ഗൾഫിൽ നിന്ന് നാട്ടിലേക്ക് പോകാൻ ലക്ഷങ്ങൾ വേണോ? ടിക്കറ്റ് നിരക്ക് കുതിക്കുന്നു

യുഎഇയിൽ റമസാൻ വ്രതാരംഭവും സ്കൂൾ അവധിയും ചെറിയ പെരുന്നാളും ഒത്തുചേരുന്ന സീസണിൽ വിമാനക്കമ്പനികൾ നിരക്ക് കുത്തനെ കൂട്ടി പ്രവാസികളെ വലയ്ക്കുന്നു. യുഎഇയിൽ നിന്ന് കേരളത്തിലേക്കും തിരിച്ചുമുള്ള വിമാന ടിക്കറ്റുകൾക്ക് ഇത്തവണ വലിയ തുകയാണ് ഈടാക്കുന്നത്. ഫെബ്രുവരി മാസത്തിൽ 350 ദിർഹത്തിന് വരെ ലഭ്യമായിരുന്ന വൺ-വേ ടിക്കറ്റുകൾക്ക് മാർച്ച് പകുതിയോടെ 1,000 ദിർഹത്തിന് മുകളിലാണ് നിരക്ക്.

ആകാശക്കൊള്ളയുടെ കണക്കുകൾ

കഴിഞ്ഞ വർഷത്തെ അപേക്ഷിച്ച് 15 മുതൽ 20 ശതമാനം വരെ അധിക വർദ്ധനവാണ് ഇത്തവണ രേഖപ്പെടുത്തിയിരിക്കുന്നത്. കേരളത്തിലെ പ്രധാന വിമാനത്താവളങ്ങളായ കൊച്ചി, കോഴിക്കോട്, തിരുവനന്തപുരം, കണ്ണൂർ എന്നിവിടങ്ങളിൽ നിന്ന് യുഎഇയിലേക്കുള്ള നിരക്ക് സാധാരണയേക്കാൾ 150 ശതമാനത്തോളം വർദ്ധിച്ചു. നാട്ടിൽ നിന്ന് യുഎഇയിലേക്ക് തിരികെ പോകാൻ ആഗ്രഹിക്കുന്നവർ വൺ-വേ ടിക്കറ്റിന് മാത്രം 20,000 രൂപ മുതൽ 28,000 രൂപ വരെ നൽകേണ്ട അവസ്ഥയാണ്.

എന്തുകൊണ്ട് ഈ നിരക്ക് വർദ്ധന?

നിരക്ക് വർദ്ധനയ്ക്ക് പ്രധാനമായും മൂന്ന് കാരണങ്ങളാണ് ചൂണ്ടിക്കാണിക്കപ്പെടുന്നത് മാർച്ച് 20-ഓടെ എത്തുന്ന ചെറിയ പെരുന്നാൾ ആഘോഷിക്കാൻ നാട്ടിലേക്ക് പോകുന്നവരുടെ തിരക്ക്. യുഎഇയിലെയും ഇന്ത്യയിലെയും സ്കൂളുകൾക്ക് ഒരേ സമയം അവധി ലഭിക്കുന്നത് കുടുംബങ്ങൾ ഒന്നിച്ചുള്ള യാത്രകൾ വർദ്ധിപ്പിച്ചു. മാർച്ച് പകുതിയോടെ പരീക്ഷകൾ കഴിയുന്നതോടെ വിദ്യാർത്ഥികൾ കൂട്ടത്തോടെ യാത്ര ചെയ്യുന്നത് ഡിമാൻഡ് കൂട്ടി.

ഇന്ത്യയിലെ മറ്റ് നഗരങ്ങളിലെ അവസ്ഥ
കേരളത്തിന് പുറമെ മുംബൈ, ഡൽഹി, ബംഗളൂരു തുടങ്ങിയ നഗരങ്ങളിൽ നിന്നും യുഎഇയിലേക്കുള്ള നിരക്കിൽ വലിയ വർദ്ധനവുണ്ട്. മുംബൈയിൽ നിന്ന് ദുബായിലേക്ക് മാർച്ച് അവസാന വാരത്തിൽ 15,000 രൂപ മുതൽ 22,000 രൂപ വരെയാണ് വൺ-വേ നിരക്ക്. ഡൽഹിയിൽ നിന്നുള്ള യാത്രക്കാർക്ക് 25,000 രൂപയ്ക്ക് മുകളിൽ നൽകേണ്ടി വരുന്നു.

യാത്രക്കാർക്ക് ചില നിർദ്ദേശങ്ങൾ
ടിക്കറ്റ് നിരക്ക് കുറയ്ക്കാൻ ചില മാർഗ്ഗങ്ങൾ വിദഗ്ദ്ധർ നിർദ്ദേശിക്കുന്നുണ്ട്. മാർച്ച് 19 മുതൽ ഏപ്രിൽ 10 വരെയുള്ള പീക്ക് സീസൺ ഒഴിവാക്കി യാത്ര പ്ലാൻ ചെയ്യുന്നത് ലാഭകരമായിരിക്കും. നേരിട്ടുള്ള വിമാനങ്ങൾ ഒഴിവാക്കി മസ്കത്തോ കുവൈത്തോ വഴി കണക് ഷൻ ഫ്ലൈറ്റുകൾ തിരഞ്ഞെടുക്കുന്നതും ടിക്കറ്റ് ചിലവ് കുറയ്ക്കാൻ സഹായിക്കും. കൂടാതെ, റമസാനിന്റെ ആദ്യ പകുതിയിൽ യാത്ര പ്ലാൻ ചെയ്യുന്നതും ബജറ്റിലൊതുക്കാൻ സഹായകരമാകും.