കാനഡയെന്ന വന്മരം വീണു, പകരം ആര്: ഇതാ 4 രാജ്യങ്ങള്, വിദ്യാഭ്യാസ ചിലവും അറിയാം
വർദ്ധിച്ചുവരുന്ന ഭവന പ്രതിസന്ധി അടക്കമുള്ള പ്രശ്നങ്ങള്ക്ക് പരിഹാരമെന്നോണമാണ് അന്താരാഷ്ട്ര വിദ്യാർത്ഥികള്ക്കായി കാനഡ രണ്ട് വർഷത്തെ പ്രവേശന പരിധി നിശ്ചയിച്ചിരിക്കുന്നത്. കാനഡയിലേക്ക് വിദ്യാർത്ഥി വിസകള്ക്ക് അപേക്ഷിക്കുന്നവർ കൂടുതലും ഇന്ത്യക്കാർ ആയതിനാല് തന്നെ സ്വാഭാവികമായും പുതിയ തീരുമാനം വലിയ തിരിച്ചടിയായി മാറിയിരിക്കുന്നത് മലയാളികള് അടക്കമുള്ള ഇന്ത്യക്കാർക്കാണ്.
കാനഡയിലെ മൊത്തം അന്താരാഷ്ട്ര വിദ്യാർത്ഥികളുടെ 40 ശതമാനവും ഇന്ത്യയിൽ നിന്നുള്ളവരാണ്. ലോകത്തെ എല്ലാ രാജ്യങ്ങളുടേയും കണക്ക് എടുക്കുമ്പോള് ഏറ്റവും കൂടുതല് ഇന്ത്യന് വിദ്യാർത്ഥികള് പഠിക്കുന്ന രാജ്യവും കാനഡയാണ്. 2024-ൽ 364000 പുതിയ പെർമിറ്റുകൾക്ക് മാത്രമായിരിക്കും അംഗീകാരം നല്കുകയെന്നാണ് ഇമിഗ്രേഷൻ മന്ത്രി മാർക്ക് മില്ലർ പങ്കുവെച്ച വിവരങ്ങള് ലഭ്യമാക്കുന്നത്. ഇത് കാനഡയില് പഠിക്കാന് ആഗ്രഹിക്കുന്നവരുടെ മോഹങ്ങള്ക്ക് ഏല്ക്കേണ്ടി വരുന്ന ഏറ്റവും വലിയ തിരിച്ചടിയാണ്.
അതേമയം, കാനഡ പോലെ, ഇന്ത്യൻ വിദ്യാർത്ഥികൾക്കായി നിരവധി ജനപ്രിയ പഠന കേന്ദ്രങ്ങള് വേറെയുമുണ്ട്. ഓസ്ട്രേലിയ, ന്യൂസിലാൻഡ്, യുകെ, യുഎസ്എ തുടങ്ങിയവയാണ് കാനഡയില്ലെങ്കില് സ്വാഭാവികമായും ഇന്ത്യന് വിദ്യാർത്ഥികള് കുടിയേറാന് ശ്രമിക്കുന്ന മറ്റ് രാജ്യങ്ങള്. അത്തരത്തില് പ്രധാനപ്പെട്ട ചില രാജ്യങ്ങളെ ഇവിടെ പരിചയപ്പെടാം.
ഓസ്ട്രേലിയ: ഓസ്ട്രേലിയയിൽ 2023-ൽ ഏകദേശം 1.24 ലക്ഷം ഇന്ത്യൻ വിദ്യാർത്ഥികൾ (ആകെ 7.68 ലക്ഷം) പഠിക്കുന്നുണ്ടെന്ന് ഓസ്ട്രേലിയൻ ഗവൺമെൻ്റിൻ്റെ വിദ്യാഭ്യാസ വകുപ്പിൻ്റെ കണക്കുകൾ വെളിപ്പെടുത്തുന്നു. ഓസ്ട്രേലിയയിൽ എംബിഎയ്ക്ക് പഠിക്കാനുള്ള ശരാശരി ചെലവ് ഒരു വർഷത്തേക്ക് $60,000 (അല്ലെങ്കിൽ ₹33 ലക്ഷം) ആണ്.
തിരഞ്ഞെടുത്ത ബാച്ചിലേഴ്സ് ബിരുദങ്ങൾക്ക് 2-4 വർഷവും തിരഞ്ഞെടുത്ത ബിരുദാനന്തര ബിരുദങ്ങൾക്ക് 3-5 വർഷവും എല്ലാ പിഎച്ച്ഡികൾക്കും 4-6 വർഷവും താമസത്തിനുള്ള അനുമതിയും വിദ്യാർത്ഥികൾക്ക് ലഭിക്കും. യൂണിവേഴ്സിറ്റി ഓഫ് സിഡ്നി, യൂണിവേഴ്സിറ്റി ഓഫ് മെൽബൺ, യുഎൻഎസ്ഡബ്ല്യു, മോനാഷ്, ക്വീൻസ്ലാൻഡ് എന്നിവയാണ് രാജ്യത്തെ പ്രധാനപ്പെട്ട സർവ്വകലാശാലകള്.
ന്യൂസിലാൻഡ്: താരതമ്യേന ചെറിയ രാജ്യമാണ് ന്യൂസിലാൻഡ്. അതായത് എട്ട് സർവകലാശാലകൾ മാത്രമുള്ള ഒരു ദ്വീപ് രാഷ്ട്രമാണിത്. ഓസ്ട്രേലിയയുമായി താരതമ്യം ചെയ്യുമ്പോള് താരതമ്യേന ചിലവ് കുറവാണ് ന്യൂസിലന്ഡില്. ഒരു എംബിഎ കോഴ്സിനുള്ള ചെലവ് ഇന്ത്യയിലെ സർവ്വകലാശാലകൾ ഈടാക്കുന്നതിന് സമാനമായി NZ$50,000 (₹25 ലക്ഷം) വരെയായിരിക്കും. പഠനം പൂർത്തിയാക്കിയ ശേഷം, വിദ്യാർത്ഥികൾക്ക് തൊഴിൽ വിസയിൽ മൂന്ന് വർഷം വരെ രാജ്യത്ത് താമസിക്കാം. ഓക്ക്ലാൻഡ് യൂണിവേഴ്സിറ്റി, വിക്ടോറിയ യൂണിവേഴ്സിറ്റി ഓഫ് വെല്ലിംഗ്ടൺ, മാസി യൂണിവേഴ്സിറ്റി എന്നിവയാണ് പ്രധാനപ്പെട്ട സർവ്വകലാശാലകള്.
യുണൈറ്റഡ് കിംഗ്ഡം (യുകെ): 2021 രണ്ട് വർഷത്തെ പോസ്റ്റ് സ്റ്റഡി വർക്ക് വിസ ബ്രിട്ടീഷ് സർക്കാർ പുനരാരംഭിച്ചതുമുതൽ, ഇന്ത്യൻ വിദ്യാർത്ഥികളുടെ വലിയ പ്രവാഹമാണ് യുകെയിലേക്കുള്ളത്. നിങ്ങൾ തിരഞ്ഞെടുക്കുന്ന കോഴ്സിനെയും യൂണിവേഴ്സിറ്റിയെയും അടിസ്ഥാനമാക്കി യുകെയിൽ പഠിക്കാനുള്ള ട്യൂഷൻ ഫീസ് പ്രതിവർഷം ഏകദേശം ₹20-25 ലക്ഷം വരും. എന്നാൽ ഓക്സ്ഫോർഡ്, കേംബ്രിഡ്ജ് തുടങ്ങിയ മുൻനിര സർവകലാശാലകൾ വളരെ ഉയർന്ന തുകയാണ് ഈടാക്കുന്നത്. ഉദാഹരണത്തിന്, ഓക്സ്ഫോർഡ് യൂണിവേഴ്സിറ്റിയിലെ ഒരു എംബിഎയ്ക്ക് ട്യൂഷനു മാത്രമായി ഏകദേശം 83 ലക്ഷം രൂപ (£78,510) ചിലവാകും.
2022ൽ യുകെയിലെ വിദ്യാർത്ഥി വിസകളുടെ എണ്ണത്തിൽ 54 ശതമാനം വർധനയുണ്ടായി. 2022ൽ മാത്രം 1.39 ലക്ഷമാണ് ബ്രിട്ടീഷ് സർവ്വകലാശാലകളിൽ പ്രവേശിച്ച ഇന്ത്യൻ വിദ്യാർത്ഥികളുടെ എണ്ണം. ഓക്സ്ഫോർഡ്, കേംബ്രിഡ്ജ്, കിംഗ്സ് കോളേജ്, എൽഎസ്ഇ, യുസിഎൽ, യൂണിവേഴ്സിറ്റി ഓഫ് മാഞ്ചസ്റ്റർ എന്നിവയാണ് പ്രധാനപ്പെട്ട സർവ്വകലാശാലകള്.
യുഎസ്എ: യുഎസ് സർവ്വകലാശാലകളിൽ 2.68 ലക്ഷത്തിലധികം ഇന്ത്യൻ വിദ്യാർത്ഥികൾ ചേർന്നിട്ടുണ്ടെന്ന് റിപ്പോർട്ട്. OPT (ഓപ്ഷണൽ പ്രായോഗിക പരിശീലനം) തിരഞ്ഞെടുത്തവരിൽ ഏറ്റവും കൂടുതലും ഇന്ത്യൻ വിദ്യാർത്ഥികളാണ്. അമേരിക്കൻ സർവ്വകലാശാലകളിൽ പഠിക്കുന്നതിൻ്റെ പ്രധാന നേട്ടങ്ങളിലൊന്നായ ഒരു വർഷത്തെ താൽക്കാലിക ജോലിയിൽ ഏർപ്പെടാൻ അവരെ ഇതിലൂടെ പ്രാപ്തരാക്കുന്നു.
പണത്തിന്റെ കാര്യം നോക്കുകയാണെങ്കില് യുഎസ് സർവ്വകലാശാലകൾ വളരെ ചെലവേറിയതാണ്. നാല് വർഷത്തെ ബിരുദ കോഴ്സാണ് രാജ്യത്തുള്ളത്. മികച്ച കോളേജുകൾക്ക് പ്രതിവർഷം 40 ലക്ഷം രൂപ വരെ വാർഷിക ട്യൂഷൻ ഫീസ് വേണ്ടി വരും. യുഎസിലെ അറിയപ്പെടുന്ന ചില സർവ്വകലാശാലകളിൽ ഹാർവാർഡ്, യേൽ, എംഐടി, സ്റ്റാൻഫോർഡ്, പ്രിൻസ്റ്റൺ, പെൻ, കോർണൽ, ബ്രൗൺ, ചിക്കാഗോ എന്നിവ ഉൾപ്പെടുന്നു.
Click it and Unblock the Notifications
Sign in with Google