കാനഡയില് ഇനി പ്രതീക്ഷ വേണോ? ചിലവ് കുറയുമോ? ഇല്ലെങ്കില് എങ്ങോട്ട് പോകണം, വിദഗ്ധർ പറയുന്നത്
പാർപ്പിട പ്രതിസന്ധി രൂക്ഷമാകുന്നതിനിടയിലാണ് കാനഡ അന്താരാഷ്ട്ര വിദ്യാർത്ഥി പ്രവേശനത്തിന് രണ്ട് വർഷത്തെ പരിധി ഏർപ്പെടുത്തുന്നത്. ഇന്ത്യയും കാനഡയും തമ്മിലുള്ള സമീപകാല നയതന്ത്ര സംഘർഷങ്ങൾ കനേഡിയൻ പഠന വിസകൾ തേടുന്ന ഇന്ത്യൻ വിദ്യാർത്ഥികളുടെ എണ്ണത്തിൽ ഗണ്യമായ കുറവുണ്ടാക്കുന്നതിനിടയിലാണ് പുതിയ നിയന്ത്രണങ്ങളും വരുന്നത്.
കാനഡയിലെ വിദ്യാർത്ഥികളുടെ ഭവന പ്രതിസന്ധി സമീപകാലത്ത് കൂടുതൽ വെല്ലുവിളി നിറഞ്ഞതായിത്തീർന്നിരിക്കുന്നുവെന്നാണ് ദ ഫ്രീ പ്രസ് ജേണലിന് നല്കിയ അഭിമുഖത്തില് ജനപ്രിയ സ്റ്റുഡന്റ് അക്കമഡേഷന് പ്ലാറ്റ് ഫോമായ യൂണിവേഴ്സിറ്റി ലിവിംഗ് സിഇഒ സൗരഭ് അറോറ വ്യക്തമാക്കുന്നത്. വർദ്ധിച്ചുവരുന്ന വാടക ചെലവുകൾ, താമസ സൗകര്യങ്ങളുടെ പരിമിതമായ ലഭ്യത, കനേഡിയൻ സർവ്വകലാശാലകൾ തിരഞ്ഞെടുക്കുന്ന അന്തർദേശീയ വിദ്യാർത്ഥികളുടെ വർദ്ധിച്ചുവരുന്ന എണ്ണം എന്നിവയാണ് അടിസ്ഥാനപരമായ പ്രശ്നങ്ങള്ക്ക് കാരണമെന്നും അദ്ദേഹം പറയുന്നു.
ചുരുക്കിപ്പറഞ്ഞാല് ആവശ്യത്തിന് വീടുകള് ലഭ്യമല്ല എന്നുള്ളത് തന്നെയാണ് സ്ഥിതി. ഈ വെല്ലുവിളികളെ നേരിടാൻ, കാനഡയിലെ വിദ്യാർത്ഥികൾ കാമ്പസ് റെസിഡന്സ്, സ്വകാര്യ വാടക റൂം, ഹോംസ്റ്റേകൾ, മറ്റ് താമസ സൗകര്യങ്ങൾ (PBSAs) എന്നിവയുൾപ്പെടെ വിവിധ താമസ സൗകര്യങ്ങൾ തേടിക്കൊണ്ടിരിക്കുകയാണ്. ഇതിനും കഴിയാത്ത ചിലർ ടെന്റുകളിലും കഴിയുന്നതായുള്ള റിപ്പോർട്ടുണ്ട്.
വിദ്യാർത്ഥികള്ക്ക് രണ്ട് വർഷത്തേക്ക് ഏർപ്പെടുത്തിയ നിയന്ത്രണം പലവിധത്തിലുള്ള ആശങ്കകള്ക്ക് ഇടയാക്കുന്നതാണ്. അന്തർദ്ദേശീയ വിദ്യാർത്ഥികൾക്ക് കാനഡയെ ആകർഷകമായ ലക്ഷ്യസ്ഥാനമാക്കി മാറ്റിയ നയം ഉയർത്തിപ്പിടിക്കാൻ സമതുലിതമായതും നിഷ്പക്ഷവുമായ സമീപനം നിലനിർത്തുകയാണ് വേണ്ടെന്നും അറോറ പറഞ്ഞു.
ഉയർന്ന നിലവാരമുള്ള വിദ്യാഭ്യാസ സമ്പ്രദായവും മികച്ച അന്തരീക്ഷവും കാരണം കാനഡ പരമ്പരാഗതമായി അന്തർദ്ദേശീയ വിദ്യാർത്ഥികൾക്ക് ആകർഷകമായ സ്ഥലമായി കാണക്കാക്കുന്നു. എന്നിരുന്നാലും, താമസം, ട്യൂഷൻ ഫീസ്, മറ്റ് ചെലവുകൾ എന്നിവയുൾപ്പെടെ വർദ്ധിച്ചുവരുന്ന ജീവിതച്ചെലവ് വിദ്യാർത്ഥികൾക്ക്, പ്രത്യേകിച്ച് പരിമിതമായ സാമ്പത്തിക സ്രോതസ്സുള്ളവർക്ക് വെല്ലുവിളികൾ ഉയർത്തുന്ന ഘടകമാണ് എന്നാണ് കാനഡ ഇപ്പോഴും അന്തർദ്ദേശീയ വിദ്യാർത്ഥികൾക്ക് താങ്ങാനാകുന്ന ചിലവുള്ള സ്ഥലമാണോ എന്ന ചോദ്യത്തിന് അദ്ദേഹം മറുപടി നല്കുന്നത്.
രണ്ട് വർഷത്തെ പരിധി ഉയരുന്ന ഭവന പ്രതിന്ധി പരിഹരിക്കുന്നതിനുള്ള ഒരു ചുവടുവയ്പ്പാണെങ്കിലും അത് എത്രത്തോളം സഹായകരമാകുമെന്ന് അറിയില്ല. അന്തർദ്ദേശീയ വിദ്യാർത്ഥികൾക്ക് താങ്ങാനാവുന്ന വിദ്യാഭ്യാസവും താമസസൗകര്യവും ലഭ്യമാക്കാൻ കഴിയുമെന്ന് ഉറപ്പാക്കുന്നത് ഉന്നതവിദ്യാഭ്യാസ മേഖലയില് അനിവാര്യമാണ്.
കാനഡയ്ക്ക് പകരം ജർമ്മനി, ഫ്രാൻസ്, അയർലൻഡ്, ദുബായ്, മാൾട്ട, സ്പെയിൻ, സിംഗപ്പൂർ, ന്യൂസിലാൻഡ് എന്നിവ തിരഞ്ഞെടുക്കപ്പെടുന്ന നിരവധി പേരുണ്ട്. ജർമ്മനി അഭിവൃദ്ധി പ്രാപിക്കുന്ന ഒരു അക്കാദമിക് ലാൻഡ്സ്കേപ്പ് വാഗ്ദാനം ചെയ്യുന്നു. കൂടാതെ താരതമ്യേന കുറഞ്ഞ ചിലവും ഇന്ത്യന് വിദ്യാർത്ഥികളുടെ കുടിയേറ്റത്തില് 107 ശതമാനത്തിന്റെ വർധനവാണ് ഉണ്ടാക്കിയിരിക്കുന്നത്.
വേഗതയേറിയ വിസ പ്രക്രിയയും (30-60 ദിവസം) കുറഞ്ഞ ജീവിതച്ചെലവുമുള്ള സ്പെയിൻ സ്വാഗതാർഹമായ മറ്റൊരു ഓപ്ഷനാണ്. ഊർജ്ജസ്വലമായ സാംസ്കാരിക അനുഭവങ്ങൾ തേടുന്നവർക്ക്, ദുബായ് അതിൻ്റെ കാര്യക്ഷമമായ വിസ നടപടിക്രമങ്ങളും (15-20 ദിവസം) ചലനാത്മകമായ വിദ്യാഭ്യാസ അടിസ്ഥാന സൗകര്യങ്ങളും കൊണ്ട് വേറിട്ടുനിൽക്കുന്നു. സിംഗപ്പൂർ ഏഷ്യയിലെ അക്കാദമിക് പവർ ഹൗസാണ്. ഒരു വർഷത്തിനുള്ളിൽ ഇന്ത്യൻ വിദ്യാർത്ഥികളുടെ എണ്ണം അവിടെ പതിന്മടങ്ങ് വർധിച്ചു. 2030 ഓടെ 30,000 ഇന്ത്യൻ വിദ്യാർത്ഥികൾക്ക് ആതിഥേയത്വം വഹിക്കാൻ ഫ്രാൻസും തയ്യാറാണ്. ന്യൂസിലൻഡും അയർലൻഡും ഇക്കൂട്ടത്തിലുണ്ടെന്നും അറോറ വ്യക്തമാക്കി.
കാനഡ അടുത്തിടെ ഏർപ്പെടുത്തിയ പരിധി തങ്ങളുടെ സ്ഥാപനമായ യൂണിവേഴ്സിറ്റി ലിവിംഗിനെ കാര്യമായി ബാധിക്കില്ല. കാരണം അത്തരം സംഭവവികാസങ്ങൾ ഞങ്ങൾ നേരത്തെ തന്നെ പ്രതീക്ഷിച്ചിരുന്നു. താമസസൗകര്യങ്ങളുടെ ശക്തമായ വിതരണം ഉറപ്പാക്കിക്കൊണ്ട് ഞങ്ങൾ സാഹചര്യത്തെ മുൻകൂട്ടി കണ്ടു. നിലവിൽ, ഞങ്ങൾ ആഗോളതലത്തിൽ 2 ദശലക്ഷത്തിലധികം ബെഡ് സ്പെയിസുകള് വാഗ്ദാനം ചെയ്യുന്നുവെന്നും അദ്ദേഹം കൂട്ടിച്ചേർത്തു.
Click it and Unblock the Notifications
Sign in with Google