യുഎഇയുടെ വന് പ്രഖ്യാപനം; ഒറ്റ വര്ഷം കൊണ്ട് ചിത്രം മാറും, ക്രൂഡില് പ്രതീക്ഷയോടെ ഇന്ത്യ
ക്രൂഡ് ഓയില് ഉല്പ്പാദനത്തില് വന് പ്രഖ്യാപനവമായി യുഎഇ. രണ്ടാം പൈപ്പ് ലൈന് നിര്മാണം പകുതി പിന്നിട്ടു എന്ന് അഡ്നോക് സിഇഒ സുല്ത്താന് അഹമ്മദ് അല് ജാബിര്. അടുത്ത വര്ഷം പൈപ്പ് ലൈന് പ്രവര്ത്തന സജ്ജമാകും. ഇതോടെ യുഎഇയുടെ എണ്ണ കയറ്റുമതിയുടെ അളവ് കുത്തനെ വര്ധിക്കും. യുഎഇയുമായി സൗഹൃദം കാത്തുസൂക്ഷിക്കുന്ന ഇന്ത്യയ്ക്ക് ഇത് നേട്ടമാകുമെന്നാണ് കരുതുന്നത്.
അറ്റ്ലാന്റിക് കൗണ്സിലില് സംസാരിക്കുന്ന വേളയിലാണ് അഡ്നോക് സിഇഒ യുഎഇയുടെ പുതിയ പദ്ധതി എവിടെ എത്തി നില്ക്കുന്നു എന്ന് വിശദീകരിച്ചത്. ഫുജൈറ തുറമുഖം വഴിയുള്ള എണ്ണ-വാതകം കയറ്റുമതി ശക്തിപ്പെടുത്താന് സഹായിക്കുന്നതാണ് പുതിയ പൈപ്പ് ലൈന്. ഇത് പ്രവര്ത്തനം തുടങ്ങുന്നതോടെ ഹോര്മുസ് കടലിടുക്ക് അടയ്ക്കുന്നത് യുഎഇയെ ബാധിക്കില്ല.
അമേരിക്കയും ഇസ്രായേലും ആക്രമിച്ചതില് പ്രതിഷേധിച്ചാണ് ഇറാന് ഹോര്മുസ് പാത അടച്ചത്. ലോകത്തെ 20 ശതമനം കടല് ചരക്കുകള് കടന്നുപോയിരുന്നത് ഹോര്മുസിലൂടെ ആയിരുന്നു. മാര്ച്ച് ഒന്നിന് ഇറാന് ഈ പാത അടച്ചതോടെ ജിസിസി രാജ്യങ്ങളുടെ മൊത്തം കയറ്റുമതി സ്തംഭിച്ചു. ഈ വേളയിലാണ് യുഎഇ ബദല്മാര്ഗം കാണുന്നത് വേഗത്തിലാക്കിയത്.
നിലവില് യുഎഇയില് ഒരു എണ്ണ പൈപ്പ് ലൈന് പ്രവര്ത്തിക്കുന്നുണ്ട്. അബ്ഷാനില് നിന്ന് ഫുജൈറ തുറമുഖത്തേക്കാണ് ഈ പൈപ്പ് ലൈന്. എന്നാല് 18 ലക്ഷം ബാരല് വരെ കയറ്റുമതിയേ ഇതുവഴി സാധിക്കുന്നുള്ളൂ. ഈ പശ്ചാത്തലത്തിലാണ് പുതിയ പൈപ്പ് ലൈന് കൂടി ഒരുക്കുന്നത്. ഇവ യാഥാര്ഥ്യമായാല് നിലവിലുള്ളതിനേക്കാള് ഇരട്ടിയാകും കയറ്റുമതി.
എന്തുകൊണ്ടാണ് ഇന്ത്യയ്ക്ക് നേട്ടമാകുന്നത്
ഒമാന് ഉള്ക്കടലിനോട് ചേര്ന്നാണ് ഫുജൈറ തുറമുഖം. ഇവിടെ നിന്ന് പുറപ്പെടുന്ന കപ്പലുകള്ക്ക് ഹോര്മുസ് കടക്കാതെ തന്നെ അറബിക്കടലിലേക്കും ദക്ഷിണ ഏഷ്യയിലെ എല്ലാ രാജ്യങ്ങളിലേക്കും സഞ്ചരിക്കാന് സാധിക്കും. അതുകൊണ്ടാണ് ഫുജൈറയിലേക്ക് പൈപ്പ് ലൈന് സ്ഥാപിച്ച് തുറമുഖത്ത് എണ്ണ എത്തിക്കുന്നത്. നിലവില് ഹോര്മുസ് പാത ഇറാന് തുറന്നാലും ആറ് മാസം കഴിയും എണ്ണ കയറ്റുമതി പഴയ പോലെ എത്താന് എന്ന് സുല്ത്താന് ജാബിര് പറഞ്ഞു.
ഇന്ത്യയുമായി കൂടുതല് അടുക്കുകയാണ് യുഎഇ. പ്രധാനമന്ത്രി നരേന്ദ്ര മോദി യൂറോപ്യന് യാത്രയ്ക്കിടെ യുഎഇയില് ഇറങ്ങിയതും സുപ്രധാന ചര്ച്ചകള് നടത്തിയതും ഇതിന്റെ സൂചനയാണ്. മാത്രമല്ല, യുഎഇ പ്രസിഡന്റ് അടുത്തിടെ ഇന്ത്യ സന്ദര്ശിക്കുകയും ചെയ്തിരുന്നു. ഒപെക് എണ്ണ കൂട്ടായ്മയില് നിന്ന് യുഎഇ രാജിവച്ചതും ഇന്ത്യയ്ക്ക് പ്രതീക്ഷ നല്കുന്നതാണ്. ഇനി ക്വാട്ടയുടെ പരിധിയില്ലാതെ യുഎഇക്ക് എണ്ണ കയറ്റുമതി ചെയ്യാം.
സൗദി അറേബ്യയും യുഎഇയും തമ്മിലുള്ള അസ്വാരസ്യം ശക്തമായതും ഒരുതരത്തില് ഇന്ത്യയ്ക്ക് നേട്ടമായിട്ടുണ്ട്. സൗദി പാകിസ്താനുമായി കൂടുതല് അടുത്തപ്പോള് യുഎഇ ഇന്ത്യയുമായിട്ടാണ് അടുത്തത്. സൗദിയും പാകിസ്താനും പ്രതിരോധ കരാറില് ഒപ്പുവച്ച പിന്നാലെ ഇന്ത്യയും യുഎഇയും പ്രതിരോധ കരാറില് ഒപ്പുവച്ചു. ഇന്ത്യയും യുഎഇയും തമ്മില് സ്വതന്ത്ര്യ വ്യാപാര കരാര് നിലവിലുണ്ട് എന്നതും നേട്ടമാണ്.
Click it and Unblock the Notifications
Sign in with Google