സൗദി അറേബ്യ തീരുമാനം മാറ്റുമോ? അരാംകോയില് നിന്നുള്ള ലാഭത്തില് ഇടിവ്, ഇല്ലെങ്കില് പദ്ധതികള്ക്ക് തിരിച്ചടി
ലോകത്തിലെ ഏറ്റവും വലിയ എണ്ണ ഉത്പാദകരായ സൗദി അറേബ്യയുടെ അരാംകോയുടെ ലാഭത്തില് ഇടിവ്. ചൊവ്വാഴ്ച കമ്പനി റിപ്പോർട്ട് ചെയ്ത രണ്ടാം പാദത്തിലെ കണക്കുകള് പ്രകാരം ഈ കാലയളവിലെ ലാഭം 29.07 ബില്യൺ ഡോളറാണ്. അതായത് മുന്കാലയളവിലെ ലാഭവുമായി താരതമ്യം ചെയ്യുമ്പോള് 3.4 ശതമാനത്തിന്റെ ഇടിവാണ് രേഖപ്പെടുത്തിയത്.
ക്രൂഡ് ഓയിൽ അളവ് കുറഞ്ഞതും ശുദ്ധീകരണ മാർജിനുകൾ ദുർബലമാകുന്നതുമാണ് കമ്പനിയുടെ ലാഭം കുറയാനുള്ള പ്രധാന കാരണമെന്നാണ് കമ്പനി സൗദി സ്റ്റോക്ക് എക്സ്ചേഞ്ചിൽ പോസ്റ്റ് ചെയ്ത പ്രസ്താവനയിൽ വ്യക്തമാക്കുന്നത്. ലോകത്തിലെ ഏറ്റവും വലിയ ക്രൂഡ് കയറ്റുമതിക്കാരായ സൗദി അറേബ്യ നിലവിൽ പ്രതിദിനം ഏകദേശം ഒമ്പത് ദശലക്ഷം ബാരൽ (ബി പി ഡി) ക്രൂഡ് ഓയിലാണ് ഉത്പാദിപ്പിക്കുന്നുത്.
തങ്ങളുടെ പരമാവധി ഉത്പാദന ശേഷിയായ 12 ദശലക്ഷം ബി പി ഡിയിലും വളരെ താഴെയാണ് നിലവിലെ ഉത്പാദനം. ജൂണിൽ ഉത്പാദനം ശരാശരി 8.8 ദശലക്ഷം ബിപിഡി ആയിരുന്നുവെന്ന് റിയാദ് ആസ്ഥാനമായുള്ള സ്ഥാപനമായ ജാദ്വ ഇൻവെസ്റ്റ്മെൻ്റും വ്യക്തമാക്കുന്നു. പെട്രോള് വില നിയന്ത്രിക്കുകയെന്ന ലക്ഷ്യത്തോടെ 2022 ഒക്ടോബർ മുതല് അരാംകോ ഉത്പാദനം വെട്ടികുറയ്ക്കാന് ആരംഭിച്ചിരുന്നു.
വില വർദ്ധിപ്പിക്കുന്നതിനായി ഉൽപ്പാദനം രണ്ട് ദശലക്ഷം ബി പി ഡി കുറയ്ക്കുമെന്നായിരുന്നു പ്രഖ്യാപനം. 2023 ഏപ്രിലിൽ, നിരവധി ഒപെക് അംഗങ്ങൾ ഒരു മില്യൺ ബി പി ഡിയിൽ കൂടുതൽ ഉൽപ്പാദനം കുറയ്ക്കുമെന്ന് പ്രഖ്യാപിച്ചു. ഇതിന് പിന്നാലെ 2023 ജൂണിൽ റിയാദ് ഒരു ദശലക്ഷം ബി പി ഡിയുടെ അധിക സ്വമേധയാ വെട്ടിക്കുറയ്ക്കല് നടത്തുമെന്നും വ്യക്തമാക്കി.
സൗദി കിരീടാവകാശി മുഹമ്മദ് ബിൻ സൽമാൻ്റെ വിഷൻ 2030 പരിഷ്കരണ അജണ്ടയുടെ പ്രധാന വരുമാന സ്രോതസ്സുമാണ് അരാംകോ.
സ്ഥാപനത്തിൻ്റെ ലാഭം, നിയോം, മരുഭൂമിയിൽ നിർമ്മിക്കുന്ന ഫ്യൂച്ചറിസ്റ്റിക് മെഗാ സിറ്റി, റിയാദിലെ വമ്പന് വിമാനത്താവളം, ടൂറിസം, വിനോദ വികസനങ്ങൾ എന്നിവയുൾപ്പെടെയുള്ള മുൻനിര പദ്ധതികൾക്ക് ധനസഹായം നൽകുന്നതും അരാംകോയുമാണ്. ലാഭം കുറഞ്ഞ സാഹചര്യത്തില് ഉത്പാദനം വെട്ടിക്കുറയ്ക്കാനുള്ള തീരുമാനത്തില് കമ്പനി മാറ്റം വരുത്തുമോയെന്നാണ് ഏവരും ഉറ്റുനോക്കുന്നത്.
നിലവിലെ ഉൽപ്പാദന നിലവാരത്തിൽ, സൗദി അറേബ്യയുടെ സാമ്പത്തിക ബ്രേക്ക്-ഇവൻ എണ്ണവില 2024 ൽ ബാരലിന് 96.2 ഡോളറായിരിക്കുമെന്ന് ഐഎംഎഫ് ഏപ്രിലിൽ വ്യക്തമാക്കിയിരുന്നു.
തിങ്കളാഴ്ചത്തെ ആഗോള ഓഹരി വിപണിയിൽ യുഎസ് മാന്ദ്യ ആശങ്ക ആഞ്ഞടിച്ചതിനെത്തുടർന്ന് അന്താരാഷ്ട്ര മാനദണ്ഡമായ ബ്രെൻ്റ് ചൊവ്വാഴ്ച ബാരലിന് 76.43 ഡോളറിലാണ് വ്യാപാരം നടക്കുന്നത്.
മാർക്കറ്റ് ക്യാപിറ്റലൈസേഷൻ പ്രകാരം ലോകത്തിലെ ഏറ്റവും വലിയ കമ്പനികളിലൊന്നായ അരാംകോയിൽ സൗദി സർക്കാരിൻ്റെ ഓഹരി 81.5 ശതമാനമാണ്.
2019-ലെ ചരിത്രത്തിലെ ഏറ്റവും വലിയ ഫ്ലോട്ടേഷനായ അരാംകോയുടെ പ്രാരംഭ പബ്ലിക് ഓഫർ 29.4 ബില്യൺ ഡോളർ സമാഹരിച്ചിരുന്നു. ഈ വർഷം ഏകദേശം 1.7 ബില്യൺ ഓഹരികളുടെ സെക്കൻഡറി ഓഫറിംഗിലൂ
െ 12.35 ബില്യൺ ഡോളറും നേടി.
നിക്ഷേപകർക്ക് അടിസ്ഥാന ലാഭവിഹിതത്തിന് പുറമേ പ്രകടനത്തെ അടിസ്ഥാനമാക്കിയുള്ള ലാഭവിഹിതം നൽകുമെന്ന് അരാംകോ കഴിഞ്ഞ വർഷം പ്രഖ്യാപിച്ചിരുന്നു. മെയ് മാസത്തിൽ, ആദ്യ പാദത്തിൽ 20.3 ബില്യൺ ഡോളറിൻ്റെ അടിസ്ഥാന ഡിവിഡൻ്റ് പേഔട്ടുകളും രണ്ടാം പാദത്തിൽ 10.8 ബില്യൺ ഡോളറിൻ്റെ പ്രകടനവുമായി ബന്ധപ്പെട്ട ഡിവിഡൻ്റ് വിതരണവും കമ്പനി പ്രഖ്യാപിച്ചു.
അരാംകോ "2024-ൽ 124.2 ബില്യൺ ഡോളർ ലാഭവിഹിതം പ്രഖ്യാപിക്കുമെന്ന് പ്രതീക്ഷിക്കുന്നു", ചൊവ്വാഴ്ച കമ്പനി പ്രസ്താവനയിലൂടെ വ്യക്തമാക്കി. "വർഷത്തിൻ്റെ ആദ്യ പകുതിയിൽ ശക്തമായ വരുമാനവും പണമൊഴുക്കുമായി ഞങ്ങൾ ഒരിക്കൽ കൂടി വിപണിയിലെ മുൻനിര പ്രകടനം നടത്തി. ആ ശക്തമായ വരുമാനം പ്രയോജനപ്പെടുത്തി, സുസ്ഥിരവും പുരോഗമനപരവുമായ അടിസ്ഥാന ലാഭവിഹിതം ഞങ്ങൾ തുടർന്നും നൽകി." കമ്പനി വ്യക്തമാക്കി.
ഉക്രെയ്നിലെ റഷ്യയുടെ അധിനിവേശത്തിന് പിന്നാലെ എണ്ണവില കുതിച്ചുയർന്നതിന് ശേഷം 2022 ൽ അരാംകോ റെക്കോർഡ് ലാഭം രേഖപ്പെടുത്തിയിരുന്നു. ഇതിലൂടെ ഏകദേശം ഒരു ദശാബ്ദത്തിനിടെ സൗദി അറേബ്യയെ അതിൻ്റെ ആദ്യത്തെ ബജറ്റ് മിച്ചം രേഖപ്പെടുത്തി. എണ്ണവിലയും ഉൽപ്പാദനം വെട്ടിക്കുറച്ചതും കാരണം കഴിഞ്ഞ വർഷം ഒരു പാദത്തിൽ കുറഞ്ഞിരുന്നു. എന്നാല് ഈ വർഷത്തെ ആദ്യ പാദത്തിലെ ലാഭം 14.5 ശതമാനം കുറഞ്ഞു.
പ്രതിദിന ഉൽപ്പാദന ശേഷി 13 ദശലക്ഷം ബാരലായി ഉയർത്താനുള്ള പദ്ധതിയുണ്ടായിരുന്നെങ്കിലും തല്ക്കാലം ഇത് ഉപേക്ഷിക്കാൻ നിർദ്ദേശം നൽകിയതായി ജനുവരിയിൽ അരാംകോ പറഞ്ഞു. ശുദ്ധമായ ഇന്ധനങ്ങളിലേക്കുള്ള പരിവർത്തനമാണ് ഇതിന് പ്രചോദനമായതെന്ന് ഊർജ മന്ത്രി അബ്ദുൽ അസീസ് ബിൻ സൽമാൻ രാജകുമാരൻ പറഞ്ഞെങ്കിലും, അപ്രതീക്ഷിതമായ പ്രഖ്യാപനം ഡിമാൻഡിലെ ആത്മവിശ്വാസക്കുറവിനെ പ്രതിഫലിപ്പിക്കുമെന്നാണ് വിശകലന വിദഗ്ധർ വ്യക്തമാക്കിയത്.
Click it and Unblock the Notifications
Sign in with Google