കലിതുള്ളി മഴ, വെള്ളത്തിൽ മുങ്ങി യുഎഇ; സ്ഥിതി വഷളാക്കിയത് ക്ലൗഡ് സീഡിങും

Published: Wednesday, April 17, 2024, 12:30 [IST]

യുഎഇ: യു എ ഇയിലെ കനത്ത മഴയ്ക്ക് കാരണമായി ക്ലൗഡ് സീഡിങും. ജലക്ഷാമം, ആഗോളതാപനം എന്നിവയുടെ പശ്ചാത്തലത്തിൽ 1990 മുതൽ തന്നെ യു എ ഇ ക്ലൗഡ് സീഡിങ് നടത്തി കൃത്രിമമായി മഴപെയ്യിക്കാറുണ്ട്. തിങ്കൾ, ചൊവ്വ ദിവസങ്ങളിലും രാജ്യത്ത് ക്ലൗഡ് സീഡിങ് നടന്നിരുന്നുവെന്ന് അധികൃതർ അറിയിച്ചു.

മേഘങ്ങളിൽ നിന്ന് കൂടുതൽ മഴ പെയ്യുന്നതിനായി അന്തരീക്ഷത്തിലേക്ക് രാസവസ്തുക്കളും ചെറിയ കണങ്ങളും പ്രത്യേകിച്ച് പൊട്ടാസ്യം ക്ലോറൈഡ് പോലുള്ള പ്രകൃതിദത്ത ലവണങ്ങൾ - ഇംപ്ലാൻ്റ് ചെയ്യുന്ന രീതിയാണ് ക്ലൗഡ് സീഡിങ്. കഴിഞ്ഞ തിങ്കൾ , ചൊവ്വ ദിവസങ്ങളിൽ അൽ ഐൻ വിമാനത്താവളത്തിൽ നിന്ന് നാഷണൽ സെൻ്റർ ഓഫ് മെറ്റീരിയോളജി ക്ലൗഡിങ് വിമാനങ്ങൾ അയച്ചിരുന്നുവെന്ന് കാലാവസ്ഥാ നിരീക്ഷകനായ അഹമ്മദ് ഹബീബ് വ്യക്തമാക്കി.രണ്ട് ദിവസങ്ങളിലായി ഏഴ് സീഡിങ് വിമാനങ്ങളാണ് അയച്ചത്.

ക്ലൗഡ് സീഡിങിനായി മഴ സാധ്യതയുള്ള മേഘങ്ങൾ കണ്ടെത്തലാണ് പ്രധാനം. അൻപത് ശതമാനമെങ്കിലും മഴയ്ക്ക് സാധ്യതയുള്ള മേഘങ്ങളിലാണ് ക്ലൗഡ് സീഡിങ് നടത്തുക. ഇതോടെ ഇത്തരം മേഘങ്ങളിൽ നിന്നും മഴ ലഭിക്കാനുള്ള സാധ്യത 75 ശതമാനം വരെയാകും. യു എ ഇക്ക് അനുയോജ്യമായ ഏത് ക്ലൗഡിലും സീഡിങ് നടത്തുമെന്നും അഹമ്മദ് ഹബീബ് വ്യക്തമാക്കി.

മഴ പെയ്ത് വിവിധ പ്രദേശങ്ങൾ വെള്ളത്തിൽ മുങ്ങിയെങ്കിലും മഴയെ പ്രതീക്ഷയോടെയാണ് അധികൃതർ കാണുന്നത്. വെള്ളം ഒഴുകിപോകാനുള്ള വഴികൾ കൃത്യമായി ഇല്ലാത്തതാണ് ഇപ്പോഴത്തെ പ്രതിസന്ധിക്ക് കാരണമായതെന്നാണ് വിലയിരുത്തപ്പെടുന്നത്. അതേസമയം യു എ ഇയിൽ ഇന്നും മഴ തുടരുമെന്നാണ് കാലാവസ്ഥ നിരീക്ഷണ കേന്ദ്രം അറിയിച്ചിരിക്കുന്നത്. ഇന്ന് രാജ്യത്ത് ഓറഞ്ച് അലർട്ടും യെല്ലോ അലർട്ടും പ്രഖ്യാപിച്ചിട്ടുണ്ട്. അൽ ഐൻ, ഫുജൈറ, കോര്‍ഫക്കാൻ മേഖലകളിൽ ആണ് ഓറഞ്ച് അലർട്ട് ഉള്ളത്. ദുബായ് മേഖലയിലാണ് യെല്ലോ അലർട്ട് ഉള്ളത്.

മഴയുടെ പശ്ചാത്തലത്തിൽ ശക്തമായ ജാഗ്രത നിർദ്ദേശമാണ് അധികൃതർ നൽകുന്നത്. അനാവശ്യമായി വീടിന് പുറത്തിറങ്ങരുതെന്നും മുൻകരുതലുകൾ സ്വീകരിക്കണമെന്നും അധികൃതർ വ്യക്തമാക്കി. മഴ തുടരുന്ന സാഹചര്യത്തിൽ വിദ്യാഭ്യാസ സ്ഥാപനങ്ങളിൽ ഇന്നും ഓൺലൈൻ പഠനം തുടരും. സർക്കാർ ജീവനക്കാർ വർക്ക് ഫ്രം ഹോം തുടരും. വിവിധ സ്വകാര്യ സ്ഥാനപങ്ങളും ജീവനക്കാർക്ക് വർക്ക് ഫ്രം ഹോ അനുവദിച്ചിട്ടുണ്ട്. അതേസമയം മഴയിൽ വ്യാപകനാശ നഷ്ടങ്ങളും രാജ്യത്ത് റിപ്പോർട്ട് ചെയ്തിട്ടുണ്ട്.

Published On April 17, 2024