വമ്പന് സാമ്പത്തിക കുതിപ്പ് നടത്തി യുഎഇ, റെക്കോർഡ്: അതും എണ്ണയില്ലാതെ, ഇന്ത്യക്കും നിർണ്ണായക പങ്ക്
ദുബായ്: എണ്ണ ഇതര വിദേശ വ്യാപര മേഖലയില് വന് കുതിപ്പുമായി യുണൈറ്റഡ് അറബ് എമിറേറ്റ്സ് (യുഎഇ). ഭരണകൂടത്തിന്റെ തന്ത്രപരമായ സാമ്പത്തിക വൈവിധ്യവൽക്കരണ ശ്രമങ്ങള് ലക്ഷ്യം കാണുന്നുവെന്നാണ് പുതിയ കണക്കുകള് വ്യക്തമാക്കുന്നത്. രാജ്യം എണ്ണ ഇതര വ്യാപാരത്തിൽ റെക്കോർഡുകൾ തകർക്കുന്നത് തുടരുകയാണെന്ന് യുഎഇ വിദേശ വ്യാപാര സഹമന്ത്രി താനി അൽ സെയൂദി വ്യക്തമാക്കി.
ഈ കണക്കുകള് യു എ ഇയുടെ സാമ്പത്തിക രംഗത്തിന്റെ ശക്തമായ വീണ്ടെടുക്കലിൻ്റെയും വളർച്ചയുടെയും പാതയെ പ്രതിഫലിപ്പിക്കുന്നുവെന്നും താനി അൽ സെയൂദി അഭിപ്രായപ്പെട്ടു. 2024-ൻ്റെ ആദ്യ പകുതിയിൽ 1.395 ട്രില്യൺ യു എ ഇ ദിർഹം എന്ന എക്കാലത്തെയും ഉയർന്ന നിരക്കിലാണ് രാജ്യത്തിന്റെ എണ്ണ ഇതര വിദേശ വ്യാപാരം. തുടർച്ചയായ വർഷങ്ങളില് യു എ ഇയുടെ വിദേശ വ്യാപാര തോത് വളർന്നുകൊണ്ടിരിക്കുന്നുവെന്നും കണക്കുകള് പറയുന്നു.
ഈ വർഷത്തെ നേട്ടം 2023 ലെ ഇതേകാലയളവിനെ അപേക്ഷിച്ച് വിദേശ വ്യാപാരത്തിൽ 11.2 ശതമാനം വർദ്ധനവാണ് രേഖപ്പെടുത്തിയിരിക്കുന്നത്. ഇത് യു എ ഇയുടെ സാമ്പത്തിക വൈവിധ്യവൽക്കരണ തന്ത്രങ്ങളുടെ വിജയത്തിന് അടിവരയിടുന്നു. യു എ ഇയുടെ എണ്ണ ഇതര കയറ്റുമതിയിലെ വർദ്ധനവ് രാജ്യത്തിന്റെ സാമ്പത്തിക മുന്നേറ്റത്തില് നിർണ്ണായകമാണ്. 2023 നെ അപേക്ഷിച്ച് 25 ശതമാനം അധിക വളർച്ചയാണ് നേടിയിരിക്കുന്നതെന്നും താനി അൽ സെയൂദി പറഞ്ഞു.
സ്വർണം, വെള്ളി, ആഭരണങ്ങൾ, പെർഫ്യൂമുകൾ, അലുമിനിയം, ചെമ്പ് വയറുകൾ, ഇരുമ്പ് ഉൽപന്നങ്ങൾ എന്നിവയുൾപ്പെടെയുള്ള പ്രധാന മേഖലകൾ എണ്ണ ഇതര കയറ്റുമതിയിലെ ഈ വൻ കുതിച്ചുചാട്ടത്തില് നിർണ്ണായക പങ്ക് വഹിച്ചതായി എമിറേറ്റ്സ് ന്യൂസ് റിപ്പോർട്ട് ഏജന്സി ഡബ്ല്യു എ എമ്മും റിപ്പോർട്ട് ചെയ്യുന്നു.
പ്രധാനമായും, ഈ റെക്കോർഡ് ഫലങ്ങൾ കൈവരിക്കുന്നതിൽ ഞങ്ങളുടെ സമഗ്ര സാമ്പത്തിക പങ്കാളിത്ത കരാർ (സി ഇ പി എ) പരിപാടി ഒരു പ്രധാന പങ്ക് വഹിക്കുന്നുണ്ടെന്ന് വ്യക്തമാണെന്നും ഡോ അൽ സെയൂദി പറഞ്ഞു.സി ഇ പി എ പങ്കാളികളായ ഇന്ത്യയുമായും തുർക്കിയേയുമായും ഉഭയകക്ഷി വ്യാപാരം യഥാക്രമം 15 ഉം 9.8 ഉം ശതമാനം വളർന്നുവെന്നും, ഇപ്പോൾ യുഎഇയുടെ മൊത്തം വിദേശ വ്യാപാരത്തിൻ്റെ 11.7 ശതമാനവും ഈ രണ്ട് രാജ്യങ്ങളുമായിട്ടാണ്.
"കൂടുതൽ സമഗ്ര സാമ്പത്തിക പങ്കാളിത്ത കരാർ ഡീലുകൾ വികസിപ്പിക്കുകയും അന്തിമമാക്കുകയും ചെയ്യുന്നത് തുടരുമ്പോൾ, കൂടുതൽ വളർച്ച ഞങ്ങൾ പ്രതീക്ഷിക്കുന്നു, 2031-ഓടെ എണ്ണ ഇതര വിദേശ വ്യാപാരത്തിൽ 4 ട്രില്യൺ ദിർഹം എന്ന ഞങ്ങളുടെ ലക്ഷ്യത്തിലേക്ക് ഞങ്ങളെ എത്തും." അദ്ദേഹം പറഞ്ഞു.
Click it and Unblock the Notifications
Sign in with Google