യുഎഇക്ക് ഷെയ്ഖ് മക്തൂമിന്റെ വന്‍ പദ്ധതി: 30000 എമിറാത്തികള്‍ക്ക് ജോലി; പ്രവാസികള്‍ക്കും ഗുണം ചെയ്യും

Updated: Thursday, September 25, 2025, 10:18 [IST]

യു എ ഇ സ്വദേശികള്‍ക്ക് ജോലി ഉറപ്പാക്കാനുള്ള വമ്പന്‍ പദ്ധതിയുമായി ഷെയ്ഖ് മുഹമ്മദ് ബിൻ റാഷിദ് അൽ മക്തൂം. എമിറാത്തികളായ 10000 യുവാക്കള്‍ക്ക് സംരംഭകത്വ പരിശീലനവും 2030-ഓടെ 30000 തൊഴിലവസരങ്ങൾ സൃഷ്ടിക്കുന്നതിനുമുള്ള വമ്പന്‍ സംരംഭകത്വ പദ്ധതിയാണ് സർക്കാർ പ്രഖ്യാപിച്ചിരിക്കുന്നത്. StartupEmirates.ae എന്ന പുതിയ ഡിജിറ്റൽ പ്ലാറ്റ്ഫോം വഴി, യുവ സംരംഭകർക്ക് മെന്റർഷിപ്പ്, പരിശീലനം, കോ-വർക്കിങ് സ്‌പേസുകൾ, ഫണ്ടിങ് അവസരങ്ങൾ എന്നിവ ലഭ്യമാകും, ഇത് യു എ ഇയിൽ വിജയകരമായ സ്റ്റാർട്ടപ്പുകൾ ആരംഭിക്കാൻ ആഗ്രഹിക്കുന്ന യുവാക്കൾക്ക് ഒരു പ്രധാന കവാടമായി മാറുമെന്നാണ് വിലയിരുത്തപ്പെടുന്നത്.

യു എ ഇയെ സ്റ്റാർട്ടപ്പുകളുടെയും നവീനതയുടെയും ആഗോള കേന്ദ്രമാക്കി മാറ്റാനുള്ള തന്ത്രപരമായ ശ്രമമാണ് സെപ്റ്റംബർ 21-ന് ആരംഭിച്ച ദേശീയ കാമ്പയിന്‍. മിനിസ്ട്രി ഓഫ് ഇക്കോണമി ആൻഡ് ടൂറിസം, യു എ ഇ ഗവൺമെന്റ് മീഡിയ ഓഫീസ്, യു എ ഇ എന്റർപ്രണർഷിപ്പ് കൗൺസിൽ ഉൾപ്പെടെ 50-ലധികം പൊതു-സ്വകാര്യ മേഖലാ സ്ഥാപനങ്ങളുടെ സഹകരണത്തോടെയാണ് ഈ പദ്ധതി നടപ്പാക്കുന്നത്.

ന്യൂ ഇക്കോണമി അക്കാദമിയുമായി സഹകരിച്ചാണ് StartupEmirates.ae എന്ന ഡിജിറ്റൽ പ്ലാറ്റ്ഫോം, വികസിപ്പിച്ചെടുത്തിരിക്കുന്നത്. സൗജന്യ മെന്റർഷിപ്പ് പ്രോഗ്രാമുകൾ, നെറ്റ്‌വർക്കിങ് അവസരങ്ങൾ, കോ-വർക്കിങ് സ്‌പേസുകൾ, അന്തർദേശീയ പങ്കാളിത്തങ്ങൾ എന്നിവ ഈ പ്ലാറ്റ്ഫോം വാഗ്ദാനം ചെയ്യുന്നു. 2030-ഓടെ 10,000 സംരംഭകരെ ആകർഷിക്കുകയും 30000 പുതിയ തൊഴിലവസരങ്ങൾ സൃഷ്ടിക്കുകയും ചെയ്യുകയുമാണ് പദ്ധതിയുടെ പ്രധാന ലക്ഷ്യം.

ബിഗിനർ ട്രാക്ക്, ബിസിനസിന്റെ അടിസ്ഥാനങ്ങൾ, ആശയ പരിശോധന, മാർക്കറ്റ് ഗവേഷണം, ബേസിക് ഫിനാൻഷ്യൽ പ്ലാനിങ് എന്നിവ പഠിപ്പിച്ച് പുതിയ സംരംഭകർക്ക് ശക്തമായ അടിത്തറ നൽകുന്ന രീതിയിലാണ് പദ്ധതി അടിസ്ഥാനമാക്കിയിരിക്കുന്നത്. അഡ്വാൻസ്ഡ് ട്രാക്ക്, സ്റ്റാർട്ടപ്പ് ആരംഭിക്കൽ, സുസ്ഥിര വളർച്ച, ആഗോള വിപുലീകരണം എന്നിവയിൽ ശ്രദ്ധ കേന്ദ്രീകരിച്ച് പരിചയസമ്പന്നരായ സംരംഭകർക്ക് വലിയ തോതിലുള്ള അറിവുകള്‍ വാഗ്ദാനം ചെയ്യുന്നു.

കണ്ടന്റ് ക്രിയേറ്റേഴ്സ് എന്ന പദ്ധതിയിലൂടെ, എമിറാത്തികളെ സാമ്പത്തിക, ബിസിനസ് ഉള്ളടക്കം നിർമ്മിക്കാൻ പരിശീലിപ്പിക്കുകയും ഡിജിറ്റൽ മാർക്കറ്റിങ് മേഖലയിൽ അവരെ പ്രാപ്തരാക്കുകയും ചെയ്യുന്നു. നിർമ്മാണ മേഖലയിലെ 500 എമിറാത്തികൾക്ക് റസിഡൻഷ്യൽ പ്രോജക്ടുകൾ ഡിസൈൻ മുതൽ പൂർത്തീകരണം വരെ മാനേജ് ചെയ്യാൻ ലൈസൻസ് നൽകുന്ന സർട്ടിഫൈഡ് പ്രോജക്ട് മാനേജർ പരിശീലനവും ശ്രദ്ധേയമാണ്.

യു എ ഇ ടാക്സ് ഏജന്റ് സർട്ടിഫിക്കേഷൻ പദ്ധതിയിലൂടെ 500 എമിറാത്തികളെ VAT, കോർപ്പറേറ്റ് ടാക്സ് പ്രൊഫഷണലുകളാക്കി മാറ്റുന്നതിന് പ്രത്യേക പരിശീലനം നൽകുന്നു. 250 എമിറാത്തി ഉടമസ്ഥതയിലുള്ള റിയൽ എസ്റ്റേറ്റ് സ്റ്റാർട്ടപ്പുകൾക്ക് പിന്തുണ നൽകി അവരെ വിജയിപ്പിക്കാൻ ലക്ഷ്യമിടുന്നതാണ് റിയൽ എസ്റ്റേറ്റ് ബിസിനസ് ഇൻക്യുബേഷൻ പദ്ധതി. നാഷണൽ സ്റ്റുഡന്റ് & ഗ്രാജുവേറ്റ് ബിസിനസ് എക്സ്പോ യൂണിവേഴ്സിറ്റി സംരംഭകരെ നിക്ഷേപകരും ആക്സിലറേറ്ററുകളുമായി ബന്ധിപ്പിച്ച് അവരുടെ ആശയങ്ങൾ വിപണിയിൽ എത്തിക്കാൻ സഹായിക്കുന്ന ഒരു പ്രദർശന പരിപാടിയുമാണ്.

എണ്ണയില്‍ നിന്നുള്ള വരുമാനത്തിന് അപ്പുറത്ത് യു എ ഇ സമ്പദ്‌വ്യവസ്ഥ വൈവിധ്യവത്കരിക്കാനുള്ള ദീർഘകാല പദ്ധതിയുടെ പദ്ധതിയുടെ ഭാഗവുമാണ് പുതിയ നീക്കം. നോൺ-ഓയിൽ ജി ഡി പിയുടെ 63%-ലധികം സംഭാവന ചെയ്യുന്ന ചെറുകിട-ഇടത്തരം സംരംഭങ്ങളെയും (SMEs) സ്റ്റാർട്ടപ്പുകളെയാണ് പുതിയ പദ്ധതി പ്രധാനമായും പ്രോത്സാഹിപ്പിക്കുന്നത്. എമിറാത്തികളായ യുവാക്കള്‍ക്ക് മാത്രമാണ് പദ്ധതിയുടെ ഭാഗമാകാന്‍ കഴിയുകയെങ്കിലും അവർ തുടങ്ങുന്ന സംരഭങ്ങളിലൂടെ ഇന്ത്യക്കാർ ഉള്‍പ്പെടേയുള്ള പ്രവാസികള്‍ക്കും ജോലി ലഭിക്കുമെന്നാണ് പ്രതീക്ഷിക്കുന്നത്.