ഓരോ വർഷവും അവനെ കൂടുതൽ ഇഷ്ടപ്പെടുന്നു; സഞ്ജു സാംസണിനെ പ്രശംസിച്ച് മുൻ ഇംഗ്ലിഷ് നായകൻ

നായകനായുള്ള അരങ്ങേറ്റ മത്സരത്തിലെ സഞ്ജുവിന്റെ പ്രകടനം ഏവരെയും ഞെട്ടിക്കുന്നതായിരുന്നു

ന്യൂഡൽഹി: മലയാളി താരവും ഇന്ത്യൻ പ്രീമിയർ ലീഗിന്റെ പതിനാലാം പതിപ്പിൽ രാജസ്ഥാൻ റോയൽസ് നായകനുമായ സഞ്ജു സാംസണിനെ പ്രശംസിച്ച് മുൻ ഇംഗ്ലിഷ് നായകനും കമന്റേറ്ററുമായ കെവിൻ പീറ്റേഴ്സൺ. ഐപിഎല്ലിന്റെ ഓരോ സീസണിലും സഞ്ജുവിനോടുള്ള തന്റെ ഇഷ്ടം കൂടുകയാണെന്നും പീറ്റേഴ്സൺ പറഞ്ഞു. നായകനായുള്ള അരങ്ങേറ്റ മത്സരത്തിലെ സഞ്ജുവിന്റെ പ്രകടനം ഏവരെയും ഞെട്ടിക്കുന്നതായിരുന്നു.

കെവിൻ പീറ്റേഴ്സൺ

"ഇന്ത്യൻ യുവതാരങ്ങൾ ഒരു സ്റ്റാൻഡേർഡ് സെറ്റ് ചെയ്തുകഴിഞ്ഞു. എല്ലാ വർഷവും ഞാൻ സഞ്ജു സാംസണെ സ്നേഹിക്കുന്നു. അവൻ തന്റെ ഷോട്ടുകൾ കളിക്കുന്ന രീതിയെക്കുറിച്ചും ഷോട്ടുകൾ കളിക്കേണ്ട സമയത്തെക്കുറിച്ചും ഞാൻ തികച്ചും ഇഷ്ടപ്പെടുന്നു. പഞ്ചാബ് കിങ്സിനെതിരായ അദ്ദേഹത്തിന്റെ സെഞ്ച്വറി തികച്ചും ഗംഭീരമായിരുന്നു. എന്നാൽ ടീമിനെ വിജയത്തിലെത്തിക്കാൻ സാധിക്കാതെ പോയത് നിർഭാഗ്യമായി പോയി," പീറ്റേഴ്സൺ പറഞ്ഞു.

സ്ഥിരതയില്ലായ്മ

കഴിഞ്ഞ വർഷവും താൻ കമന്ററിയിൽ ഇതിനെക്കുറിച്ച് എപ്പോഴും സംസാരിക്കുമായിരുന്നെന്ന് പീറ്റേഴ്സൺ പറഞ്ഞു. പക്ഷെ അതെല്ലാം സഞ്ജുവിന്റെ സ്ഥിരതയെക്കുറിച്ചായിരുന്നുവെന്നും പീറ്റേഴ്സൺ കൂട്ടിച്ചേർത്തു. ടൂർണമെന്റിന്റെ മധ്യഭാഗത്ത് വെച്ച് സ്ഥിരത നഷ്ടപ്പെടുത്താനുള്ള പ്രവണത സഞ്ജുവിനുണ്ട്. ഇതൊരു മാരത്തോണാണെന്നും അങ്ങനെ വേണം കളിക്കണമെന്നും പീറ്റേഴ്സൺ വ്യക്തമാക്കി.

ഉത്തരവാദിത്വം കൂടി

നായകനെന്ന നിലയിൽ ഇപ്പോൾ സഞ്ജുവിന്റെ ഉത്തരവാദിത്വം മാറിയെന്നും പീറ്റേഴ്സൺ പറഞ്ഞു. "അദ്ദേഹത്തിന്റെ ഉത്തരവാദിത്തങ്ങൾ ഇപ്പോൾ മറ്റൊരു തലത്തിലേക്ക് പോകുന്നു. അദ്ദേഹം റോയൽസിന്റെ ക്യാപ്റ്റനാണ്, മാത്രമല്ല ആ ബാറ്റിംഗ് നിരയിൽ ബെൻ സ്റ്റോക്സ് അഭാവം അദ്ദേഹം മറയ്ക്കണം. ക്യാപ്റ്റൻ എന്ന നിലയിൽ നിങ്ങൾ മറ്റുള്ളവരെക്കുറിച്ചും നിങ്ങളെക്കുറിച്ചും ചിന്തിക്കാൻ തുടങ്ങുന്നു,"

സഞ്ജുവിന്റെ തകർപ്പൻ സെഞ്ചുറി

നായകനായി അരങ്ങേറ്റം കുറിച്ച മത്സരത്തിൽ തകർത്തടിച്ച സഞ്ജു ചൂർണമെന്റിൽ വരാനിരിക്കുന്ന മത്സരങ്ങളെക്കുറിച്ച് വലിയ പ്രതീക്ഷയാണ് നൽകിയത്. പരാജയം ഉറപ്പിച്ചടുത്ത് നിന്നാണ് നായകന്റെ ഉത്തരവാദിത്വത്തോടെ ബാറ്റ് വീശിയ സഞ്ജു സാംസൺ അവസാന പന്ത് വരെ രാജസ്ഥാന് ജയപ്രതീക്ഷ നൽകിയത്. 63 പന്തിൽ 119 റൺസാണ് സഞ്ജു അടിച്ചെടുത്തത്. ഐപിഎല്ലിലെ താരത്തിന്റെ മൂന്നാം സെഞ്ചുറി പ്രകടനം കൂടിയായിരുന്നു അത്.

നിരാശപ്പെടുത്തി രാജസ്ഥാൻ

അതേസമയം സഞ്ജുവിന്രെ നേതൃത്വത്തിലുള്ള രാജസ്ഥാൻ റോയൽസിന് ടൂർണമെന്റിൽ ഇതുവരെ ഒരു മത്സരത്തിൽ മാത്രമാണ് ജയിക്കാനായത്. മൂന്ന് മത്സരങ്ങളിൽ പഞ്ചാബിനെതിരെയും ചെന്നൈ സൂപ്പർ കിങ്സിനെതിരെയും തോൽവി വഴങ്ങിയ രാജസ്ഥാന്റെ ഏക ജയം ഡൽഹിക്കെതിരെയായിരുന്നു. മൂന്ന് വിക്കറ്റിനാണ് റിഷഭ് പന്തിന്റെ ഡൽഹി ക്യാപിറ്റൽസിനെ രാജസ്ഥാൻ തോൽപ്പിച്ചത്.

English summary

IPL 2021 Kevin Pietersen praise Sanju Samson and his new rule in Rajasthan Royals