ചെന്നൈയ്ക്ക് മുന്നില്‍ ബാംഗ്ലൂരിന് മുട്ടുവിറയ്ക്കും: കോലിക്കും കൂട്ടർക്കും നാണക്കേടിന്റെ റെക്കോർഡ്

ഐപിഎല്‍ സീസണ്‍ 17 ന് തുടക്കം കുറിച്ചുകൊണ്ട് ചെന്നൈയിലെ ചെപ്പോക്ക് എംഎ ചിദംബരം സ്റ്റേഡിയത്തിൽ ചെന്നൈ സൂപ്പർ കിംഗ്‌സ് (സി എസ്‌ കെ) റോയൽ ചലഞ്ചേഴ്‌സ് ബെംഗളൂരു പോരാട്ടം ഇന്ന് വൈകീട്ട് നടക്കും. എംഎസ് ധോണിയുടെ പിൻഗാമിയായി റുതുരാജ് ഗികാവ്ക്ഡ് ചെന്നൈയുടെ ടീം ക്യാപ്റ്റൻ സ്ഥാനത്തേക്ക് വരുന്നു എന്നതാണ് ശ്രദ്ധേയമായ കാര്യം.

ഐപിഎല്ലില്‍ ഏറ്റവും അധികം ആരാധകരുള്ള രണ്ട് ടീമുകളാണ് ചെന്നൈയും ബെംഗളൂരുവും. രണ്ട് ടീമുകളുടേയും തലപ്പത്ത് ധോണിയും കോലിയും ആയിരുന്നു എന്നത് തന്നെയാണ് ഈ പ്രേക്ഷക പിന്തുണയ്ക്ക് കാരണം. ചെന്നൈ അഞ്ച് തവണ ഐ പി എല്‍ കിരീടം ഉയർത്തിയപ്പോള്‍ ബെംഗളൂരുവിന് ഇതുവരെ കിരീടത്തില്‍ മുത്തമിടാന്‍ സാധിച്ചിട്ടില്ല. ഇരുവരും തമ്മിലുള്ള നേരിട്ടുള്ള മത്സരങ്ങളിലും മുന്‍തൂക്കം ചെന്നൈയ്ക്കാണ്.

ഐ പി എല്‍ ചരിത്രത്തില്‍ ഇരുടീമുകളും ഇതുവരെ 31 തവണ നേർക്കുനേർ പോരാടിയിട്ടുണ്ട്. ഇതില്‍ വലിയ ആധിപത്യമാണ് ചെന്നൈക്കുള്ളത്. 20 മത്സരങ്ങളില്‍ മഞ്ഞപ്പടയാളികള്‍ വിജയിച്ചപ്പോള്‍ 10 തവണ മാത്രമാണ് ബെംഗളൂരു വിജയിച്ചത്. ഒരു മത്സരം ഫലം നിർണ്ണയിക്കാനാകാതെ പോയി. ആദ്യം ബാറ്റ് ചെയ്തപ്പോള്‍ ചെന്നൈ 10 തവണയും ബെംഗളൂര 6 തവണയും വിജയിച്ചു.

11 തവണ ചെന്നൈ ചെയിസ് ചെയ്ത് വിജയിച്ചപ്പോള്‍ 4 തവണ മാത്രമാണ് ബെംഗളൂരു വിജയിച്ചത്. ബെംഗളൂരുവിനെതിരായ ചെന്നെയുടെ ഉയർന്ന സ്കോർ 226 ആണെങ്കില്‍ മറുവശത്ത് ഇത് 218 മാത്രമാണ്. ഒരു മത്സരത്തില്‍ കോലിയുടെ ടീമിനെ കേവലം 70 റണ്‍സിന് പുറത്താക്കിയ ചരിത്രവും ചെന്നൈയ്ക്കുണ്ട്. പക്ഷെ ചെന്നൈയ്ക്കെതിരെ 999 റണ്‍സ് നേടിയ കോലിയാണ് റണ്‍ വേട്ടക്കാരില്‍ മുമ്പന്‍. മറുവശത്ത് 751 റണ്‍സുമായി ധോണിയും ഒന്നാം സ്ഥാനത്ത് നില്‍ക്കുന്നു. വിക്കറ്റുകളുടെ കാര്യത്തില്‍ ചെന്നൈ ടീമില്‍ 18 വിക്കറ്റുമായി രവീന്ദ്ര ജഡേജ പട്ടികയില്‍ ഒന്നാമതായി നില്‍ക്കുമ്പോള്‍ ബെംഗളൂരവില്‍ 15 വിക്കറ്റുമായി വിനയകുമാറാണ് മുന്നില്‍.

രണ്ട് ടീമുകൾ തമ്മിലുള്ള എട്ട് മത്സരങ്ങള്‍ക്കാണ് ചെപ്പോക്ക് സ്റ്റേഡിയം സാക്ഷ്യം വഹിച്ചിരിക്കുന്നത്. ആർ സി ബിക്കെതിരെ അവരുടെ തട്ടകത്തിൽ നടന്ന ഈ ഏറ്റുമുട്ടലുകളിൽ ഏഴിലും സിഎസ്‌കെ വിജയിച്ച് ചെപ്പോക്ക് തങ്ങളുടെ ഉറച്ച കോട്ടയാണെന്ന് അടിവരയിടുന്നു.

English summary

Bangalore royal challengers Vs Chennai super kings Head To Head Records & Stats