കൊച്ചി പോർട്ട് അതോറിറ്റിയിൽ ഇതാ ജോലി ഒഴിവ്; 1.60 ലക്ഷം വരെ ശമ്പളം..ഇപ്പോൾ അപേക്ഷിക്കാം

കൊച്ചിൻ പോർട്ട് അതോറിറ്റി വിവിധ പ്രൊഫഷണൽ തസ്തികകളിലേക്ക് അപേക്ഷ ക്ഷണിച്ചു. കരാർ അടിസ്ഥാനത്തിലാണ് നിയമനം. സീനിയർ മാനേജർ, വിവരസാങ്കേതികവിദ്യ മാനേജർ, കോർപ്പറേറ്റ് ലീഗൽ മാനേജർ എന്നീ തസ്തികകളിലാണ് ഒഴിവ്.. അപേക്ഷ സമർപ്പിക്കേണ്ട അവസാന തീയതി ഫെബ്രുവരി 16 ആണ്. യോഗ്യത, ശമ്പളം, അപേക്ഷിക്കേണ്ടത് എങ്ങനെ തുടങ്ങിയ വിവരങ്ങൾ അറിയാം

സീനിയർ മാനേജർ (ബിസിനസ്സ് വികസനം, വ്യാപാര പ്രോത്സാഹനം) തസ്തികയ്ക്ക് അംഗീകൃത ബിരുദവും ബിരുദാനന്തര ബിരുദം/എംബിഎ/തത്തുല്യ യോഗ്യതയും നിർബന്ധമാണ്. ഇൻസ്റ്റിറ്റ്യൂട്ട് ഓഫ് ചാർട്ടേഡ് ഷിപ്പ് ബ്രോക്കേഴ്സ് അല്ലെങ്കിൽ ലോജിസ്റ്റിക്സ് ആൻഡ് ട്രാൻസ്പോർട്ടിൽ നിന്ന് പരീക്ഷ വഴി നേടിയ പ്രൊഫഷണൽ അംഗത്വം (ഓണററി അംഗത്വം തള്ളിക്കളയും) അഭികാമ്യം.

ഈ തസ്തികയിലേക്ക് സേവന, പൊതു, സ്വകാര്യ മേഖലകളിലെ ബിസിനസ്സ് വികസന പ്രവൃത്തിപരിചയം അനിവാര്യമാണ്. തുറമുഖ/ഷിപ്പിംഗ് മേഖലയിലെ പരിചയം അധിക യോഗ്യതയായി പരിഗണിക്കും. ഉയർന്ന പ്രായപരിധി 45 വയസ്സും പ്രതിമാസ ശമ്പളം 1,60,000 രൂപയുമാണ്.

മാനേജർ (വിവരസാങ്കേതികവിദ്യ) തസ്തികയ്ക്ക് കമ്പ്യൂട്ടർ സയൻസ് & എഞ്ചിനീയറിംഗ്/ഇൻഫർമേഷൻ ടെക്നോളജിയിലോ അനുബന്ധ വിഷയത്തിലോ അംഗീകൃത സർവകലാശാലയിൽ നിന്നുള്ള ഒന്നാം ക്ലാസ് ബി.ഇ/ബി.ടെക് ബിരുദം അനിവാര്യമാണ്. ഇതേ വിഷയങ്ങളിൽ ബിരുദാനന്തര ബിരുദം അഭികാമ്യമായിരിക്കും.

പ്രോഗ്രാമിംഗ്, ഇലക്ട്രോണിക് ഡാറ്റാ പ്രോസസ്സിംഗ്, നെറ്റ്‌വർക്ക്, സിസ്റ്റം ഡിസൈൻ & അനാലിസിസ് തുടങ്ങിയ ഐടി മേഖലകളിൽ വ്യാവസായിക/വാണിജ്യ സ്ഥാപനങ്ങളിൽ എക്സിക്യൂട്ടീവ് തലത്തിൽ പ്രവൃത്തിപരിചയം നിർബന്ധമാണ്. തുറമുഖ/ഷിപ്പിംഗ് മേഖലയിലെ പരിചയത്തിന് മുൻഗണന ലഭിക്കും.

മാനേജർ (കോർപ്പറേറ്റ് ലീഗൽ) തസ്തികയ്ക്ക് നിയമ ബിരുദം അനിവാര്യമാണ്. കോർപ്പറേറ്റ്/മാരിടൈം നിയമത്തിൽ ബിരുദം അഭികാമ്യം. കോർപ്പറേറ്റുകളുടെ നിയമ വിഭാഗത്തിലെ പ്രവൃത്തിപരിചയം നിർബന്ധം. തുറമുഖ/ഷിപ്പിംഗ് മേഖലയിലെ പരിചയവും അഭിഭാഷകനായി പ്രാക്ടീസ് ചെയ്ത പരിചയവും അധിക യോഗ്യതയാണ്. വിവരസാങ്കേതികവിദ്യ, കോർപ്പറേറ്റ് ലീഗൽ മാനേജർ തസ്തികകൾക്ക് ഉയർന്ന പ്രായപരിധി 40 വയസ്സും പ്രതിമാസ ശമ്പളം 1,20,000 രൂപയുമാണ്. വിശദാംശങ്ങൾക്കായി ഔദ്യോഗിക വെബ്സൈറ്റ് സന്ദർശിക്കുക. കൂടുതൽ വിവരങ്ങൾക്ക് https://www.cochinport.gov.in/sites/default/files/2026-01/Proffessional%20Functionary.pdf

ഗസ്റ്റ് ലക്ചറർ നിയമനം

തിരുവനന്തപുരം സർക്കാർ സംസ്കൃത കോളേജിൽ ന്യായ വിഭാഗത്തിൽ നിലവിലുള്ള ഒഴിവിലേക്ക് ഗസ്റ്റ് ലക്ചറർമാരെ നിയമിക്കുന്നു. ഇതിനായി ഉദ്യോഗാർഥികളുടെ അഭിമുഖം 27ന് പകൽ 11ന് പ്രിൻസിപ്പാളിന്റെ ചേമ്പറിൽ വച്ച് നടത്തുന്നു. കോളേജ് വിദ്യാഭ്യാസ വകുപ്പിന്റെ മേഖലാ ഓഫീസിൽ ഗസ്റ്റ് അധ്യാപകരുടെ പാനലിൽ രജിസ്റ്റർ ചെയ്തിട്ടുള്ള ഉദ്യോഗാർഥകൾ യോഗ്യത, ജനന തീയതി, മുൻപരിചയം എന്നിവ തെളിയിക്കുന്നതിനുള്ള അസ്സൽ സർട്ടിഫിക്കറ്റുകൾ പകർപ്പ് സഹിതം അഭിമുഖത്തിന് ഹാജരാകേണ്ടതാണ്. കൂടുതൽ വിവരങ്ങൾക്ക്: 0471 2322930, 9188900159.

അക്കൗണ്ടന്റ് നിയമനം

പാലക്കാട്; ജില്ലയിലെ തദ്ദേശസ്വയംഭരണ സ്ഥാപനങ്ങളിലെ കുടുംബശ്രീ സിഡിഎസുകളിലേക്ക് അക്കൗണ്ടന്റ് തസ്തികയില്‍ നിയമനം നടത്തുന്നു. അയല്‍ക്കൂട്ട അംഗമോ ഓക്സിലറി ഗ്രൂപ്പ് അംഗമോ ആയവര്‍ക്ക് അപേക്ഷിക്കാം. മണ്ണാര്‍ക്കാട് ബ്ലോക്ക് (രണ്ട്), അട്ടപ്പാടി ബ്ലോക്ക് (രണ്ട്), പട്ടാമ്പി ബ്ലോക്ക് (ഒന്ന്) എന്നിങ്ങനെയാണ് ഒഴിവുകളുള്ളത്. അംഗീകൃത സര്‍വ്വകലാശാലകളില്‍ നിന്നുള്ള ബി-കോം ബിരുദവും കമ്പ്യൂട്ടര്‍ പരിജ്ഞാനം, ടാലി യോഗ്യതയും, അക്കൗണ്ടിങ്ങില്‍ രണ്ട് വര്‍ഷത്തെ പ്രവൃത്തി പരിചയവുമാണ് യോഗ്യത. 2025 സെപ്തംബര്‍ ഒന്നിന് 36 വയസ്സ് കവിയരുത്. പട്ടികജാതി, പട്ടികവര്‍ഗ്ഗം മറ്റ് പിന്നോക്ക സമുദായങ്ങള്‍, ഭിന്നശേഷിക്കാര്‍, വിധവകള്‍ എന്നിവര്‍ക്ക് പ്രായപരിധിയില്‍ ഇളവ് ലഭിക്കും. അപേക്ഷാഫോറം www.kudumbashree.org ല്‍ ലഭിക്കും. അപേക്ഷകള്‍ ജനുവരി 27 വൈകീട്ട് അഞ്ചിനകം ജില്ലാമിഷന്‍ കോര്‍ഡിനേറ്റര്‍, കുടുംബശ്രീ ജില്ലാമിഷന്‍ ഓഫീസ്, സിവില്‍ സ്റ്റേഷന്‍, പാലക്കാട് 678001 എന്ന വിലാസത്തില്‍ ലഭ്യമാക്കണമെന്ന് ജില്ലാ മിഷന്‍ കോര്‍ഡിനേറ്റര്‍ അറിയിച്ചു.

English summary

Kochi Port Authority invites applications for contract appointments across three roles: Senior Manager (Business Development), IT Manager, and Corporate Legal Manager. Details include required qualifications, experience, age limits, monthly pay, and the application deadline of 16 February 2024. The roles emphasise sectors such as ports and shipping and value prior industry experience.