'അപ്രതീക്ഷിതമല്ല ആ സെഞ്ച്വറി, നേരത്തെ തന്നെ തയ്യാറെടുത്തു...'; സഞ്ജുവിന്റെ കോച്ചിന്റെ വെളിപ്പെടുത്തല്
അന്താരാഷ്ട്ര ക്രിക്കറ്റില് ആദ്യ സെഞ്ച്വറി കുറിച്ച സഞ്ജു സാംസണിന്റെ ഇന്നിംഗ്സിനെ പ്രശംസിച്ച് നിരവധി താരങ്ങളാണ് രംഗത്തെത്തിയത്. ക്രിക്കറ്റ് ഇതിഹാസം സുനില് ഗവാസ്കര് ഉള്പ്പടെയുള്ള ലോകോത്തര താരങ്ങള് സഞ്ജുവിനെ അഭിനന്ദിച്ച് കൊണ്ട് രംഗത്തെത്തിയിരുന്നു. ഏറെ നാള് ടീമില് നിന്ന് തഴയപ്പെട്ട താരമാണ് സഞ്ജു സാംസണ്. ലോകകപ്പ് ടീമിലേക്ക് പോലും തന്നേക്കാള് മോശം ട്രാക്ക് റെക്കോഡുള്ള സൂര്യകുമാര് യാദവാണ് പരിഗണിക്കപ്പെട്ടത്.
പലകുറി സഞ്ജുവിനെ സെലക്ടര്മാര് തഴഞ്ഞിരുന്നു. അതിനാല് തന്നെ എല്ലാവര്ക്കുമുള്ള മധുരപ്രതികാരമാണ് സഞ്ജുവിന്റെ ഇന്നലത്തെ സെഞ്ച്വറി എന്നാണ് വിലയിരുത്തുന്നത്. ഇപ്പോഴിതാ സഞ്ജു സാംസണിന്റെ പരിശീലകന് ബിജുമോന് താരത്തെ കുറിച്ച് പറഞ്ഞ വാക്കുകളാണ് ചര്ച്ചയായി കൊണ്ടിരിക്കുന്നത്. ഇന്ത്യന് എക്സ്പ്രസിനോടായിരുന്നു ബിജുമോന്റെ പ്രതികരണം.
ലോകകപ്പ് നഷ്ടമായതിലുള്ള സഞ്ജുവിന്റെ നിരാശയെ കുറിച്ചും ദക്ഷിണാഫ്രിക്കന് സാഹചര്യങ്ങളെ നേരിടാനുള്ള തയ്യാറെടുപ്പുകളെ കുറിച്ചും ബിജുമോന് സംസാരിച്ചു. 'തന്റെ നിയന്ത്രണത്തിലല്ലാത്ത കാര്യങ്ങളെക്കുറിച്ച് അദ്ദേഹം ആകുലപ്പെട്ടിരുന്നില്ല. താന് കടന്നുപോകുന്ന പ്രക്രിയയില് മാത്രമാണ് അദ്ദേഹം വിശ്വസിച്ചിരുന്നത്. ഞങ്ങള് ദക്ഷിണാഫ്രിക്കന് പര്യടനത്തിനായി ബെംഗളൂരുവില് പ്രത്യേകം തയ്യാറെടുക്കുകയായിരുന്നു,' ബിജുമോന് പറയുന്നു.
നാഷണല് ക്രിക്കറ്റ് അക്കാദമിയില് ദക്ഷിണാഫ്രിക്കന് സാഹചര്യങ്ങള്ക്ക് അനുസരിച്ചുള്ള വിക്കറ്റൊരുക്കി പരിശീലിച്ചു. ദക്ഷിണാഫ്രിക്ക വെല്ലുവിളി നിറഞ്ഞതായിരിക്കുമെന്ന് സഞ്ജുവിന് അറിയാമായിരുന്നു. വിക്കറ്റില് ഉടനീളം ലാറ്ററല് മൂവ്മെന്റും മികച്ച ബൗണ്സും ഉണ്ടാകും. ഇന്ത്യയിലെ ആഭ്യന്തര തലത്തില് നമുക്ക് ലഭിക്കുന്ന സാഹചര്യങ്ങളില് നിന്ന് വ്യത്യസ്തമായിരിക്കും അത്.
അതിനാല് ചില കാര്യങ്ങള് മികച്ചതാക്കാനുള്ള യോജിച്ച ശ്രമം ഉണ്ടായിരുന്നു. ആ സാഹചര്യങ്ങളുമായി പൊരുത്തപ്പെടാനുള്ള ഗെയിം പരിശീലിച്ചു. ടീമിനെ വിജയത്തിലേക്ക് കൊണ്ടുപോകാന് കഴിയുന്ന ദൈര്ഘ്യമേറിയ ഇന്നിംഗ്സുകള് കളിക്കാന് അദ്ദേഹം മാനസികമായി നേരത്തെ തന്നെ തയ്യാറെടുത്തിരുന്നു എന്നും ബിജുമോന് കൂട്ടിച്ചേര്ത്തു. ദക്ഷിണാഫ്രിക്കയ്ക്കെതിരായ ഏകദിന പരമ്പരയ്ക്കിടെ സഞ്ജു സാംസണ് എവിടെയും ബാറ്റുചെയ്യാന് നന്നായി തയ്യാറായിരുന്നുവെന്ന് ബിജുമോന് പറഞ്ഞു.
പലപ്പോഴും സഞ്ജുവിന് ലോവര് മിഡില് ഓര്ഡറില് ബാറ്റ് ചെയ്യേണ്ടി വന്നിട്ടുണ്ട്. അതിനാല് തന്നെ വണ്ഡൗണ് ആയി ലഭിച്ച അവസരം സഞ്ജു മുതലാക്കി നീണ്ട ഇന്നിംഗ്സ് കളിക്കാനുള്ള കഴിവ് പ്രകടിപ്പിക്കുകയും ചെയ്തു. ദക്ഷിണാഫ്രിക്കന് പിച്ചുകളില് മൂന്നാം നമ്പറില് ബാറ്റ് ചെയ്യുന്നത് വെല്ലുവിളി നിറഞ്ഞതാണ്, എന്നാല് അതേസമയം, ഇന്നിംഗ്സ് നങ്കൂരമിടാനും ടീമിനെ വലിയ സ്കോറിലേക്ക് കൊണ്ടുപോകാനുമുള്ള അവസരമാണിത്.
വളരെ ശാന്തമായി ബാറ്റ് ചെയ്തു. മധ്യ ഓവറുകളില് കുറച്ച് ഡോട്ട് ബോളുകള് കളിക്കാന് തയ്യാറായി. അവസാനം അദ്ദേഹം വേഗത കൂട്ടുകയും ഇന്ത്യയെ മികച്ച ടോട്ടലിലെത്തിക്കുകയും ചെയ്തു, ബിജുമോന് പറഞ്ഞു. തന്റെ കരിയറിലെ ഏറ്റവും മികച്ച വര്ഷങ്ങളാണ് സഞ്ജുവിന് മുന്നിലുള്ളത് എന്നും അദ്ദേഹം കൂട്ടിച്ചേര്ത്തു.
Click it and Unblock the Notifications
Sign in with Google