ചൂട് കുറയുന്നു, യുഎഇയില് ഇന്നും മഴ പ്രതീക്ഷിക്കാം; ഈ മാസം മുഴുവന് ഇതേ കാലാവസ്ഥ?
അബുദാബി: യുഎഇയില് ഇന്ന് ചൂടിന് ശമനമുണ്ടാകും എന്ന് കാലാവസ്ഥാ വകുപ്പ്. രാജ്യത്ത് ഇന്ന് കൂടുതല് മഴയും താപനിലയില് കുറവും പ്രതീക്ഷിക്കാം എന്ന് നാഷണല് സെന്റര് ഓഫ് മെറ്റീരിയോളജി അറിയിച്ചു. ഇന്നലെ അല്ഐന്, അബുദാബി, ഫുജൈറ, ഖോര്ഫക്കാന് എന്നിവിടങ്ങളില് മഴയും ആലിപ്പഴ വര്ഷവും ഇടിമിന്നലും നാശം വിതച്ചു. രാജ്യത്ത് ഇന്നലെ ഓറഞ്ച് അലര്ട്ടായിരുന്നു.
ചില ഭാഗങ്ങളില് നദികള് കരകവിഞ്ഞൊഴുകുകയാണ്. ബുധനാഴ്ച പുലര്ച്ചെ ഫുജൈറയുടെ ചില ഭാഗങ്ങളില് സാമാന്യം ശക്തമായ മഴ പെയ്തു. എന്സിഎമ്മിന്റെ പ്രവചനമനുസരിച്ച് ഇന്നത്തെ കാലാവസ്ഥ ഭാഗികമായി മേഘാവൃതവും കിഴക്ക്, തെക്ക് ഭാഗങ്ങളില് ചില സമയങ്ങളില് മഴ പെയ്യാനുള്ള സാധ്യതയും ഉള്ളതായിരിക്കുമെന്ന് പ്രതീക്ഷിക്കുന്നു. നേരിയതോ മിതമായതോ ആയ കാറ്റ് വീശിയേക്കും.
ഇത് പൊടിപടലങ്ങള് ഉയരാന് കാരണമായേക്കും. അറേബ്യന് ഗള്ഫിലും ഒമാന് കടലിലും കടല് നേരിയതോ മിതമായതോ ആയിരിക്കും. രാജ്യത്തിന്റെ ചില ഭാഗങ്ങളില് താപനില 21 ഡിഗ്രി സെല്ഷ്യസായി കുറയും. യുഎഇയുടെ ആന്തരിക പ്രദേശങ്ങളില് താപനില 46 ഡിഗ്രി സെല്ഷ്യസില് എത്തും. ഓഗസ്റ്റ് 8 വ്യാഴാഴ്ച വരെ മഴയുള്ള കാലാവസ്ഥ തുടരുമെന്ന് പ്രതീക്ഷിക്കുന്നു.
കഴിഞ്ഞ രണ്ട് ദിവസമായി യുഎഇയുടെ വിവിധ ഭാഗങ്ങളില് നേരിയ മഴയും കനത്ത ചാറ്റല്മഴയും അനുഭവപ്പെട്ടു. അതേസമയം മിക്ക പ്രദേശങ്ങളും ഭാഗികമായി മേഘാവൃതമായി തുടരുമെന്ന് പ്രതീക്ഷിക്കുന്നു. അല് ഐന് വരും ദിവസങ്ങളില് മിതമായതോ കനത്തതോ ആയ മഴയ്ക്ക് സാക്ഷ്യം വഹിക്കും എന്നാണ് പ്രവചനം. അബുദാബിയിലും മഴയ്ക്ക് സാധ്യതയുണ്ട്. യുഎഇയില് ഉടനീളം താപനില 2-3 ഡിഗ്രി സെല്ഷ്യസ് വരെ കുറയുമെന്ന് പ്രവചിക്കപ്പെടുന്നു.
ഇന്റര്ട്രോപ്പിക്കല് കണ്വെര്ജന്സ് സോണ് (ഐടിസിസെഡ്) യുഎഇയില് എത്തുന്നതാണ് ഈ കാലാവസ്ഥയ്ക്ക് കാരണമെന്ന് എന്സിഎമ്മിലെ കാലാവസ്ഥാ വിദഗ്ധനായ ഡോ അഹമ്മദ് ഹബീബ് ഖലീജ് ടൈംസിനോട് പറഞ്ഞു. ഭൂമധ്യരേഖയ്ക്ക് സമീപം വടക്കന്, ദക്ഷിണ അര്ദ്ധഗോളങ്ങളിലെ കാറ്റുകള് ഭൂമിയെ വലയം ചെയ്യുന്ന ന്യൂനമര്ദ്ദത്തിന്റെ ഒരു വലയമാണ് ഇന്റര്ട്രോപ്പിക്കല് കണ്വെര്ജന്സ് സോണ്.
ഇതിനൊപ്പം കിഴക്കന് ന്യൂനമര്ദ്ദത്തിന്റെ സ്വാധീനവും യുഎഇ കാലാവസ്ഥയെ സ്വാധീനിക്കുന്നുണ്ട്. 'ഐടിസിസെഡ് വടക്കോട്ട് നീങ്ങുന്നു. ഇത് ഒമാനിലും യുഎഇയുടെ കിഴക്കന് ഭാഗത്തും ന്യൂനമര്ദ്ദം നീട്ടാന് കാരണമാകുന്നു. നിലവില്, അല് ഐനിലെ നിരവധി സംവഹന മേഘങ്ങള് ആ പ്രദേശത്ത് കനത്ത മഴയ്ക്ക് കാരണമായേക്കാം. അല് ഹമീം പോലുള്ള പ്രദേശങ്ങളില് മഴ പെയ്യുമെന്ന് പ്രതീക്ഷിക്കുന്നു,'' അദ്ദേഹം കൂട്ടിച്ചേര്ത്തു.
ഇന്ത്യയെയും പാകിസ്ഥാനെയും ബാധിക്കുന്ന അതേ ഇന്റര്ട്രോപ്പിക്കല് കണ്വേര്ജന്സ് സോണാണ് ഇപ്പോള് യുഎഇയെയും ബാധിക്കുന്നത്. എന്നാല് യുഎഇയുടെ സ്ഥാനം കാരണം തീവ്രത വ്യത്യസ്തമാണ്. ഓഗസ്റ്റ് അവസാനം വരെ ഇടയ്ക്കിടെ വേനല് മഴ തുടരും എന്നും അദ്ദേഹം കൂട്ടിച്ചേര്ത്തു. പര്വതങ്ങളില് ഈര്പ്പം 15 ശതമാനം വരെ താഴാം. തീരപ്രദേശങ്ങളിലും ദ്വീപുകളിലും ഇത് 80 ശതമാനത്തില് എത്തുമെന്ന് പ്രതീക്ഷിക്കുന്നു.
Click it and Unblock the Notifications
Sign in with Google