വലിയ സ്കോർ കണ്ടെത്താൻ സാധിക്കുന്ന താരം; ദേവ്ദത്ത് പടിക്കലിനെ പ്രശംസിച്ച് ലാറ

യുഎഇയിൽ നടന്ന കഴിഞ്ഞ സീസണിലൂടെയാണ് ദേവ്ദത്തിന്റെ ഐപിഎൽ അരങ്ങേറ്റം. അഞ്ച് അർധസെഞ്ചുറികളടക്കം 15 മത്സരങ്ങളിൽ നിന്ന് 473 റൺസ് നേടിയ ദേവ്ദത്ത് നായകൻ കോഹ്‌ലിനെയടക്കം ഞെട്ടിച്ചിരുന്നു

ഇന്ത്യൻ പ്രീമിയർ ലീഗിന്റെ 14-ാം പതിപ്പ് പുരോഗമിക്കുമ്പോൾ റോയൽ ചലഞ്ചേഴ്സ് ബാംഗ്ലൂരിന്റെ മലയാളി താരം ദേവ്ദത്ത് പടിക്കലിനെ പ്രശംസിച്ച് ക്രിക്കറ്റ് ഇതിഹാസം ബ്രയാൻ ലാറ. അൽപ്പം പരവപ്പെടുത്തേണ്ടതുണ്ടെങ്കിലും ദേവ്ദത്തിന്റെ സ്ഥിരതയാർന്ന പ്രകടനത്തെ ലാറ പ്രശംസിച്ചു. ആഭ്യന്തര ക്രിക്കറ്റിൽ കർണാടകയ്ക്കായി കളിക്കുന്ന ഈ എടപ്പാൾ സ്വദേശി കഴിഞ്ഞ ഐപിഎല്ലിൽ മിന്നും പ്രകടനമാണ് പുറത്തെടുത്തത്. അതിന് മുൻപും ശേഷവും നടന്ന ആഭ്യന്തര ക്രിക്കറ്റിലെ മത്സരങ്ങളിലും ബോളർമാരെ കൃത്യമായി നേരിടാൻ ദേവ്ദത്തിന് സാധിച്ചിരുന്നു.

യുഎഇയിൽ നടന്ന കഴിഞ്ഞ സീസണിലൂടെയാണ് ദേവ്ദത്തിന്റെ ഐപിഎൽ അരങ്ങേറ്റം. അഞ്ച് അർധസെഞ്ചുറികളടക്കം 15 മത്സരങ്ങളിൽ നിന്ന് 473 റൺസ് നേടിയ ദേവ്ദത്ത് നായകൻ കോഹ്‌ലിനെയടക്കം ഞെട്ടിച്ചിരുന്നു. തകർപ്പൻ പ്രകടനങ്ങളിലൂടെ ടീമിലെ സ്ഥിര സാനിധ്യമാകാനും ഈ മലയാളി താരത്തിന് സാധിച്ചുവെന്നത് അഭിനന്ദനാർഹമാണ്.

"മികച്ച കഴിവുള്ള ഒരാളാണ് ദേവ്ദത്ത്. നല്ലപോലെ ബാറ്റ് ചെയ്യുകയും കുറച്ച് അർധസെഞ്ചുറികളടക്കം നേടി നായകൻ വിരാട് കോഹ്‌ലിയെ മികച്ച രീതിയിൽ പിന്തുണയ്ക്കുകയും ചെയ്തിരുന്നു. ഈ സീസണിൽ അവർ സെഞ്ചുറികൾ നേടാനുള്ള സാധ്യത വരെയുണ്ട്."ലാറ പറഞ്ഞു. ഇക്കഴിഞ്ഞ മാർച്ച് 22നാണ് ദേവ്ദത്ത് പടിക്കലിന് കോവിഡ് സ്ഥിരീകരിച്ചത്. അന്നുമുതൽ ബെംഗളൂരുവിലെ വസതിയിൽ ഐസലേഷനിലായിരുന്നു താരം.

ഐപിഎല്ലിന് മുൻപ് നടന്ന വിജയ് ഹസാരെ ട്രോഫിയിൽ വെടിക്കെട്ട് പ്രകടനമാണ് ദേവ്ദത്ത് പുറത്തെടുത്തത്. ടൂർണമെന്റിൽ 737 റൺസുമായി ടോപ് സ്കോററായ ദേവ്ദത്തിനെ എന്നാൽ ഇന്ത്യൻ പ്രീമിയർ ലീഗ് ആരംഭിക്കുന്നതിന് മുൻപ് കോവിഡ് പിടികൂടുകയായിരുന്നു. ഇതോടെ റോയൽ ചലഞ്ചേഴ്സ് ബാംഗ്ലൂരിനുവേണ്ടിയുള്ള ആദ്യ മത്സരം താരത്തിന് നഷ്ടമാവുകയും ചെയ്തിരുന്നു. എന്നാൽ രണ്ടാം മത്സരത്തിൽ കളത്തിലിറങ്ങിയ പടിക്കൽ 13 പന്തിൽ 11 റൺസ് കണ്ടെത്തി.

English summary

Brian Lara backs RCB's Malayali player Devdutt Padikal wish he could score century