സൗദി അറേബ്യ ഉംറ വിസ മെയ് 31 മുതല്; പുതിയ ഷെഡ്യൂള് പ്രഖ്യാപിച്ചു, ഹജ്ജ് അവസാനിക്കുന്ന പിന്നാലെ
റിയാദ്: 2026-27 വർഷത്തേക്കുള്ള പുതിയ ഉംറ കലണ്ടർ സൗദി അറേബ്യ പ്രഖ്യാപിച്ചു. 2026 മെയ് 31 മുതൽ ഉംറ വിസകൾ അനുവദിച്ചുതുടങ്ങും. ഹജ്ജ്, ഉംറ മന്ത്രാലയമാണ് 1448 AH ഉംറ സീസണിലേക്കുള്ള പ്രധാന തീയതികൾ പുറത്തുവിട്ടത്. ലോകമെമ്പാടുമുള്ള തീർത്ഥാടകർക്ക് യാത്രയും താമസസൗകര്യങ്ങളും മുൻകൂട്ടി ആസൂത്രണം ചെയ്യാനും രാജ്യത്തേക്കുള്ള പ്രവേശന നടപടികൾ സുഗമമാക്കാനും ഇത് സഹായകമാകും.
നുസുക് ആപ്പ് വഴി അനുമതി നേടിയ ശേഷം 2026 ജൂൺ 1 മുതൽ തീർത്ഥാടകരെ മക്കയിലേക്ക് പ്രവേശിക്കാൻ അനുവദിക്കുമെന്ന് മന്ത്രാലയം അറിയിച്ചു. ഉംറ വിസ നൽകുന്നതിനുള്ള അവസാന തീയതി 2027 മാർച്ച് 9 ആണ്. 2027 മാർച്ച് 23 വരെ തീർത്ഥാടകർക്ക് സൗദി അറേബ്യയിലേക്ക് പ്രവേശിക്കാം.
വരുന്ന സീസണില് ഉംറ തീർത്ഥാടകർക്ക് സൗദി അറേബ്യ വിടാനുള്ള അവസാന തീയതി 2027 ഏപ്രിൽ 7 ആയി നിശ്ചയിച്ചിട്ടുണ്ട്. വിസ നടപടിക്രമങ്ങളിൽ കാലതാമസമോ യാത്രാ തടസ്സങ്ങളോ ഒഴിവാക്കാൻ എല്ലാ തീർത്ഥാടകരും ടൂർ ഓപ്പറേറ്റർമാരും ഈ സമയപരിധികൾ പാലിക്കണമെന്ന് അധികൃതർ നിർദേശിച്ചു.
ഉംറ വിസയ്ക്ക് അപേക്ഷിക്കുന്നവർ നുസുക് ഉംറ പോർട്ടൽ വഴിയോ സൗദി അധികൃതർ അംഗീകരിച്ച ഏജന്റുമാർ വഴിയോ അപേക്ഷ സമർപ്പിക്കണം. ടൂറിസ്റ്റ് ഇ-വിസയിൽ സൗദി അറേബ്യ സന്ദർശിക്കുന്നവരും ഉംറ ചെയ്യുന്നതിന് മുമ്പ് നുസുക് ആപ്പ് വഴി പെർമിറ്റ് നേടണം. തീർത്ഥാടന യാത്രികർക്കായി ഡിജിറ്റൽ പെർമിറ്റ് സംവിധാനങ്ങളിലൂടെയും കർശന യാത്രാ നടപടിക്രമങ്ങളിലൂടെയും മതപരമായ വിനോദസഞ്ചാരം നിയന്ത്രിക്കുന്നത് സൗദി അറേബ്യ തുടരുകയാണ്.
ഹജ്ജ് 2026- കര്മങ്ങള് ഇങ്ങനെ
ഹജ്ജ് കര്മങ്ങള്ക്കായി ലോകത്തിന്റെ വിവിധ ഭാഗങ്ങളില് നിന്ന് സൗദി അറേബ്യയില് എത്തിയ ഹാജിമാര് മക്കയിലേക്ക് വന്നുക്കൊണ്ടിരിക്കുകയാണ്. ദുല്ഹജ്ജ് എട്ടിന് ഹജ്ജിന്റെ നടപടികള് തുടങ്ങും. മിനയിലേക്കും അറഫയിലേക്കും മുസ്ദലിഫയിലേക്കും വീണ്ടും മിനയിലേക്കും സഞ്ചരിക്കുന്ന ഹാജിമാര് ഇവിടെ ചെയ്യാനുള്ള കര്മങ്ങള് പൂര്ത്തിയാക്കി ത്വവാഫ് ചെയ്താണ് നാട്ടിലേക്ക് തിരിക്കുക.
പ്രവാചകന് ഇബ്രാഹീം, പത്നി ഹാജറ, മകന് ഇസ്മാഈല് എന്നിവരെ ഓര്ക്കുന്നതും അവരുടെ ത്യാഗങ്ങള് ജീവിതത്തില് പകര്ത്തുന്നതുമാണ് ഹജ്ജ്. എല്ലാ വര്ഷവും ഹജ്ജിന് 20 ലക്ഷത്തില് അധികം ആളുകളാണ് മക്കയില് എത്തിച്ചേരുക. ഈ വേളയില് ഉംറ കര്മങ്ങള്ക്കുള്ള വിസ സൗദി സര്ക്കാര് നിര്ത്തിവയ്ക്കും. ഹജ്ജ് കഴിയുന്നതോടെ വീണ്ടും ഉംറ വിസ പുനരാരംഭിക്കും. ഇതുമായി ബന്ധപ്പെട്ട അറിയിപ്പാണ് ഇപ്പോള് വന്നിരിക്കുന്നത്.
Click it and Unblock the Notifications
Sign in with Google