സൗദി അരാംകോ ഇന്ത്യയിലേക്ക് വരുന്നു; ക്രൂഡ് ഓയില്‍ മേഖലയില്‍ കോടികളുടെ നിക്ഷേപം: വന്‍ പദ്ധതി

Updated: Saturday, March 29, 2025, 15:25 [IST]

ലോകത്തിലെ ഏറ്റവും വലിയ എണ്ണക്കമ്പനിയും ഏറ്റവും വലിയ ക്രൂഡ് ഓയിൽ കയറ്റുമതിക്കാരുമായ സൗദി അരാംകോ ഇന്ത്യയില്‍ വന്‍ നിക്ഷേപത്തിന് ഒരുങ്ങുന്നു. ഇന്ത്യയിലെ രണ്ട് റിഫൈനറികളിൽ നിക്ഷേപം നടത്തുന്നതിനുള്ള ചർച്ചകൾ കമ്പനി നടത്തിവരികയാണെന്നാണ് ഇന്ത്യയിലെ വൃത്തങ്ങളെ ഉദ്ധരിച്ചുകൊണ്ട് അന്താരാഷ്ട്ര വാർത്താ ഏജന്‍സിയായ റോയിട്ടേഴ്സ് റിപ്പോർട്ട് ചെയ്യുന്നത്.

ഇന്ത്യയെ സംബന്ധിച്ചിടത്തോളം ലോകത്തിലെ മൂന്നാമത്തെ വലിയ ക്രൂഡ് ഓയിൽ ഇറക്കുമതിക്കാരായ രാജ്യം വർദ്ധിച്ചുവരുന്ന ഇന്ധന, പെട്രോകെമിക്കൽ ആവശ്യകത നിറവേറ്റുന്നതിനായി നിരവധി പുതിയ ക്രൂഡ് പ്രോസസ്സിംഗ് പ്ലാന്റുകൾ നിർമ്മിക്കാനുള്ള നീക്കത്തിലാണ്. പൊതുമേഖല സ്ഥാപനങ്ങള്‍ ഈ നീക്കത്തില്‍ ഇതിനോടകം തന്നെ വലിയ രീതിയില്‍ മുന്നേറിയിട്ടുമുണ്ട്.

സൗദി അറേബ്യയാകട്ടെ വരും വർഷങ്ങളിലും ക്രൂഡ് ഓയിലിന് വലിയ ഡിമാന്‍ഡ് ഉണ്ടാകുന്ന ഏഷ്യന്‍ രാജ്യങ്ങളുമായി ബന്ധപ്പെട്ട് തങ്ങളുടെ ക്രൂഡ് ഓയില്‍ വ്യാപാരത്തിന്റെ തോത് നിലവിലേത് പോലെയോ അതില്‍ കൂടുതലായോ നിലനിർത്താനാണ് ആഗ്രഹിക്കുന്നത്. ക്രൂഡ് ഓയിലിന്റെ കാര്യത്തില്‍ ലോകത്ത് തന്നെ ഏറ്റവും ഡിമാന്‍ഡ് വർധനവുണ്ടാകുന്ന രാജ്യങ്ങള്‍ ഇന്ത്യയും ചൈനയുമാണ്.

സൗദി അറേബ്യയാകട്ടെ, വരും വർഷങ്ങളിൽ ആഗോള ഡിമാൻഡ് വളർച്ചയ്ക്ക് നേതൃത്വം നൽകുന്ന മുൻനിര ഏഷ്യൻ വിപണികളിൽ ക്രൂഡ് ഓയിലിന്റെ ഭാവി വിൽപ്പന നിലനിർത്താൻ ശ്രമിക്കുന്നു. ഡിമാൻഡ് വളർച്ചയുടെ ഏറ്റവും വലിയ ഒറ്റ ചാലകശക്തി എന്ന നിലയിൽ ഇന്ത്യ ചൈനയെ മറികടന്നു. സൗദി അരാംകോ സമീപ വർഷങ്ങളിൽ ചൈനീസ് റിഫൈനറുകളുമായും പെട്രോകെമിക്കൽ ഉൽ‌പാദകരുമായും നിരവധി കരാറുകളില്‍ എർപ്പെട്ടിട്ടുണ്ട്. സമാനമായ രീതിയിലാണ് ഇന്ത്യയിലേക്കുള്ള പുതിയ നീക്കവും.

ഇന്ത്യയിൽ നിർമ്മിക്കാൻ പോകുന്ന പുതിയ റിഫൈനറികളിൽ നിക്ഷേപം നടത്താനാണ് സൗദി അരാംകോ ഇപ്പോൾ ലക്ഷ്യമിടുന്നത്. ഭാവിയിൽ ഓരോ പദ്ധതിയിലും തങ്ങളുടെ ഓഹരിയുടെ മൂന്നിരട്ടിക്ക് തുല്യമായ അളവിൽ ക്രൂഡ് ഓയിൽ വിതരണം ചെയ്യാൻ സൗദി കമ്പനി വാഗ്ദാനം ചെയ്യുന്നുണ്ടെന്നും റോയിട്ടേഴ്‌സ് വൃത്തങ്ങളെ ഉദ്ധരിച്ചുകൊണ്ട് റിപ്പോർട്ട് ചെയ്യുന്നു.

ഭാരത് പെട്രോളിയം കോർപ്പറേഷൻ ലിമിറ്റഡിന്റെ (ബി പി സി എൽ) 11 ബില്യൺ ഡോളർ വിലമതിക്കുന്ന പുതിയ ശുദ്ധീകരണ, പെട്രോകെമിക്കൽ സമുച്ചയത്തിൽ ഓഹരി വാങ്ങുന്നതിനെക്കുറിച്ച് സൗദി അരാംകോ ചർച്ച നടത്തുന്നുണ്ട്. കൂടാതെ ഇന്ത്യയുടെ പടിഞ്ഞാറൻ തീരത്തുള്ള ഗുജറാത്ത് സംസ്ഥാനത്ത് ഒരു നിർദ്ദിഷ്ട ശുദ്ധീകരണശാലയ്ക്കായി ഓയിൽ ആൻഡ് നാച്ചുറൽ ഗ്യാസ് കോർപ്പറേഷൻ ലിമിറ്റഡുമായി (ഒ എ ൻ ജി സി) പ്രത്യേക ചർച്ചകൾ നടത്തിവരികയാണെന്നും റിപ്പോർട്ടുകള്‍ അവകാശപ്പെടുന്നു.

അതേസമയം തന്നെ ഇപ്പുറത്ത്, ഇന്ത്യൻ ശുദ്ധീകരണ കമ്പനികൾ വിലകുറഞ്ഞ അസംസ്കൃത എണ്ണയും വൈവിധ്യമാർന്ന വിതരണ സ്രോതസ്സുകളുമാണ് നിരന്തരം തേടികൊണ്ടിരിക്കുന്നത്. അതുകൊണ്ട് തന്നെ പുതിയ ശുദ്ധീകരണശാലകൾക്കായി എണ്ണയുടെ വലിയൊരു ഭാഗം തങ്ങള്‍ വിതരണം ചെയ്യാമെന്നുള്ള സൗദിയുടെ നിർദ്ദേശം വിജയിച്ചേക്കില്ല. അടുത്തിടെ സ്വകാര്യ ശുദ്ധീകരണ കമ്പനിയായ റിലയൻസ് ഇൻഡസ്ട്രീസുമായി ഒരു കരാറിലെത്താൻ അരാംകോ ശ്രമിച്ചിരുന്നെങ്കിലും അത് വിജയത്തിലേക്ക് എത്തിയിരുന്നില്ല.