ഗോള്ഡന് വിസക്കും മേലെ: പുതിയ 'ബ്ലൂ' വിസയുമായി യുഎഇ, പരിസ്ഥിതി സ്നേഹിയെങ്കില് നിങ്ങള്ക്കും കിട്ടും
അബുദാബി: പരിസ്ഥിതി സംരക്ഷകർക്കായി 10 വർഷത്തെ ബ്ലൂ റെസിഡൻസി വിസ പ്രഖ്യാപിച്ച് യു എ ഇ. പരിസ്ഥിതി സംരക്ഷണത്തിന് അസാധാരണമായ പരിശ്രമങ്ങളും സംഭാവനകളും നൽകിയ വ്യക്തികൾക്കായിരിക്കും ഈ വിസകള് നല്കുക. അബുദാബിയിലെ കാസർ അൽ വതാനിൽ ചേർന്ന മന്ത്രിസഭാ യോഗത്തിൽ അധ്യക്ഷത വഹിച്ച യുഎഇ വൈസ് പ്രസിഡൻ്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂമാണ് പുതിയ വിസക്ക് അംഗീകാരം നല്കിയിരിക്കുന്നത്.
2024 സുസ്ഥിരതയുടെ വർഷമായി പ്രഖ്യാപിച്ച പ്രസിഡൻറ് ഹിസ് ഹൈനസ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ്റെ നിർദേശങ്ങൾ നടപ്പാക്കുന്നതിൻ്റെ ഭാഗമായാണ് പുതിയ വിസ പ്രഖ്യാപനമെന്നും അദ്ദേഹം പറഞ്ഞു. സാമ്പത്തിക സുസ്ഥിരത പോലെ തന്നെ തുല്യ പ്രാധാന്യമുള്ളതാണ് പാരിസ്ഥിതിക സുസ്ഥിരത. നിലവിൽ അതുല്യ സംഭാവനകൾ നൽകിയ വിദ്യാർഥികൾ ഉൾപ്പടെയുള്ള പ്രതിഭകൾക്ക് ഗോൾഡൻ വിസ യുഎഇ നൽകുന്നുണ്ട്. ഇതിന് പുറമേയാണ് ബ്ലൂ വിസ കൂടി പ്രഖ്യാപിച്ചിരിക്കുന്നത്.
നമ്മുടെ സമ്പദ്വ്യവസ്ഥയുടെ സുസ്ഥിരത നമ്മുടെ പരിസ്ഥിതിയുടെ സുസ്ഥിരതയുമായി ബന്ധപ്പെട്ടിരിക്കുന്നുവെന്നും ഈ മേഖലയിലെ നമ്മുടെ കാഴ്ചപ്പാടുകള് വ്യക്തവും സ്ഥിരതയുള്ളതുമാണെന്നും ഷെയ്ഖ് മുഹമ്മദ് പറഞ്ഞു. യുവജനങ്ങളെ സാമ്പത്തികമായി ശാക്തീകരിക്കുക, അവരുടെ ശാസ്ത്രീയ കഴിവുകൾ വികസിപ്പിക്കുക, ദേശീയ വ്യക്തിത്വം ശക്തിപ്പെടുത്തുക, കമ്മ്യൂണിറ്റി സംഭാവനകൾ വർധിപ്പിക്കുക, അവരുടെ രാജ്യത്തെ പ്രതിനിധീകരിക്കുന്നതിൽ അവരുടെ പങ്ക് സജീവമാക്കുക എന്നതാണ് യുഎഇ ലക്ഷ്യമിടുന്നത്.
എഐ പിന്തുണ ഉറപ്പ് വരുത്തുന്നതിനായി എല്ലാ പ്രധാന ഫെഡറൽ സ്ഥാപനങ്ങളിലും ആർട്ടിഫിഷ്യൽ ഇൻ്റലിജൻസ് (എഐ) സിഇഒ തസ്തിക ഏർപ്പെടുത്തുന്നതിന് കാബിനറ്റ് അംഗീകാരം നൽകി. "ആർട്ടിഫിഷ്യൽ ഇൻ്റലിജൻസ് മേഖലയിൽ യു എ ഇ യുടെ സ്ഥാനം ഉറപ്പിക്കുന്നതിനുള്ള തന്ത്രത്തിൻ്റെ ഭാഗമായി, എല്ലാ പ്രധാന ഫെഡറൽ സ്ഥാപനങ്ങളിലും ആർട്ടിഫിഷ്യൽ ഇൻ്റലിജൻസ് റോൾ സിഇഒ അവതരിപ്പിക്കുന്നതിന് ഇന്ന് ഞങ്ങൾ അംഗീകാരം നൽകി," വൈസ് പ്രസിഡൻ്റ് പറഞ്ഞു.
രാജ്യത്തുടനീളമുള്ള ഉന്നത വിദ്യാഭ്യാസ സ്ഥാപനങ്ങളെ തരംതിരിക്കുന്നതിനുള്ള പുതിയ ചട്ടക്കൂടിനും മന്ത്രിസഭ അംഗീകാരം നൽകി. വരാനിരിക്കുന്ന ദേശീയ റാങ്കിംഗ് 70-ലധികം ഉന്നത വിദ്യാഭ്യാസ സ്ഥാപനങ്ങളെ അവരുടെ വിദ്യാഭ്യാസത്തിൻ്റെ ഗുണനിലവാരം, അവരുടെ ബിരുദധാരികളുടെ തൊഴിൽക്ഷമത, അവരുടെ ശാസ്ത്ര ഗവേഷണത്തിൻ്റെ ശക്തി, അന്താരാഷ്ട്ര ശാസ്ത്ര സ്ഥാപനങ്ങളുമായുള്ള അവരുടെ സഹകരണം എന്നിവയെ അടിസ്ഥാനമാക്കി വിലയിരുത്തും.
'സർവ്വകലാശാലാ റാങ്കിംഗിൻ്റെ ആരംഭം നമ്മുടെ ഉന്നത വിദ്യാഭ്യാസ സമ്പ്രദായത്തിൻ്റെ നിലവാരം ഉയർത്തുന്നതിലും സുതാര്യത വളർത്തുന്നതിലും ഒരു സുപ്രധാന മുന്നേറ്റമായി അടയാളപ്പെടുത്തുന്നു. കുട്ടികൾക്ക് ഏറ്റവും അനുയോജ്യവും മാതൃകാപരവുമായ വിദ്യാഭ്യാസ വഴികൾ തിരഞ്ഞെടുക്കാൻ ഇത് കുടുംബങ്ങളെ പ്രാപ്തരാക്കുന്നു, "ശൈഖ് മുഹമ്മദ് കൂട്ടിച്ചേർത്തു.
Click it and Unblock the Notifications
Sign in with Google