' ആ തോല്വി... എങ്ങനെ തിരിച്ചുവരണമെന്ന് പോലും അറിയില്ലായിരുന്നു'; ഒടുവില് പ്രതികരിച്ച് രോഹിത്
ഏകദിന ക്രിക്കറ്റ് ലോകകപ്പിലെ ഇന്ത്യയുടെ ഹൃദയഭേദകമായ തോല്വിക്ക് ശേഷം ആദ്യമായി പ്രതികരണവുമായി ക്യാപ്റ്റന് രോഹിത് ശര്മ്മ. ടൂര്ണമെന്റില് 10 മത്സരങ്ങള് തുടര്ച്ചയായി വിജയിച്ചെങ്കിലും ഫൈനലില് ഇന്ത്യ ഓസ്ട്രേലിയയോട് പരാജയപ്പെടുകയായിരുന്നു. ട്രാവിസ് ഹെഡിന്റെ മിന്നുന്ന സെഞ്ചുറിയുടെ പിന്ബലത്തില് ആണ് ഓസ്ട്രേലിയയുടെ ആറാം കിരീടധാരണം.
ടൂര്ണമെന്റിന്റെ സമാപനം മുതല് രോഹിത് സോഷ്യല് മീഡിയയില് നിന്ന് വിട്ടുനില്ക്കുകയായിരുന്നു. ലോകകപ്പിന് പിന്നാലെ നടന്ന ദക്ഷിണാഫ്രിക്കയ്ക്കെതിരായ ഏകദിന, ടി20 പരമ്പരകളില് നിന്നും രോഹിത് മാറി നില്ക്കാന് തീരുമാനിക്കുകയായിരുന്നു. എന്നിരുന്നാലും കലാശപ്പോരിലേറ്റ ഹൃദയവേദന എങ്ങനെ മറികടക്കണമെന്ന് തനിക്കറിയില്ലെന്ന് പറഞ്ഞ് രംഗത്തെത്തിയിരിക്കുകയാണ് രോഹിത് ഇപ്പോള്.
രോഹിത് ശര്മ്മയുടെ വാക്കുകള്:
'ഫൈനല് വരെ ഇന്ത്യ കളിച്ച രീതി കണക്കിലെടുക്കുമ്പോള് ആ തോല്വി എന്നെ വല്ലാതെ പിടിച്ചുലച്ചു. ആദ്യ കുറച്ച് ദിവസങ്ങളില് ഇതില് നിന്ന് എങ്ങനെ തിരിച്ചുവരണമെന്ന് എനിക്കറിയില്ലായിരുന്നു. എന്തുചെയ്യണമെന്ന് എനിക്കറിയില്ല. എന്റെ കുടുംബം, സുഹൃത്തുക്കള് എന്നിവരാണ് മുന്നോട്ട് നയിച്ചത്. നിങ്ങള് ജീവിതത്തില് മുന്നോട്ട് പോകേണ്ടതുണ്ട്. എന്നാല് അത് കഠിനമായിരുന്നു.
മുന്നോട്ട് പോകുന്നത് അത്ര എളുപ്പമായിരുന്നില്ല. ലോകകപ്പ് സ്വപ്നം കണ്ടാണ് ഞാന് എപ്പോഴും വളര്ന്നത്. ലോകകപ്പിനായി ഞങ്ങള് ഇത്രയും വര്ഷമായി പ്രവര്ത്തിച്ചു. നിങ്ങള് അതിലൂടെ കടന്നുപോകുകയും നിങ്ങള് ആഗ്രഹിച്ചത് നിങ്ങള്ക്ക് ലഭിക്കാതിരിക്കുകയും ചെയ്താല് അത് നിരാശാജനകമായിരിക്കും അല്ലേ. എന്നാല് മറുവശത്ത് നോക്കുകയാണെങ്കില് ടീമിനെക്കുറിച്ച് എനിക്ക് അഭിമാനമുണ്ട്.
കാരണം ഞങ്ങള് നന്നായി കളിച്ചു. എല്ലാ ലോകകപ്പിലും നിങ്ങള്ക്ക് ഇത്തരത്തില് പ്രകടനം നടത്താന് കഴിയില്ല. തിരിച്ചുവരാനും മുന്നോട്ട് നീങ്ങാനും തുടങ്ങുന്നത് വളരെ ബുദ്ധിമുട്ടായിരുന്നു. അതിനാലാണ് എവിടെയെങ്കിലും പോയി മനസ് ശാന്തമാക്കണം എന്ന് തീരുമാനിച്ചത്. എന്നാല് ഞാന് എവിടെയായിരുന്നാലും ആളുകള് എന്റെ അടുത്തേക്ക് വരുന്നുണ്ടെന്നും എല്ലാവരുടെയും പ്രയത്നത്തെ അഭിനന്ദിക്കുന്നുണ്ടെന്നും ഞാന് മനസിലാക്കി.
ആ ഒന്നര മാസത്തിനുള്ളില് ആളുകള് ഞങ്ങള്ക്കായി ചെയ്തതിനെ അഭിനന്ദിക്കാന് ഞാന് ആഗ്രഹിക്കുന്നു. എന്നാല് വീണ്ടും ഞാന് അതിനെക്കുറിച്ച് കൂടുതല് കൂടുതല് ചിന്തിച്ചാല് എനിക്ക് നിരാശ തോന്നും. നിങ്ങള്ക്കറിയാമോ, ആളുകള് എന്റെ അടുത്ത് വന്ന് അവര് വളരെ അഭിമാനിക്കുന്നു എന്ന് എന്നോട് പറയുന്നു. അത് ഒരു പരിധിവരെ എന്നെ ശരിക്കും സുഖിപ്പിച്ചു. അവരോടൊപ്പം ഞാനും സുഖം പ്രാപിച്ചു. ഞങ്ങള് കേള്ക്കാന് ആഗ്രഹിക്കുന്നത് ഇത്തരത്തിലുള്ള കാര്യങ്ങളാണ്.'
Click it and Unblock the Notifications
Sign in with Google