അബുദാബി-ഫുജൈറ ട്രെയിന് ജൂണ് 30 മുതല്; ടിക്കറ്റ് നിരക്ക് 55 ദിര്ഹം, ഒന്നേ മുക്കാല് മണിക്കൂര് മതി
യുഎഇ ഗതാഗത രംഗത്ത് വൻ വിപ്ലവത്തിന് വഴിതുറന്നു ഇത്തിഹാദ് റെയിൽവേ ആദ്യ ഘട്ട പാസഞ്ചർ ട്രെയിൻ സർവീസിന്റെ തീയതി പ്രഖ്യാപിച്ചു. ജൂൺ 30 മുതൽ അബുദാബിക്കും ഫുജൈറയ്ക്കും ഇടയിലുള്ള ആദ്യ പാസഞ്ചർ യാത്രാ ട്രെയിൻ സർവീസ് ആരംഭിക്കും. യുഎഇയിലെ വിവിധ എമിറേറ്റുകളെയും നഗരങ്ങളെയും തമ്മിൽ പരസ്പരം ബന്ധിപ്പിക്കുന്ന ഈ റെയിൽ ശൃംഖലയുടെ ഔദ്യോഗിക ലോഞ്ച് സെപ്റ്റംബർ 30-നാണ്.
അബുദാബിയിലെ മുഹമ്മദ് ബിൻ സായിദ് സിറ്റിയിൽ പുതുതായി നിർമിച്ച അത്യാധുനിക പാസഞ്ചർ റെയിൽവേ സ്റ്റേഷൻ ഉദ്ഘാടനം ചെയ്തു അബുദാബി കിരീടാവകാശിയും അബുദാബി എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാനാണ് പ്രഖ്യാപനം നടത്തിയത്. ഈ പാത യാഥാർത്ഥ്യമാകുന്നതോടെ യുഎഇയിലെ ലക്ഷക്കണക്കിന് പ്രവാസികൾക്കും സ്വദേശികൾക്കും യാത്രാക്ലേശം ഇല്ലാതെ സഞ്ചരിക്കാനാകും.
യുഎഇയുടെ സമ്പദ് വ്യവസ്ഥയ്ക്കും ടൂറിസം മേഖലയ്ക്കും ഈ പുതിയ സംരംഭം ഊർജ്ജം പകരുമെന്നാണ് പ്രതീക്ഷിക്കുന്നത്. പുതിയ റൂട്ടിൽ സാധാരണക്കാർക്ക് താങ്ങാവുന്ന നിരക്കാണ് നിശ്ചയിച്ചിരിക്കുന്നത്. അബുദാബി - ഫുജൈറ യാത്രയ്ക്ക് കംഫർട്ട് ക്ലാസിൽ 55 ദിർഹവും പ്രീമിയം ക്ലാസിൽ 120 ദിർഹവുമായിരിക്കും ടിക്കറ്റ് നിരക്ക്. ഇത്തിഹാദ് റെയിലിന്റെ ഔദ്യോഗിക വെബ്സൈറ്റ് വഴിയും മൊബൈൽ ആപ്പ് വഴിയും ജൂൺ 23 മുതൽ ടിക്കറ്റുകൾ ബുക്ക് ചെയ്യാം.
ആകെ 13 ട്രെയിനുകളാണ് ഈ സർവീസുകൾക്കായി ഉപയോഗിക്കുന്നത്. ഒരു ട്രെയിനിൽ ഒരേസമയം 400 യാത്രക്കാർക്ക് വരെ യാത്ര ചെയ്യാം. അബുദാബിയിൽ നിന്ന് ഫുജൈറയിലേക്കുള്ള ദൂരം വെറും 1 മണിക്കൂറും 45 മിനിറ്റും ആയിരിക്കും. സാധാരണയായി റോഡ് മാർഗ്ഗം യാത്ര ചെയ്യുന്നതിനേക്കാൾ വലിയ സമയലാഭമാണിത്.
സെപ്റ്റംബർ 30ന് വരുന്ന മാറ്റം ഇതാണ്
ആദ്യ ഘട്ട സർവീസിന് പിന്നാലെ സെപ്റ്റംബർ 30-ഓടെ ദുബായ്, അൽ ദൈദ് എന്നീ സ്റ്റേഷനുകൾ ഔദ്യോഗികമായി തുറന്നുനൽകും. ഇത് യുഎഇയിലെ പ്രധാന നഗരങ്ങളെ തമ്മിൽ ബന്ധിപ്പിക്കാൻ സഹായിക്കും. അൽ ദഫ്ര മേഖലയിലെ വിവിധ സ്റ്റേഷനുകൾ ഡിസംബർ 30 മുതൽ തുറന്നുകൊടുക്കും. ഇതോടെ കൂടുതൽ ഗ്രാമീണ മേഖലകളിലേക്കും ശൃംഖലയുടെ സേവനം വേഗത്തിൽ ലഭ്യമാകും. 2027 മാർച്ച് 30-ഓടെ പാസഞ്ചർ ട്രെയിൻ ഷാർജ സ്റ്റേഷനിലേക്ക് നീട്ടും.
യുഎഇ രൂപീകൃതമായതിന്റെ അമ്പതാം വാർഷികത്തോടനുബന്ധിച്ച് രാജ്യത്തുണ്ടായ വലിയ വികസന പദ്ധതികളുടെ ഭാഗമായാണ് നാഷണൽ റെയിൽവേ പ്രോഗ്രാം വിഭാവനം ചെയ്തത്. വെറും അഞ്ച് വർഷത്തിൽ താഴെ മാത്രം വരുന്ന കുറഞ്ഞ കാലയളവിനുള്ളിലാണ് പദ്ധതി ഈ സുവർണ്ണ ഘട്ടത്തിലേക്ക് എത്തിയത്.
ട്രെയിനുകൾക്കുള്ളിലും യാത്രക്കാർക്കായി പ്രത്യേക ഭക്ഷണ സൗകര്യങ്ങൾ ഉണ്ടാകും. കോർപ്പറേറ്റ് ജീവനക്കാർക്കും ടൂറിസ്റ്റുകൾക്കും ഒരേപോലെ അനുയോജ്യമായ രീതിയിലാണ് ഇതിന്റെ പുതിയ സമയക്രമം. വരും വർഷങ്ങളിൽ ഗൾഫ് രാജ്യങ്ങളെ പരസ്പരം ബന്ധിപ്പിക്കുന്ന ജിസിസി റെയിൽവേ ശൃംഖലയുടെ കൂടി പ്രധാന ഭാഗമായി മാറാൻ ഇത്തിഹാദ് റെയിൽവേയ്ക്ക് സാധിക്കുമെന്നാണ് റിപ്പോർട്ടുകൾ.
Click it and Unblock the Notifications
Sign in with Google