യുഎഇയിലെ മാനുകളുടെ പിതാവും, കൂടാരത്തിന്റെ തലപ്പും ഏത്: അറിയാം ഏഴ് എമിറേറ്റുകളുടേയും പേര് വന്ന വഴി

Updated: Sunday, August 17, 2025, 16:13 [IST]

1971ൽ അബുദാബിയുടെ ഭരണാധികാരിയായിരുന്ന ഷെയ്ഖ് സായിദ് ബിൻ സുൽത്താൻ അൽ നാഹ്യാന്റെ നേതൃത്വത്തിൽ 6 എമിറേറ്റുകൾ ചേർന്നാണ് യു എ ഇ അഥാവ് യുണൈറ്റഡ് അറബ് എമിറേറ്റ്സ് സ്ഥാപിക്കുന്നത്. അബുദാബി, ദുബൈ, ഷാർജ്ജ, ഫുജൈറ, അജ്‌മാൻ, ഉമ്മുൽ ഖുവൈൻ തുടങ്ങിയ ആറ് എമിറേറ്റുകളാണ് തുടക്കത്തില്‍ ഫെഡറേഷന്റെ ഭാഗമായിരുന്നതെങ്കില്‍ ഒരു വർഷത്തിനു ശേഷം ഏഴാമത്തെ എമിറേറ്റായ റാസ് അൽ ഖൈമയും യു എ ഇയുടെ ഭാഗമായി.

ഒന്നിച്ച് നിന്നതോടെ ഇന്ന് ലോകത്തെ പ്രധാന സാമ്പത്തിക ശക്തിയായി മാറാന്‍ യുഎഇക്ക് സാധിച്ചു. ഓരോ എമിറേറ്റിന് എങ്ങനെ ആ പേര് വന്നു എന്നതിനും രസകരമായ കഥകളുണ്ട്. പലതും ഔദ്യോഗികമായി രേഖപ്പെടുത്തിയിട്ടില്ലെങ്കിലും പ്രാദേശിക പാരമ്പര്യങ്ങളും ചരിത്രവും ചേർന്നാണ് ആ പേരുകള്‍ രൂപം കൊണ്ടിരിക്കുന്നത്. അത്തരത്തില്‍ യുഎഇയിലെ ഏഴ് എമിറേറ്റുകളുടെ പേര് പിന്നിലെ കഥകൾ ഇതാ..

അബുദാബി: മാനുകളുടെ പിതാവ്

അബുദാബി എന്ന പേരിന്റെ അർത്ഥം 'മാനുകളുടെ പിതാവ്' എന്നാണ്. ഈ പ്രദേശത്ത് സമൃദ്ധമായിട്ടുള്ള മാനുകള്‍ എങ്ങനെ നഗരത്തിന്റെ രൂപീകരണത്തിന് കാരണമായെന്ന ഒരു നാടോടി കഥയിൽ നിന്നുമാണ് ഈ കഥ ഉത്ഭവിച്ചതെന്ന് വിശ്വസിക്കപ്പെടുന്നു. മരുഭൂമിയിലൂടെ സഞ്ചരിക്കുകയായിരുന്നു ഗ്രോത്രവിഭാഗക്കാർ ഒരു മാനിനെ പിന്തുടർന്ന് ദ്വീപിലെ ശുദ്ധജല സ്രോതസ്സിലേക്ക് എത്തുകയായിരുന്നു. അവർ പിന്നീട് അവിടെ താമസിക്കാന്‍ തുടങ്ങിയതോടെയാണ് നഗരം ജന്മം എടുക്കുന്നത്. "അബു" എന്നാൽ അറബിയില്‍ "പിതാവ്" എന്നും "ധാബി" എന്നത് മാനിനേയുമാണ് സൂചിപ്പിക്കുന്നത്.

ദുബായ്: ഒഴുക്ക്

'വിസിറ്റ് ദുബായ്' ഉദ്ധരിക്കുന്ന ചരിത്ര രേഖകൾ പ്രകാരം, 1095-ലെ ഒരു ഭൂമിശാസ്ത്ര ഗ്രന്ഥത്തിൽ ദുബായ് എന്ന പേര് ആദ്യമായി പരാമർശിക്കപ്പെട്ടു. പിന്നീട് മുത്ത് വ്യാപാര രേഖകളിൽ 'ദിബേ' എന്നും, ബ്രിട്ടീഷ് ചരിത്ര രേഖകളിൽ 'അൽ വാസൽ' എന്നും ദുബായ് വിശേഷിപ്പിക്കപ്പെട്ടു. 'ദബ' (daba) എന്ന അറബി പദത്തിൽ നിന്നാണ് പേര് വന്നതെന്നാണ് മറ്റൊരു സിദ്ധാന്തം 'നീങ്ങുക' അല്ലെങ്കിൽ 'പതുക്കെ ഒഴുകുക' എന്നാണ് ദിബേ എന്ന വാക്കിന്റെ അർത്ഥം. ഈ പ്രദേശത്ത് ഒരുകാലത്ത് പ്രവർത്തിച്ചിരുന്ന ഒരു പഴയ സൂഖുമായി പേര് ബന്ധപ്പെട്ടിരിക്കുന്നുവെന്നും ചിലർ പറയുന്നു.

ഷാർജ: ഉദയത്തിന്റെ നാട്

ഷാർജയുടെ പേര് അറബി ത്രിമൂർത്തി അക്ഷരങ്ങളായ 'ഷിൻ-റാ-ഖാഫ്' (shin-ra-qaf) എന്നിവയിൽ നിന്നാണ് ഉരുത്തിരിഞ്ഞത്, ഇതിന് 'കിഴക്ക്', 'സൂര്യോദയം', 'ഉയർച്ച' എന്നിവയുമായി ബന്ധപ്പെട്ട അർത്ഥങ്ങൾ ഉണ്ട്. പലപ്പോഴും 'കിഴക്കൻ' സ്ഥലവുമായി ബന്ധപ്പെടുത്തി വിശദീകരിക്കപ്പെടുമെങ്കിലും, ഔദ്യോഗിക ഉറവിടങ്ങളും പ്രാദേശിക റിപ്പോർട്ടുകളും ഷാർജയെ സംസ്കാരത്തിന്റെയും പ്രചോദനത്തിന്റെയും കേന്ദ്രമായി വിശേഷിപ്പിക്കുന്നു. യുഎഇയുടെ സാംസ്കാരിക തലസ്ഥാനമായി വിശേഷിപ്പിക്കപ്പെടുന്ന ഷാർജ, കല, വിദ്യാഭ്യാസം, പൈതൃകം എന്നിവയുടെ കേന്ദ്രമാണ്.

അജ്മാൻ: വിദേശ വ്യാപാരികളുടെ നാട്

അജ്മാന്റെ പേര് 'അജം' എന്ന അറബി പദത്തിൽ നിന്നാണ് വന്നത്, ഇത് ചരിത്രപരമായി 'വിദേശികൾ' അല്ലെങ്കിൽ 'വ്യക്തമല്ലാത്ത ഭാഷ' സംസാരിക്കുന്നവരെ, പ്രത്യേകിച്ച് അറബികളല്ലാതവരെ സൂചിപ്പിക്കാൻ ഉപയോഗിക്കുന്നു. 2005-ൽ 'അൽ ബയാൻ' പത്രത്തിൽ അജ്മാൻ മ്യൂസിയത്തിന്റെ മുൻ ഡയറക്ടർ അലി അൽ മത്രൂഷി എഴുതിയ ഒരു ലേഖനത്തിൽ, അജ്മാന്റെ തുറമുഖങ്ങളിൽ ഒരുകാലത്ത് താമസിച്ചിരുന്ന 'പേർഷ്യൻ വ്യാപാരികളെ' പരാമർശിച്ചാണ് ഈ പേര് ഉണ്ടായതെന്നാണ് പറയുന്നത്. 'അജം' എന്ന പദത്തിന്റെ ആധുനിക ഉപയോഗം പരിണമിച്ചെങ്കിലും, എമിറേറ്റിന്റെ പേര് അതിന്റെ ആദ്യകാല കുടിയേറ്റ കാലഘട്ടത്തെ പ്രതിഫലിപ്പിക്കുന്നു.

റാസ് അൽ ഖൈമ: കൂടാരത്തിന്റെ തലപ്പ്

'റാസ് അൽ ഖൈമ' എന്നാൽ ക്ലാസിക്കൽ അറബിയിൽ 'കൂടാരത്തിന്റെ തലപ്പ്' എന്നാണ് അർത്ഥം. യുഎഇയുടെ കൂടാരാകൃതിയിലുള്ള ഭൂമിശാസ്ത്രത്തിന്റെ വടക്കൻ ഭാഗമായി ഈ എമിറേറ്റിന്റെ സ്ഥാനം പേര് സൂചിപ്പിക്കുന്നുവെന്നാണ് ഒരു വ്യാഖ്യാനം. എന്നാൽ, ചരിത്രകാരന്മാർ പറയുന്നത്, 'റാസ്' എന്നത് എമിറേറ്റിന്റെ ഉപദ്വീപിനെ സൂചിപ്പിക്കുമ്പോൾ, 'ഖൈമ' (കൂടാരം) എന്നത് കടലിനും ക്രീക്കിനും ഇടയിലുള്ള ഈന്തപ്പനയോല കൊണ്ടുള്ള വീടുകളെ സൂചിപ്പിക്കുന്നു എന്നാണ്.

ഉമ്മുൽ ഖുവൈൻ: രണ്ട് ശക്തികളുടെ അമ്മ

യുഎഇ മിനിസ്ട്രി ഓഫ് ഇക്കണോമി ആൻഡ് ടൂറിസം അനുസരിച്ച്, ഉമ്മുൽ ഖുവൈന്റെ പേര് 'രണ്ട് ശക്തികൾ' എന്ന ഒരു പദത്തിൽ നിന്നാണ് വന്നത്, ഇത് കരയിലും കടലിലും ഈ എമിറേറ്റിന്റെ ആധിപത്യത്തെ സൂചിപ്പിക്കുന്നു. ഈ പേര് ഭൂമിശാസ്ത്രവുമായും യോജിക്കുന്നു. കാരണം ഈ എമിറേറ്റിലാണ് പുരാതന പുരാവസ്തു സൈറ്റുകളും യുഎഇയിലെ ഏറ്റവും വലിയ ദ്വീപുകളിലൊന്നായ അൽ സിന്നിയ ദ്വീപും ഉള്ളത്. ഇത് കുടിയേറ്റ പക്ഷികൾക്ക് ശൈത്യകാലത്ത് ഒരു പ്രകൃതി സംരക്ഷണ കേന്ദ്രവുമാണ്.

ഫുജൈറ: ജലധാരകളുടെ നാട്

ഫുജൈറയുടെ പേര് ഔദ്യോഗികമായി രേഖപ്പെടുത്തിയിട്ടില്ല, എന്നാൽ അൽ മത്രൂഷിയുടെ അഭിപ്രായത്തിൽ, 'മഫ്ജർ' അല്ലെങ്കിൽ 'ഫജ്റ' എന്ന പദങ്ങളുമായി ബന്ധപ്പെട്ടാണ് ഈ പേര്. ഇതിന്റെ അർത്ഥം 'പർവതങ്ങളിൽ നിന്ന് ഒഴുകുന്ന ജലധാര' എന്നാണ്. ഒമാൻ ഉൾക്കടലിൽ മാത്രം തീരപ്രദേശമുള്ള യുഎഇയിലെ ഏക എമിറേറ്റ് എന്ന നിലയിൽ, ഈ പേര് ഫുജൈറയുടെ ഭൂമിശാസ്ത്രപരമായ പ്രത്യേകതയുമായി യോജിക്കുന്നു.