യുഎഇയില് ഇനി മഴക്കാലം? വ്യാഴാഴ്ച വരെ ശക്തമായ മഴയ്ക്ക് സാധ്യതയെന്ന് എന്സിഎം
യുഎഇയില് വ്യാഴാഴ്ച വരെ മഴ തുടരാന് സാധ്യതയെന്ന് നാഷണല് സെന്റര് ഓഫ് മെറ്റീരിയോളജി അറിയിച്ചു. രാജ്യത്തിന്റെ വിവിധ ഭാഗങ്ങളില് തുടര്ച്ചയായി മൂന്ന് ദിവസങ്ങളായി മഴ ലഭിക്കുകയും അല് ഐനില് ശക്തമായ മഴയെത്തുടര്ന്ന് റോഡുകളില് വെള്ളം ഒഴുകുകയും ചിലയിടങ്ങളില് വെള്ളക്കെട്ടുണ്ടാവുകയും ചെയ്ത സാഹചര്യത്തില് ആണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.
യുഎഇയില് അസ്ഥിരമായ കാലാവസ്ഥ ഏതാനും ദിവസങ്ങള് കൂടി തുടരും. തിങ്കളാഴ്ച കാലാവസ്ഥ തെളിഞ്ഞതോ ഭാഗികമായി മേഘാവൃതമോ ആയിരിക്കുമെന്ന് നാഷണല് സെന്റര് ഓഫ് മെറ്റീരിയോളജി അറിയിച്ചു. ഉച്ചകഴിഞ്ഞ് കിഴക്കന് മേഖലകളില് സംവഹന മേഘങ്ങള് രൂപപ്പെടാനും മഴ പെയ്യാനും സാധ്യതയുണ്ട്. ചില തീരപ്രദേശങ്ങളില് രാത്രിയിലും ചൊവ്വാഴ്ച രാവിലെയുമായി അന്തരീക്ഷത്തില് ഈര്പ്പം വര്ധിക്കും.
തെക്കുകിഴക്ക് മുതല് വടക്കുകിഴക്ക് വരെയുള്ള ദിശകളില് നിന്ന് മണിക്കൂറില് 10 മുതല് 25 കിലോമീറ്റര് വരെ വേഗതയില് കാറ്റ് വീശും. ചില സമയങ്ങളില് ഇത് 35 കിലോമീറ്റര് വേഗത വരെ എത്തിയേക്കാം. അറേബ്യന് ഗള്ഫിലും ഒമാന് കടലിലും കടല് ശാന്തമായിരിക്കും. ചൊവ്വാഴ്ച മഴയുടെ സാധ്യത കൂടുതല് പ്രദേശങ്ങളിലേക്ക് വ്യാപിക്കും. തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കും അനുഭവപ്പെടുക.
നാളെ ഉച്ചകഴിഞ്ഞ് രാജ്യത്തിന്റെ കിഴക്കന്, തെക്കന് ഭാഗങ്ങളില് സംവഹന മേഘങ്ങള് രൂപപ്പെട്ട് ചിലയിടങ്ങളില് മഴ ലഭിക്കാന് സാധ്യതയുണ്ടെന്നും എന്സിഎം പ്രവചിക്കുന്നു. ചില തീരപ്രദേശങ്ങളിലും ഉള്പ്രദേശങ്ങളിലും രാത്രിയിലും ബുധനാഴ്ച രാവിലെയുമായി അന്തരീക്ഷത്തിലെ ഈര്പ്പം വര്ധിക്കുകയും മൂടല്മഞ്ഞോ നേരിയ മൂടല്മഞ്ഞോ രൂപപ്പെടാന് സാധ്യതയുണ്ടാവുകയും ചെയ്യും.
കാറ്റ് തെക്കുകിഴക്ക് മുതല് വടക്കുകിഴക്ക് ദിശയില് മണിക്കൂറില് 10 മുതല് 25 കിലോമീറ്റര് വരെ വേഗതയില് വീശും. എന്നാല് സംവഹന മേഘങ്ങള് രൂപപ്പെടുന്നയിടങ്ങളില് കാറ്റിന്റെ വേഗത മണിക്കൂറില് 40 കിലോമീറ്റര് വരെയാകാനും പൊടിപടലങ്ങള് ഉയരാനും സാധ്യതയുണ്ട്. അസ്ഥിരമായ കാലാവസ്ഥ ബുധനാഴ്ചയും തുടരുമെന്ന് പ്രതീക്ഷിക്കുന്നു. ഉച്ചകഴിഞ്ഞ് കിഴക്കന്, തെക്കന് മേഖലകളില് വീണ്ടും സംവഹന മേഘങ്ങള് രൂപപ്പെടാനും അവ രാജ്യത്തിന്റെ ഉള്പ്രദേശങ്ങളിലേക്ക് വ്യാപിക്കാനും സാധ്യതയുണ്ട്.
ഇത് മഴയ്ക്ക് കാരണമായേക്കാം. മേഘങ്ങള് രൂപപ്പെടുന്നയിടങ്ങളില് കാറ്റിന്റെ വേഗത വര്ധിക്കാന് സാധ്യതയുണ്ട്. മണിക്കൂറില് 15 മുതല് 30 കിലോമീറ്റര് വരെ വേഗതയുണ്ടാകാവുന്ന കാറ്റ് ചിലപ്പോള് 45 കിലോമീറ്റര് വരെ വേഗത കൈവരിക്കാം. ഇതോടൊപ്പം പൊടിയും മണലും ഉയരാനും സാധ്യതയുണ്ട്. രാത്രിയോടെ അന്തരീക്ഷത്തില് ഈര്പ്പം വര്ധിക്കും. വ്യാഴാഴ്ച രാവിലെ തീരപ്രദേശങ്ങളില് മൂടല്മഞ്ഞോ നേരിയ മൂടല്മഞ്ഞോ അനുഭവപ്പെടാന് സാധ്യതയുണ്ട്.
വ്യാഴാഴ്ച കാലാവസ്ഥ തെളിഞ്ഞതോ ഭാഗികമായി മേഘാവൃതമോ ആയിരിക്കും. ഉച്ചകഴിഞ്ഞ് കിഴക്കന് മേഖലകളില് വീണ്ടും സംവഹന മേഘങ്ങള് രൂപപ്പെടാനും മഴ ലഭിക്കാനും സാധ്യതയുണ്ട്. കാറ്റ് മിതമായ വേഗതയിലായിരിക്കും വീശുക. എന്നാല് മേഘങ്ങള് രൂപപ്പെടുന്നയിടങ്ങളില് കാറ്റ് ശക്തിപ്പെടുകയും വേഗത മണിക്കൂറില് 40 കിലോമീറ്റര് വരെയാകുകയും ചെയ്തേക്കാം.
ഇത് പൊടിപടലങ്ങള് ഉയരുന്നതിന് കാരണമായേക്കാം. രാത്രിയിലും വെള്ളിയാഴ്ച രാവിലെയുമായി ചില തീരപ്രദേശങ്ങളില് അന്തരീക്ഷത്തിലെ ഈര്പ്പം വര്ധിക്കുമെന്ന് പ്രതീക്ഷിക്കുന്നു. അതേസമയം, അറേബ്യന് ഗള്ഫിലും ഒമാന് കടലിലും കടല് താരതമ്യേന ശാന്തമായിരിക്കും.
Click it and Unblock the Notifications
Sign in with Google
