ബാങ്കില് ജോലി വേണോ? സൗത്ത് ഇന്ത്യന് ബാങ്കില് പ്രൊബേഷണറി ഓഫീസറാകാം
സൗത്ത് ഇന്ത്യന് ബാങ്ക് സ്കെയില് I കേഡറിലുള്ള പ്രൊബേഷണറി ഓഫീസര് തസ്തികയിലേക്കുള്ള നിയമനത്തിന് അപേക്ഷ ക്ഷണിച്ചു. ഓണ്ലൈന് വഴിയാണ് അപേക്ഷ സമര്പ്പിക്കേണ്ടത്. ജൂലൈ 29 ആണ് അപേക്ഷ സമര്പ്പിക്കാനുള്ള അവസാന തിയതി. യോഗ്യരായ ചാര്ട്ടേഡ് അക്കൗണ്ടന്റുമാര്ക്ക് southindianbank.bank.in എന്ന വെബ്സൈറ്റ് വഴി അപേക്ഷ സമര്പ്പിക്കാം. മറ്റ് മാര്ഗ്ഗങ്ങളിലൂടെയുള്ള അപേക്ഷകള് സ്വീകരിക്കുന്നതല്ല.
2026 ജൂണ് 30-ലെ കണക്കുപ്രകാരം ഉദ്യോഗാര്ത്ഥികളുടെ പ്രായം 30 വയസില് കൂടാന് പാടില്ല. എസ് സി, എസ് ടി വിഭാഗക്കാര്ക്ക് പ്രായപരിധിയില് ഇളവ് ബാധകമാണ്. അഞ്ച് വര്ഷം വരെയാണ് ഇവര്ക്ക് ഇളവ് അനുവദിച്ചിരിക്കുന്നത്. നിയമന നടപടികളുടെ ഭാഗമായി വിളിക്കുമ്പോള്, തങ്ങളുടെ വിഭാഗം തെളിയിക്കുന്നതിനായി അംഗീകൃത അധികാരിയില് നിന്നുള്ള സര്ട്ടിഫിക്കറ്റുകളുടെ സാക്ഷ്യപ്പെടുത്തിയ പകര്പ്പുകള് എസ് സി എസ്ടി വിഭാഗക്കാര് സമര്പ്പിക്കേണ്ടതാണ്.
ഒരു ഷെഡ്യൂള്ഡ് കൊമേഴ്സ്യല് ബാങ്കില് ബാങ്കിംഗ് മേഖലയില് തൊഴില് ആഗ്രഹിക്കുന്ന ചാര്ട്ടേഡ് അക്കൗണ്ടന്റുമാര്ക്ക് മികച്ച അവസരമാണ് സൗത്ത് ഇന്ത്യന് ബാങ്ക് ലിമിറ്റഡ് ഒരുക്കുന്നത്. സിഎ യോഗ്യത നേടിയവര്ക്ക് അപേക്ഷിക്കാം. ഇന്ത്യന് പൗരന്മാരായിരിക്കണം അപേക്ഷകര്.
തിരഞ്ഞെടുക്കപ്പെടുന്ന ഉദ്യോഗാര്ത്ഥികളെ 'സ്കെയില് I' കേഡറിലാണ് നിയമിക്കുക. ഇവര്ക്ക് സ്കെയില് I ഓഫീസര്മാര്ക്ക് ബാധകമായതും ഐബിഎ അംഗീകരിച്ചതുമായ ശമ്പളം ലഭിക്കും. ഇതില് ക്ഷാമബത്ത, വീട്ടുവാടക അലവന്സ്, പ്രത്യേക അലവന്സ്, മറ്റ് അലവന്സുകള് എന്നിവ ഉള്പ്പെടുന്നു. സ്കെയില് I ഓഫീസര്മാര്ക്ക് ബാധകമായ പദ്ധതി പ്രകാരം പ്രകടനത്തെ അടിസ്ഥാനമാക്കിയുള്ള ഇന്സെന്റീവും ലഭിക്കുന്നതാണ്.
തിരഞ്ഞെടുക്കപ്പെടുന്ന ഉദ്യോഗാര്ത്ഥികള് ജോലിയില് പ്രവേശിക്കുന്ന തീയതി മുതല് കുറഞ്ഞത് 2 വര്ഷമെങ്കിലും (സജീവ സേവനം) ബാങ്കില് സേവനമനുഷ്ഠിക്കുമെന്ന് ഉറപ്പുനല്കുന്ന ഒരു സേവന കരാറില് ഒപ്പുവെക്കേണ്ടതുണ്ട്. ഈ കാലാവധി പൂര്ത്തിയാക്കുന്നതിന് മുമ്പ് ജോലി ഉപേക്ഷിക്കുകയാണെങ്കില്, റിക്രൂട്ട്മെന്റ്, പരിശീലന ചെലവുകള് എന്നിവയ്ക്കും ബാങ്കിനുണ്ടായ അവസരനഷ്ടത്തിനുള്ള നഷ്ടപരിഹാരവുമായി 1,50,000 രൂപ അടയ്ക്കേണ്ടതുണ്ട്.
ഈ റിക്രൂട്ട്മെന്റിന് അപേക്ഷാ ഫീസ് ഇല്ല. ഷോര്ട്ട്ലിസ്റ്റിംഗ്, ഗ്രൂപ്പ് ചര്ച്ച, കൂടിക്കാഴ്ച എന്നിവയിലൂടെയായിരിക്കും തിരഞ്ഞെടുപ്പ് നടക്കുക. യോഗ്യതയുണ്ടെന്നതുകൊണ്ട് മാത്രം റിക്രൂട്ട്മെന്റ് പ്രക്രിയയിലേക്ക് വിളിക്കപ്പെടുമെന്ന് ഉറപ്പില്ല. ലഭിച്ച അപേക്ഷകളുടെ എണ്ണം പരിഗണിച്ച്, തിരഞ്ഞെടുപ്പ് പ്രക്രിയയില് മാറ്റം വരുത്താനും പങ്കെടുക്കാന് വിളിക്കുന്നവരുടെ എണ്ണം തീരുമാനിക്കാനുമുള്ള അധികാരം ബാങ്കില് നിക്ഷിപ്തമാണ്.
ഉദ്യോഗാര്ത്ഥികളെ ഷോര്ട്ട്ലിസ്റ്റ് ചെയ്യുന്നത് പൂര്ണ്ണമായും ബാങ്കിന്റെ തീരുമാനത്തിന് വിധേയമായിരിക്കും. യോഗ്യത, തിരഞ്ഞെടുപ്പ് എന്നിവയുമായി ബന്ധപ്പെട്ട കാര്യങ്ങളില് ബാങ്കിന്റെ തീരുമാനമായിരിക്കും അന്തിമം. ഇക്കാര്യത്തില് തുടര്നടപടികളോ ആശയവിനിമയമോ ഉണ്ടായിരിക്കുന്നതല്ല.
ആവശ്യമായ രേഖകള്
സമീപകാലത്ത് എടുത്ത പാസ്പോര്ട്ട് സൈസ് കളര് ഫോട്ടോ (വെള്ള പശ്ചാത്തലം; റെസല്യൂഷന് 378 x 437 പിക്സല്; ഫയല് വലുപ്പം 50KBയില് കൂടരുത്. തൊപ്പിയോ കറുത്ത കണ്ണടയോ ധരിക്കാന് പാടില്ല)
വെള്ള പേപ്പറില് കറുത്ത മഷിയില് ഒപ്പിട്ട ഒപ്പ് (റെസല്യൂഷന് 140 x 110 പിക്സല്; ഫയല് വലുപ്പം 50KBയില് കൂടരുത്)
PDF ഫോര്മാറ്റിലുള്ള റെസ്യൂമെ (ഫയല് വലുപ്പം 1MBയില് കൂടരുത്)
അപേക്ഷകന്റെ സ്വന്തം പേരിലുള്ള, നിലവിലുള്ളതും ഉപയോഗത്തിലുള്ളതുമായ ഇമെയില് ഐഡിയും ഫോണ് നമ്പറും
പ്രായപരിധിയില് ഇളവ് ലഭിക്കാന് അര്ഹതയുള്ള എസ് സി, എസ്ടി ഉദ്യോഗാര്ത്ഥികള്ക്ക് അംഗീകൃത അധികാരിയില് നിന്നുള്ള ജാതി സര്ട്ടിഫിക്കറ്റിന്റെ സാക്ഷ്യപ്പെടുത്തിയ പകര്പ്പ്
Click it and Unblock the Notifications
Sign in with Google