ബലി പെരുന്നാളും യുഎഇ നിവാസികള്‍ക്ക് തകർക്കാം: അവധി പ്രഖ്യാപിച്ചു, എത്ര ദിവസമെന്ന് അറിയുമോ?

Updated: Saturday, April 13, 2024, 17:44 [IST]

ദുബായ്: ചെറിയ പെരുന്നാളിനോട് അനുബന്ധിച്ച് ഒരാഴ്ചയോളം നീണ്ടു നിന്ന അവധിയാണ് യു എ ഇ നിവാസികള്‍ക്ക് ലഭിച്ചത്. ചെറിയ പെരുന്നാള്‍ കഴിഞ്ഞതിന് പിന്നാലെ ബലി പെരുന്നാളിനുള്ള അവധിയും യു എ ഇ അധികൃതർ പ്രഖ്യാപിച്ചിരിക്കുകയാണ്. ജൂണ്‍ 17 തിങ്കളാഴ്ചയായിരിക്കും ബലി പെരുന്നാളെന്നാണ് കണക്ക് കൂട്ടുന്നത്. ബലി പെരുന്നാള്‍ സമയത്ത് കുറഞ്ഞത് അഞ്ച് ദിവസമെങ്കിലും നീണ്ട അവധി ദിനങ്ങള്‍ യു എ ഇ നിവാസികള്‍ക്ക് ലഭിച്ചേക്കും.

ഹജ്ജ് തീർത്ഥാടനത്തിൻ്റെ പ്രധാന ചടങ്ങായ അറഫ ദിനം ജൂൺ 16 ഞായറാഴ്ച ആയിരിക്കുമെന്നാണ് എമിറേറ്റ്സ് അസ്ട്രോണമിക്കൽ സൊസൈറ്റി അറിയിക്കുന്നത്. ഈദ് അൽ അദ്ഹ (ബലി പെരുന്നാള്‍) ജൂൺ 17 നും അറഫ ദിനം 16 ആയിരിക്കുമെന്ന് ജ്യോതിശാസ്ത്ര കണക്കുകൂട്ടലുകൾ സൂചിപ്പിക്കുന്നുവെന്ന് എമിറേറ്റ്സ് അസ്ട്രോണമിക്കൽ സൊസൈറ്റി ഡയറക്ടർ ബോർഡ് ചെയർമാൻ ഇബ്രാഹിം അൽ ജർവാനെ ഉദ്ധരിച്ച് ഗള്‍ഫ് ടൈംസ് റിപ്പോർട്ട് ചെയ്യുന്നു.

അറഫാ ദിനത്തോടനുബന്ധിച്ച് ജൂൺ 16 മുതൽ ജൂൺ 19 വരെ നാല് ദിവസത്തെ പൊതു അവധിയും ബലി പെരുന്നാളിന് പ്രത്യേക അവധിയും യുഎഇ മന്ത്രിസഭ അംഗീകരിച്ചിട്ടുണ്ട്. ഈ ദിനങ്ങള്‍ ഇസ്ലാമിക കലണ്ടർ പ്രകാരം ഏറ്റവും വിശുദ്ധവും ആദരണീയവുമായ ഒന്നാണ്. പ്രത്യേക പ്രാർത്ഥനകൾ, വിരുന്നുകൾ, ജീവകാരുണ്യ പ്രവർത്തനങ്ങൾ എന്നിവയോടെ വിശ്വാസികള്‍ ഈ ദിവസങ്ങള്‍ ആചരിക്കുന്നു.

അതേസമയം, ചെറിയ പെരുന്നാളിനോട് അനുബന്ധിച്ച് ഒമ്പത് ദിവസത്തോളം നീണ്ട് നില്‍ക്കുന്ന അവധിയായിരുന്നു യു എ ഇയിലെ പൊതുമേഖല സ്ഥാപനങ്ങളിലെ ജീവനക്കാർക്ക് ലഭിച്ചത്. ഏപ്രിൽ 8 തിങ്കളാഴ്ച മുതൽ ഏപ്രിൽ 14 ഞായറാഴ്ച വരെയാണ് യു എ ഇ അവധി പ്രഖ്യാപിച്ചിരിക്കുന്നത്. ശനിയും ഞായറും യുഎഇയിൽ ഔദ്യോഗിക വാരാന്ത്യ ദിനങ്ങളായതിനാലാണ് ചെറിയ പെരുന്നാള്‍ ആഘോഷിക്കാൻ ഫെഡറൽ ഗവൺമെൻ്റ് ജീവനക്കാർക്ക് 9 ദിവസത്തെ അവധി ലഭിച്ചത്.

പെരുന്നാള്‍ മാസപ്പിറവി കണ്ടാലും ഇല്ലെങ്കിലും അവധി ഔദ്യോഗികമായി ഏപ്രിൽ 8 ന് ആരംഭിക്കുമെന്ന് നേരത്തെ തന്നെ സർക്കാർ വ്യക്തമാക്കുകയായിരുന്നു. സ്വകാര്യ മേഖലയിലെ കമ്പനികളും മൂന്നും നാലും ദിവസം നീണ്ടുനില്‍ക്കുന്ന ശമ്പളത്തോട് കൂടിയുള്ള അവധി പ്രഖ്യാപിച്ചിരുന്നു. പെരുന്നാള്‍ അവധിയോടൊപ്പം തന്നെ റമദാന്‍ മാസത്തില്‍ ജോലി സമയം വെട്ടിക്കുറച്ചുകൊണ്ടുള്ള പ്രഖ്യാപനവും യു എ ഇ സർക്കാർ പുറപ്പെടുവിച്ചിരുന്നു.