എറണാകുളത്ത് ജോലി നോക്കുകയാണോ? 69,000 രൂപ ശമ്പളം ലഭിക്കും; വേണ്ടത് ഈ യോഗ്യത

കൊച്ചി വാട്ടർ മെട്രോയിൽ ഒഴിവുകൾ. കൺസൾട്ടന്റ് (സിവിൽ), ജൂനിയർ കൺസൾട്ടന്റ് തസ്തികകളിലേക്കാണ് നിയമനം. ഒരു വർഷത്തേക്ക് കരാർ നിയമനമായിരിക്കും. യോഗ്യത, അപേക്ഷിക്കാനുള്ള അവസാന തീയതി, ശമ്പളം തുടങ്ങിയ വിവരങ്ങൾ വിശദമായി അറിയാം

രണ്ട് തസ്തികയിലേക്കും ഒന്ന് വീതം ഒഴിവുകളാണ് ഉള്ളത്. കൺസൾട്ടന്റ് (സിവിൽ) തസ്തികയിൽ സിവിൽ എഞ്ചിനിയറിംഗിൽ ബിരുദം അല്ലെങ്കിൽ തതുല്യ യോഗ്യത ഉണ്ടായിരിക്കണം. റിട്രോഫിറ്റിംഗ് ടെക്നിക്കുകൾ ഉൾപ്പെടെയുള്ള സിവിൽ പ്രോജക്റ്റുകളുടെ രൂപകൽപന, എസ്റ്റിമേറ്റ്, ആസൂത്രണം, നിർമ്മാണം, നിർവ്വഹണം, മാനേജ്മെന്റ് എന്നിവയിൽ 15 വർഷത്തെ പ്രവൃത്തിപരിചയവും ആവശ്യമാണ്.

കൂടാതെ സർക്കാർ സ്ഥാപനങ്ങളായ സിപിഡബ്ല്യുഡി/അർധസർക്കാർ സ്ഥാപനങ്ങൾ/പിഎസ്യുകൾ/സ്വയംഭരണ സ്ഥാപനങ്ങൾ / സർവ്വകലാശാലകൾ തുടങ്ങിയ സ്ഥാപനങ്ങളിൽ അടിസ്ഥാന സൗകര്യ വികസനം / മാനേജ്‌മെൻ്റ് ഉൾപ്പെടെയുള്ള സിവിൽ കൺസ്ട്രക്ഷൻ ജോലികളിലും പ്രവൃത്തിപരിചയം ഉള്ളവരായിരിക്കണം.

ജൂനിയർ കൺസൾട്ടന്റ് തസ്തികയിൽ അപേക്ഷിക്കുന്ന ഉദ്യോഗാർത്ഥികൾ ഇലക്ട്രോണിക്സ് ആൻഡ് കമ്മ്യൂണിക്കേഷൻ / ഇലക്ട്രോണിക്സ് ആൻഡ് ഇൻസ്ട്രുമെൻ്റേഷൻ / കമ്പ്യൂട്ടർ സയൻസ് / കമ്പ്യൂട്ടർ ആപ്ലിക്കേഷൻ / ഇലക്ട്രോണിക്സ് / ഇൻസ്ട്രുമെൻ്റേഷൻ എന്നിവയിലേതെങ്കിലും ഡിപ്ലോമയോ അല്ലെങ്കിൽ ബിരുദമോ നേടിയിരിക്കണം.

ബിടെക് ബിരുദധാരികൾക്ക്
ആധുനിക ടെലികോം/ ഐടി ഇൻഫ്രാസ്ട്രക്ചർ, ഇഎൽവി സിസ്റ്റങ്ങൾ (സി സി ടി വി, ആക്‌സസ് കൺട്രോൾ സിസ്റ്റംസ്, ഐപിപിബിഎക്സ്) വയർലെസ് കമ്മ്യൂണിക്കേഷൻ സിസ്റ്റംസ്, ഓട്ടോമാറ്റിക് ഫെയർ കളക്ഷൻ സിസ്റ്റംസ്, മോഡേൺ ട്രാൻസ്‌പോർട്ട് മാനേജ്‌മെൻ്റ് സിസ്റ്റങ്ങൾ എന്നിവയുടെ പ്രവർത്തനങ്ങൾ, പരിപാലനം എന്നിവയിൽ 8 വർഷത്തെ പ്രവൃത്തി പരിചയം ആവശ്യമാണ്. ഡിപ്ലോമ യോഗ്യതയാണ് ഉള്ളതെങ്കിൽ 10 വർഷത്തെ പ്രവൃത്തിപരിചയമാണ് ആവശ്യം. ഇതിൽ തന്നെ മുകളിൽ പറഞ്ഞ മേഖലകളിൽ 5 വർഷത്തെ പ്രവൃത്തിപരിചയം വേണം.

കൺസൾട്ടന്റ് തസ്തികയിൽ അപേക്ഷിക്കാനുള്ള ഉയർന്ന പ്രായപരിധി 63 വയസാണ്. 69,000 രൂപയാണ് ശമ്പളം ലഭിക്കുക. ജൂനിയർ കൺസൾട്ടന്റ് തസ്തികയിൽ അപേക്ഷിക്കുന്നതിന് അപേക്ഷിക്കുന്നതിനള്ള ഉയർന്ന പ്രായപരിധി 56 ഉം. 63,000 ആണ് ശമ്പളം.

അപേക്ഷിക്കേണ്ടത് ഇങ്ങനെ

ഓൺലൈനായാണ് കൊച്ചി വാട്ടർമെട്രോയിലേക്ക് അപേക്ഷിക്കേണ്ടത്. ഔദ്യോഗിക വെബ്സൈറ്റിൽ വിജ്ഞാപനം പ്രസിദ്ധീകരിച്ചിട്ടുണ്ട്. അപേക്ഷിക്കാനുള്ള അവസാന തീയതി ഒക്ടോബർ 9 ആണ്.

ട്രെയിനികൾക്കും അവസരം

ബോട്ട് ഓപറേഷൻ ട്രെയിനി തസ്തികയിലേക്കും അപേക്ഷ ക്ഷണിച്ചിട്ടുണ്ട്. സ്ത്രീകൾക്കും പുരുഷൻമാർക്കും അപേക്ഷിക്കാം. അപേക്ഷിക്കാനുള്ള ഉയർന്ന പ്രായപരിധി 28 വയസാണ്. നിലവിൽ 50 ഒഴിവുകളാണ് ഉളളത്. ഇഎസ്ഐയും ഇപിഎഫും ഉൾപ്പെടെ 9000 രൂപ സ്റ്റൈപന്റായി ലഭിക്കും. ഒക്ടോബർ 9 ആണ് അപേക്ഷിക്കാനുള്ള അവസാന തീയതി.