ഈ ഞായറാഴ്ച രാത്രി ആകാശത്തേക്ക് നോക്കാൻ മറക്കല്ലേ; വരുന്നത് മനോഹരമായ സ്നോ മൂൺ

2026 വർഷത്തിലെ രണ്ടാമത്തെ പൂർണ്ണചന്ദ്രനായ 'സ്നോ മൂൺ' ഈ ഞായറാഴ്ച യുഎഇ ആകാശത്ത് ദൃശ്യമാകും. ഫെബ്രുവരി ഒന്നിന് ഉദിച്ചുയരുന്ന ഈ ചന്ദ്രൻ ആകാശപ്രേമികൾക്കും സാധാരണക്കാർക്കും ഒരുപോലെ കൗതുകമുണർത്തുന്ന കാഴ്ചയായിരിക്കും. മനോഹരമായ ചന്ദ്രനോടൊപ്പം സൗരയൂഥത്തിലെ ഏറ്റവും വലിയ ഗ്രഹമായ വ്യാഴത്തെയും ഈ ദിവസം ചന്ദ്രന് സമീപം വളരെ വ്യക്തമായി കാണാൻ സാധിക്കുമെന്നതാണ് ഈ വർഷത്തെ പ്രത്യേകത.

എന്താണ് സ്നോ മൂൺ?
ഫെബ്രുവരി മാസത്തിലെ പൂർണ്ണചന്ദ്രനെയാണ് പരമ്പരാഗതമായി 'സ്നോ മൂൺ' എന്ന് വിളിക്കുന്നത്. വടക്കൻ അമേരിക്കയിലും യൂറോപ്പിലും ഫെബ്രുവരി മാസത്തിലാണ് ഏറ്റവും കൂടുതൽ മഞ്ഞുവീഴ്ച ഉണ്ടാകാറുള്ളത്. ഈ കാലാവസ്ഥാ പ്രത്യേകത മുൻനിർത്തിയാണ് പഴയകാലത്തെ കർഷകർ ഇതിന് 'സ്നോ മൂൺ' എന്ന പേര് നൽകിയത്. യുഎഇയിൽ മഞ്ഞുവീഴ്ച ഉണ്ടാകില്ലെങ്കിലും, ഇവിടുത്തെ തെളിഞ്ഞ ആകാശത്ത് ചന്ദ്രന്റെ ഈ പൂർണ്ണരൂപം അതീവ സുന്ദരമായി കാണാൻ സാധിക്കും.

സമയം
യുഎഇ സമയം ഫെബ്രുവരി ഒന്നിന് വൈകുന്നേരം ഏകദേശം 5:36-ഓടെ ചന്ദ്രൻ അതിന്റെ പൂർണ്ണ പ്രകാശത്തിൽ എത്തും. സൂര്യാസ്തമയ സമയത്ത് കിഴക്ക്-വടക്കുകിഴക്ക് ദിശയിൽ ചന്ദ്രൻ ഉദിച്ചുയരുകയും പിറ്റേന്ന് പുലർച്ചെ വരെ ആകാശത്ത് ദൃശ്യമാകുകയും ചെയ്യും. ഞായറാഴ്ചയാണ് ചന്ദ്രൻ പൂർണ്ണരൂപത്തിൽ എത്തുന്നതെങ്കിലും, ഇതിന് രണ്ട് ദിവസം മുൻപും ശേഷവും ചന്ദ്രനെ ഏകദേശം പൂർണ്ണരൂപത്തിൽ തന്നെ കാണാൻ സാധിക്കും.

വ്യാഴവും ചന്ദ്രനും ഒന്നിച്ച്
ഈ ഞായറാഴ്ചയിലെ മറ്റൊരു പ്രധാന ആകർഷണം വ്യാഴത്തിന്റെ സാന്നിധ്യമാണ്. ചന്ദ്രന് തൊട്ടുമുകളിലായി നക്ഷത്രത്തെപ്പോലെ തിളങ്ങുന്ന വ്യാഴത്തെ നഗ്നനേത്രങ്ങൾ കൊണ്ട് തന്നെ കാണാൻ സാധിക്കും. ലിയോ (ചിങ്ങം) രാശിക്ക് സമീപമായാണ് ചന്ദ്രന്റെ സ്ഥാനം.

കാഴ്ചക്കാർക്കുള്ള നിർദ്ദേശങ്ങൾ
സ്നോ മൂൺ ആസ്വദിക്കാൻ പ്രത്യേക ഉപകരണങ്ങളുടെയോ ടെലിസ്കോപ്പിന്റെയോ ആവശ്യമില്ല. എങ്കിലും ബൈനോക്കുലറുകൾ ഉപയോഗിക്കുന്നവർക്ക് ചന്ദ്രോപരിതലത്തിലെ ഗർത്തങ്ങളും പർവ്വതനിരകളും കൂടുതൽ വ്യക്തമായി കാണാൻ സാധിക്കും. നഗരങ്ങളിലെ വെളിച്ചത്തിൽ നിന്നും മാറി ഇരുണ്ട സ്ഥലങ്ങളിൽ നിന്ന് നോക്കിയാൽ ആകാശത്തിന്റെ വശ്യത പൂർണ്ണമായും ആസ്വദിക്കാനാകും. ചന്ദ്രൻ ചക്രവാളത്തോട് ചേർന്നുനിൽക്കുന്ന സമയത്ത് (Moonrise/Moonset) അത് സാധാരണയേക്കാൾ വലുതായി അനുഭവപ്പെടുന്നത് മികച്ച ചിത്രങ്ങൾ പകർത്താൻ ആഗ്രഹിക്കുന്നവർക്ക് വലിയ അവസരമായിരിക്കും.

2026 യുഎഇയെ സംബന്ധിച്ച് ഒട്ടേറെ ആകാശ വിസ്മയങ്ങളുടെ വർഷമാണ്. അതിൽ ആദ്യത്തെ പ്രധാന സംഭവമായാണ് ഫെബ്രുവരിയിലെ ഈ സ്നോ മൂൺ കണക്കാക്കപ്പെടുന്നത്.