ഓഫീസ് അസിസ്റ്റാന്റായി കേന്ദ്ര സർക്കാർ ജോലി; യോഗ്യത പത്താംക്ലാസ് മാത്രം: ബാങ്ക് ഓഫ് ബറോഡയില്‍ 500 ഒഴിവ്

കേന്ദ്ര സർക്കാറിന് കീഴില്‍ പ്രവർത്തിക്കുന്ന ബാങ്ക് ഓഫ് ബറോഡയില്‍ ജോലി നേടാന്‍ സുവർണ്ണാവസരം. ഓഫീസ് അസിസ്റ്റന്റ് (പ്യൂൺ) തസ്തികകളിലേക്ക് 500 ഒഴിവുകളിലേക്കുള്ള റിക്രൂട്ട്മെന്റ് വിജ്ഞാപനം ബാങ്ക് പുറത്തിറക്കി. ഇന്ത്യയിലുടനീളമുള്ള ബാങ്കിന്റെ വിവിധ ബ്രാഞ്ചുകളിലും ഓഫീസുകളിലുമായിരിക്കും നിയമനം.

യോഗ്യതയുള്ള ഉദ്യോഗാർത്ഥികൾക്ക് 2025 മേയ് 3 മുതൽ മേയ് 23 വരെ www.bankofbaroda.in എന്ന ഔദ്യോഗിക വെബ്സൈറ്റ് വഴി ഓൺലൈനായി അപേക്ഷിക്കാം.

ഒഴിവുകൾ: 500 ഓഫീസ് അസിസ്റ്റന്റ് (പ്യൂൺ) തസ്തികകൾ, സബ്-സ്റ്റാഫ് കേഡറിന് കീഴിൽ.

യോഗ്യത: 10-ാം ക്ലാസ് വിജയം. പ്രാദേശിക ഭാഷയിൽ പ്രാവീണ്യം അഭികാമ്യം.

പ്രായപരിധി: 18 മുതൽ 26 വയസ്സ് വരെ (2025 മേയ് 23-ന് അനുസരിച്ച്).

ശമ്പളം: തുടക്ക ശമ്പളം 19500 രൂപ, പതിവ് ഇൻക്രിമെന്റുകളോടെ 37815 രൂപ വരെ. ഇതിന് പുറമേ ഡിഎ, ടിഎ, എൽടിസി, മറ്റ് ആനുകൂല്യങ്ങൾ എന്നിവ ലഭിക്കും.

പ്രൊബേഷൻ കാലയളവ്: 6 മാസം.

അപേക്ഷാ ഫീസ്: ജനറൽ, ഒബിസി വിഭാഗങ്ങൾക്ക് 600 രൂപ; എസ്സി/എസ്ടി/പിഡബ്ല്യുഡി/വനിതാ ഉദ്യോഗാർത്ഥികൾക്ക് 150 രൂപ.

തിരഞ്ഞെടുപ്പ് പ്രക്രിയ

ഉദ്യോഗാർത്ഥികളെ രണ്ട് ഘട്ടങ്ങളിലൂടെയാണ് തിരഞ്ഞെടുക്കുന്നത്:

ഓൺലൈൻ പരീക്ഷ: ഓരോ വിഭാഗത്തിലും മിനിമം യോഗ്യതാ മാർക്ക് നേടണം. സംസ്ഥാനം/കേന്ദ്രഭരണ പ്രദേശം അനുസരിച്ച് ഒഴിവുകളുടെ എണ്ണം, പരീക്ഷയിലെ മാർക്ക്, ബാങ്ക് നിശ്ചയിക്കുന്ന കട്ട്-ഓഫ് എന്നിവയെ ആശ്രയിച്ച് ഷോർട്ട്‌ലിസ്റ്റിംഗ് നടക്കും.

പ്രാദേശിക ഭാഷാ പരീക്ഷ: ഓൺലൈൻ പരീക്ഷയിൽ വിജയിക്കുന്നവർ പ്രാദേശിക ഭാഷയിലെ പ്രാവീണ്യം തെളിയിക്കേണ്ടതുണ്ട്.

ജോലിയുടെ ഉത്തരവാദിത്തം

ഓഫീസ് അസിസ്റ്റന്റുമാർ ബാങ്കിന്റെ ദൈനംദിന പ്രവർത്തനങ്ങളിൽ സഹായിക്കുന്നു. ഫയലുകൾ കൈകാര്യം ചെയ്യുക, ഓഫീസ് അറ്റകുറ്റപ്പണികൾ, സന്ദേശങ്ങൾ കൈമാറുക, മറ്റ് അനുബന്ധ ജോലികൾ എന്നിവ ഇവരുടെ ചുമതലകളിൽ ഉൾപ്പെടുന്നു.

എങ്ങനെ അപേക്ഷിക്കാം

ബാങ്ക് ഓഫ് ബറോഡയുടെ ഔദ്യോഗിക കരിയർ പേജ് (bankofbaroda.in/Career.htm) സന്ദർശിക്കുക.

• പുതിയ അക്കൗണ്ട് രജിസ്റ്റർ ചെയ്യുക.
• അപേക്ഷാ ഫോം കൃത്യമായി പൂരിപ്പിക്കുക.
• ആവശ്യമായ രേഖകൾ അപ്‌ലോഡ് ചെയ്യുക.
• അപേക്ഷാ ഫീസ് അടച്ച് ഫോം സമർപ്പിക്കുക.
• കണ്‍ഫർമേഷന്‍ പേജ് ഡൗൺലോഡ് ചെയ്ത് സൂക്ഷിക്കുക

.
അവസാന തീയതി

വിശദമായ വിജ്ഞാപനം മേയ് 2-ന് ബാങ്ക് ഓഫ് ബറോഡ ഔദ്യോഗിക വെബ്സൈറ്റായ www.bankofbaroda.in-ൽ പ്രസിദ്ധീകരിച്ചു. അപേക്ഷകൾ സമർപ്പിക്കാനുള്ള അവസാന തീയതി 2025 മേയ് 23 (രാത്രി 11:59) ആണ്.

10-ാം ക്ലാസ് യോഗ്യതയുള്ളവർക്ക് ബാങ്കിംഗ് മേഖലയിൽ സുരക്ഷിതവും ആകർഷകവുമായ തൊഴിൽ അവസരമാണ് ബാങ്ക് ഓഫ് ബറോഡ വാഗ്ദാനം ചെയ്യുന്നത്. യോഗ്യതാ മാനദണ്ഡങ്ങൾ, സംസ്ഥാന തിരിച്ചുള്ള ഒഴിവുകൾ, മറ്റ് വിശദാംശങ്ങൾ എന്നിവയ്ക്ക് വെബ്സൈറ്റ് സന്ദർശിച്ച് വിജ്ഞാപനം വിശദമായി പരിശോധിക്കുക.

കെയര്‍ടേക്കര്‍ ഒഴിവ്

ആലപ്പുഴ ജില്ലാ സൈനികക്ഷേമ ഓഫീസിന്റെ അധീനതയിലുള്ള ചെങ്ങന്നൂര്‍ സൈനിക വിശ്രമ കേന്ദ്രത്തിലേക്ക് താല്‍ക്കാലികാടിസ്ഥാനത്തില്‍ കെയര്‍ടേക്കറെ നിയമിക്കുന്നു. താല്‍പര്യമുള്ള വിമുക്തഭടന്മാര്‍ മേയ് ഏഴിന് മുമ്പ് ആലപ്പുഴ ജില്ലാ സൈനികക്ഷേമ ഓഫീസില്‍ അപേക്ഷ നല്‍കുകയോ നേരിട്ട് ബന്ധപ്പെടുകയോ ചെയ്യുക. ഫോണ്‍: 0477-2245673. ഇമെയില്‍: [email protected]

പ്രൊജക്ട് നഴ്സ് വാക്ക് ഇന്‍ ഇന്റര്‍വ്യു

ആരോഗ്യ വകുപ്പിന് കീഴില്‍ പ്രവര്‍ത്തിക്കുന്ന സ്റ്റേറ്റ് ഹെല്‍ത്ത് സിസ്റ്റംസ് റിസോഴ്സ് സെന്റര്‍ കേരളയില്‍ നടക്കുന്ന ഐ.സി.എം.ആര്‍ ഗവേഷണത്തിലേക്ക് പ്രൊജക്ട് നഴ്സിനെ കരാര്‍ അടിസ്ഥാനത്തില്‍ നിയമിക്കുന്നതിന് വാക്ക് ഇന്‍ ഇന്റര്‍വ്യൂ നടത്തും. മൂന്ന് വര്‍ഷ സെക്കന്റ് ക്ലാസ് ജി.എന്‍.എം., ബി.എസ്.സി നഴ്സിംഗ്, പബ്ലിക്ക് ഹെല്‍ത്ത് റിസര്‍ച്ച് എന്നിവയില്‍ മുന്‍ പരിചയമുള്ളവര്‍ക്ക് മുന്‍ഗണന. പ്രായപരിധി 30 വയസ്സ്. ഉദ്യോഗാര്‍ഥികള്‍ മേയ് എട്ടിന് രാവിലെ 11 ന് തൈക്കാട് സ്റ്റേറ്റ് ഹെല്‍ത്ത് സിസ്റ്റംസ് റിസോഴ്സ് സെന്റര്‍ കേരളയില്‍ വാക്ക് ഇന്‍ ഇന്റര്‍വ്യൂന് നേരിട്ട് ഹാജരാകണം. കൂടുതല്‍ വിവരങ്ങള്‍ക്ക് www.shsrc.kerala.gov.in വെബ്സൈറ്റ് സന്ദര്‍ശിക്കുക. ഫോണ്‍: 0471-2323223.