്രക്ഷേപണങ്ങൾ, ഹൈ-ഡെഫനിഷൻ ഫിലിമുകൾ, ലേസർ ഷോകൾ എന്നിവയ്ക്കുള്ള ഒരു പോർട്ടലായിരിക്കും എൽഇഡി വാൾ. പരിപാടികള് ഇല്ലാത്തപ്പോഴും ഖിദ്ദിയ സിറ്റിയുടെ അതിമനോഹരമായ കാഴ്ചകൾ പ്രദർശിപ്പിക്കാന് ഈ എല് ഇ ഡി വാളുകള് ഉപയോഗിക്കും.
വിനോദം, കായികം, സംസ്കാരം എന്നിവയുടെ ആഗോള ലക്ഷ്യസ്ഥാനമായി ക്വിദിയ സിറ്റിയെ മാറ്റുക എന്നതാണ് ഞങ്ങളുടെ ആഗ്രഹമെന്നും ഈ ഐതിഹാസികമായ പുതിയ സ്റ്റേഡിയം അതിന്റെ ഹൃദയഭാഗത്തായിരിക്കുമെന്നും ഖിദ്ദിയ ഇൻവെസ്റ്റ്മെന്റ് കമ്പനി മാനേജിംഗ് ഡയറക്ടർ അബ്ദുല്ല ബിൻ നാസർ അൽദാവുദ് വ്യക്തമാക്കി. "ഇത് ലോകമെമ്പാടുമുള്ള ആരാധകർക്കും സഞ്ചാരികള്ക്കും ഒരു ബക്കറ്റ്-ലിസ്റ്റ് ഡെസ്റ്റിനേഷനായി മാറും, ലോകമെമ്പാടുമുള്ള കായിക വിനോദ പരിപാടികൾ ഇവിടെ സംഘടിപ്പിക്കും." അബ്ദുല്ല ബിൻ നാസർ അൽദാവുദ് പറഞ്ഞു.
ഫുട്ബോൾ, ബോക്സിംഗ്, ഇ-സ്പോർട്സ്, സംഗീതകച്ചേരികൾ, തിയേറ്റർ പ്രകടനങ്ങൾ എന്നിവയുൾപ്പെടെ, അതിഥികൾക്ക് ഒറ്റ ദിവസം കൊണ്ട് ഒന്നിലധികം കാഴ്ചകൾ ഇവിടെ ആസ്വദിക്കാനാകും. പ്രമുഖ ആഗോള വാസ്തുവിദ്യാ സ്ഥാപനമായ പോപ്പുലസ് രൂപകൽപ്പന ചെയ്ത സ്റ്റേഡിയം, അത്യാധുനിക ഹോളോഗ്രാഫിക് സാങ്കേതികവിദ്യയുടെ ഉപയോഗം ഉൾപ്പെടെയുള്ള തത്സമയ ഡാറ്റയിലേക്കും വിവരങ്ങളിലേക്കും ആരാധകർക്ക് തൽക്ഷണ ആക്സസ് നൽകുന്നതിന് അത്യാധുനിക സാങ്കേതികവിദ്യ ഉപയോഗിക്കും.
45,000 സീറ്റുകളുള്ള മൾട്ടി-ഫങ്ഷണൽ സ്റ്റേഡിയം സൗദി പ്രോ ലീഗ് ഫുട്ബോൾ ക്ലബ്ബുകളായ അൽ ഹിലാലിന്റെയും അൽ നാസറിന്റെയും ഹോം ഗ്രൗണ്ടായി പ്രവർത്തിക്കും, ഇത് കിംഗ്ഡത്തിന്റെ 2034 ഫിഫ ലോകകപ്പ് ശ്രമങ്ങള്ക്കുള്ള നിർദ്ദിഷ്ട വേദികളിലൊന്ന് കൂടിയാണ്. സൗദി കിംഗ് കപ്പ്, ഏഷ്യൻ കപ്പ്, ഒരുപക്ഷേ 2034 ലെ ഏഷ്യൻ ഗെയിംസ് എന്നിവയുൾപ്പെടെ മേഖലയിലെ ഏറ്റവും വലിയ കായിക മത്സരങ്ങൾ സംഘടിപ്പിക്കാനും വേദി ഒരുങ്ങും. സ്റ്റേഡിയത്തിലേക്ക് 1.8 മില്യൺ വാർഷിക സന്ദർശനങ്ങൾ ഉണ്ടാകുമെന്നും മറ്റ് പ്രവർത്തനങ്ങൾക്കായി ആറ് ദശലക്ഷം സന്ദർശനങ്ങൾ ഉണ്ടാകുമെന്നും കണക്കാക്കപ്പെടുന്നു.
Click it and Unblock the Notifications
Sign in with Google