ഇടവേളയില് ടീമിനൊപ്പം ചേരാതെ വീട്ടിലേക്ക് മടങ്ങി ഹര്ദിക്, രോഹിത് വീണ്ടും ക്യാപ്റ്റനാകുമോ?
തുടരെ രണ്ട് പരാജയങ്ങളോടെ പോയന്റ് പട്ടികയില് അവസാന സ്ഥാനത്തേക്ക് വീണിരിക്കുകയാണ് മുംബൈ ഇന്ത്യന്സ്. ആദ്യ കളിയില് ഗുജറാത്ത് ടൈറ്റന്സിനോടും രണ്ടാം മത്സരത്തില് സണ്റൈസേഴ്സ് ഹൈദരാബാദിനോടും പരാജയപ്പെട്ടു. ഹൈദരാബാദിനോടെതിരായ മത്സരം കൂറ്റന് ടോട്ടല് പിറന്നു എന്നതിനാല് തന്നെ ആരാധകര്ക്ക് നല്ലൊരു ബാറ്റിംഗ് വെടിക്കെട്ട് കാണാനായിരുന്നു.
എന്നാല് അഞ്ച് തവണ ചാമ്പ്യന്മാരായ മുംബൈ നിരാശയുടെ പടുകുഴിയിലാണ്. രോഹിത് ശര്മ്മ എന്ന മികച്ച ക്യാപ്റ്റനെ മാറ്റി ഹര്ദിക് പാണ്ഡ്യയെ നിയമിച്ചത് മുതല് മുംബൈയ്ക്ക് കഷ്ടകാലമാണ്. മാനേജ്മെന്റ് തീരുമാനത്തെ ചോദ്യം ചെയ്ത് ആരാധകര് കൂട്ടത്തോടെ ടീമിനെ കൈവിട്ടു. ടീമിനുള്ളില് ഒത്തിണക്കം കൊണ്ടുവരാന് ഹര്ദിക് പാണ്ഡ്യക്ക് സാധിച്ചതുമില്ല. ചാമ്പ്യന് ടീമിന്റെ ശരീരഭാഷയെ അല്ല മുംബൈയ്ക്ക്.
ടീമിന്റെ കരുത്തായ ആരാധകര് ഹര്ദിക് പാണ്ഡ്യയെ കൂവലോടെയാണ് കഴിഞ്ഞ ദിവസം എതിരേറ്റത്. സോഷ്യല് മീഡിയയിലും ഹര്ദികിന് പിന്തുണയില്ല. ഇപ്പോഴിതാ ഹര്ദിക് പാണ്ഡ്യ ഇടവേളയെടുക്കാന് ആലോചിക്കുന്നു എന്ന റിപ്പോര്ട്ടാണ് പുറത്തുവരുന്നത്. ആരാധകരില് നിന്നും മുന് സഹതാരങ്ങളില് നിന്നുമുള്ള രൂക്ഷമായ വിമര്ശനവും സമ്മര്ദ്ദവും കാരണം ഹാര്ദിക് പാണ്ഡ്യ ഇടവേള എടുക്കാന് തീരുമാനിച്ചു എന്നാണ് വിവരം.
വണ് ക്രിക്കറ്റാണ് ഇക്കാര്യം റിപ്പോര്ട്ട് ചെയ്യുന്നത്. കഴിഞ്ഞ ദിവസം ഹൈദരാബാദില് നിന്ന് ടീം മുംബൈയിലേക്ക് മടങ്ങിയിരുന്നു. വിമാനത്താവളത്തില് ഇറങ്ങിയ ശേഷം ഹര്ദിക് ഉടന് തന്നെ തന്റെ മുംബൈയിലെ തന്റെ വീട്ടിലേക്ക് പോകുകയായിരുന്നു. അടുത്ത മത്സരത്തിന് മുന്പുള്ള അവധിക്കാലം തന്റെ ടീമിനൊപ്പം ചെലവഴിക്കുന്നതിന് പകരം കുടുംബത്തോടൊപ്പം ചെലവഴിക്കാനാണ് ഹര്ദിക് തീരുമാനിച്ചത്.
തിങ്കളാഴ്ച വാങ്കഡെ സ്റ്റേഡിയത്തില് രാജസ്ഥാന് റോയല്സുമായി കളിക്കുന്നതിന് മുമ്പ് മുംബൈ ടീമിന് നാല് ദിവസത്തെ അവധി ലഭിക്കും. ഇത് അവര്ക്ക് സ്വയം ഒത്തുചേരാനും ശ്രദ്ധ കേന്ദ്രീകരിക്കാനും പരിശീലനത്തിനും സമയം നല്കും. എന്നാല് ഹര്ദിക് വീട്ടിലേക്ക് മടങ്ങിയത് താരത്തിന്റെ സമ്മര്ദ്ദം കാരണമാണ് എന്നാണ് റിപ്പോര്ട്ട്. ഹര്ദികിന്റെ ഭാര്യ വരെ സോഷ്യല് മീഡിയയില് ട്രോളുകള്ക്കിരയായിരുന്നു.
ടീമിലെ എല്ലാ കളിക്കാര്ക്കും അവരുടെ തന്ത്രങ്ങള് പുനര്നിര്മ്മിക്കുന്നതിനും ശക്തമായി തിരിച്ചുവരുന്നതിനുമുള്ള നിര്ണായക കാലഘട്ടമായി ഈ ഇടവേള പ്രവര്ത്തിക്കും എന്നിരിക്കെ ക്യാപ്റ്റന്റെ അഭാവമാണ് ചര്ച്ചയാകുന്നത്. ഈ ഇടവേള മുംബൈയ്ക്ക് ഏതെങ്കിലും ബലഹീനതകള് പരിഹരിക്കാനും അവരുടെ ഗെയിം പ്ലാന് മികച്ചതാക്കാനും പുതിയ നിശ്ചയദാര്ഢ്യത്തോടെയും ഐക്യത്തോടെയും വരാനിരിക്കുന്ന മത്സരത്തെ സമീപിക്കാനുമുള്ള അവസരം നല്കും.
എന്നാല് ഇതില് നിന്ന് ഹര്ദിക് വിട്ട് നില്ക്കുന്നത് രോഹിതിലേക്ക് വീണ്ടും നായകസ്ഥാനം തിരിച്ചെത്താന് കാരണമാകും എന്നാണ് ആരാധകരുടെ പ്രതീക്ഷ. സമ്മര്ദ്ദം കൈകാര്യം ചെയ്യാനാകാതെ ഹര്ദിക് ക്യാപ്റ്റന്സി ഉപേക്ഷിച്ചേക്കും എന്നും രോഹിത് തന്നെ ക്യാപ്റ്റനായി തിരിച്ചെത്തും എന്നുമുള്ള ചര്ച്ചകള് സോഷ്യല് മീഡിയയില് നടക്കുന്നുണ്ട്.
Click it and Unblock the Notifications
Sign in with Google