കാനഡ വീണെങ്കിൽ എന്താ, ജർമ്മനിയില്ലേ; മലയാളികൾക്ക് വൻ അവസരം..300 ഓളം ഒഴിവുകൾ,നിയമനം സർക്കാർ വഴി
തിരുവനന്തപുരം: ജർമ്മനിയിൽ നഴ്സിങ് ജോലി വേണോ? ഇതാ നോർക്ക നിങ്ങൾക്കായി അവസരം ഒരുക്കുന്നു. നോര്ക്ക റൂട്ട്സ് ട്രിപ്പിള് പദ്ധതി വഴിയാണ് അവസരമൊരുങ്ങിയിരിക്കുന്നത്. പദ്ധതിയുടെ അഞ്ചാം ഘട്ടമാണിത്. 300 നഴ്സുമാർക്കാണ് അവസരം ലഭിക്കുക. 39 വയസാണ് ഉയർന്ന പ്രായപരിധി. ഈ മാസം 29 നകം അപേക്ഷ നൽകണം.
ജനറൽ നഴ്സിങ് അല്ലെങ്കിൽ ബി എസ് സി നഴ്സിങ് എന്നിവയാണ് അടിസ്ഥാന യോഗ്യത. ജനറൽ നഴ്സിങ് മാത്രം പാസായ ഉദ്യോഗാർഥികൾക്ക് 3 വർഷത്തെ പ്രവർത്തി പരിചയം നിർബന്ധമാണ്. എന്നാൽ ബി.എസ്.സി നഴ്സിങ്, പോസ്റ്റ് ബി എസ് സി നഴ്സിങ് എന്നിവ നേടിയ ഉദ്യോഗാർഥികൾക്ക് പ്രത്യേക തൊഴിൽ പരിചയം ആവശ്യമില്ല.
ഉദ്യോഗാർത്ഥികൾ വിശദമായ സി.വി, ജർമൻ ഭാഷായോഗ്യത (ഓപ്ഷണല്), വിദ്യാഭ്യാസ സര്ട്ടിഫിക്കറ്റുകള്, പ്രവൃത്തി പരിചയമുള്പ്പെടെയുളള മറ്റ് അവശ്യരേഖകളുടെ പകര്പ്പുകള് എന്നിവ സഹിതം അപേക്ഷിക്കണം. കേരളീയരായ ഉദ്യോഗാർഥികൾക്ക് മാത്രമാകും ട്രിപ്പിൽ പദ്ധതിയിലേക്ക് അപേക്ഷിക്കാനാവുക. ഇതിനോടകം ജർമന് ഭാഷയില് ബി1, ബി2 യോഗ്യത നേടിയവര്ക്ക് ഫാസ്റ്റ്ട്രാക്കിലൂടെ നിയമന സാധ്യതയുണ്ട്.
നോർക്ക റൂട്ട്സും ജർമൻ ഫെഡറൽ എംപ്ലോയ്മെന്റ് ഏജൻസിയും ജർമൻ ഏജൻസി ഫോർ ഇന്റർനാഷനൽ കോ-ഓപ്പറേഷനും സംയുക്തമായി നടപ്പാക്കുന്ന നഴ്സുമാരുടെ റിക്രൂട്ട്മെന്റ് പദ്ധതിയാണ് ട്രിപ്പിള് വിന്. പദ്ധതിയുടെ ഭാഗമായി തിരഞ്ഞെടുക്കപ്പെടുന്നവര്ക്ക് ജര്മ്മന് ഭാഷയില് എ1, എ2, ബി1 വരെയുളള പരിശീലനം പൂര്ണ്ണമായും സൗജന്യമായിരിക്കും. തുടര്ന്ന് ജർമനിയില് നിയമനത്തിനുശേഷം ജർമന് ഭാഷയില് ബി.2 ലെവല് പരിശീലനവും ലഭിക്കും.
കൂടുതല് വിവരങ്ങള്ക്ക് :www.norkaroots.org , www.nifl.norkaroots.org എന്നീ വെബ് സെറ്റുകൾ സന്ദർശിക്കുക. അല്ലെങ്കില് 24 മണിക്കൂറും പ്രവര്ത്തിക്കുന്ന നോര്ക്ക ഗ്ലോബല് കോണ്ടാക്ട് സെന്ററിന്റെ ടോള് ഫ്രീ നമ്പറുകളായ 1800 425 3939 (ഇന്ത്യയില് നിന്നും) +91-8802 012 345 (വിദേശത്തുനിന്നും, മിസ്സ്ഡ് കോള് സര്വ്വീസ്) ബന്ധപ്പെടാവുന്നതാണ്.
ഒഡപെക് വഴി ജർമ്മനിയിലേക്ക് കൂടുതൽ അവസരങ്ങൾ
ജർമ്മനിയുമായി കൂടുതൽ തൊഴിൽ മേഖലകളിൽ സഹകരിക്കാൻ സംസ്ഥാന തൊഴിൽ വകുപ്പിന്റെ കീഴിലുള്ള ഒഡെപെക്. മലയാളികൾക്ക് ജർമനിയിൽ നഴ്സ് ജോലി ലഭ്യമാക്കാൻ സംസ്ഥാന തൊഴിൽ വകുപ്പിന് കീഴിലുള്ള ഒഡെപെകും ജർമനിയിലെ സർക്കാർ സ്ഥാപനം ഡെഫയും ധാരണാപത്രം ഒപ്പുവെച്ചു.കേരളത്തിലെത്തിയ ഫെഡറൽ ഗവർമെന്റ് ഓഫ് ജർമനി ഡെപ്യൂട്ടി ഹെൽത്ത് മിനിസ്റ്ററും പാർലമെന്ററി സ്റ്റേറ്റ് സെക്രട്ടറിയുമായ പ്രൊഫ. ഡോ. എഡ്ഗാർ ഫ്രാങ്കെയുമായി കൂടിക്കാഴ്ച നടത്തിയതായും മന്ത്രി വി ശിവൻകുട്ടി അറിയിച്ചു.
ജർമനിയിൽ ജോലി നേടാൻ ആഗ്രഹിക്കുന്ന നഴ്സുമാർക്കായി ഒഡെപെക് ഒരുക്കിയിട്ടുള്ള സൗജന്യ റിക്രൂട്ട്മെന്റ് പദ്ധതിയാണ് 'വർക്ക് -ഇൻ ഹെൽത്ത് , ജർമനി. ആയിരത്തി അഞ്ഞൂറോളം ഒഴിവുകളാണ് ഈ സാമ്പത്തിക വർഷം ജർമനിയിൽ പ്രതീക്ഷിക്കുന്നത്. സൗജന്യ ജർമ്മൻ ഭാഷാപരിശീലനവും ഒഡെപെക് നൽകും. ഇതുകൂടാതെ നഴ്സുമാർ ജർമനിയിൽ ചെന്നതിനു ശേഷം രെജിസ്ട്രേഷന് വേണ്ടി പാസ്സാകേണ്ട പരീക്ഷയ്ക്കായി നാട്ടിൽ നിന്ന് തന്നെ അവരെ പരിശീലിപ്പിക്കാനും ഒഡെപെക് പദ്ധതിയിട്ടിട്ടുണ്ടെന്നും മന്ത്രി അറിയിച്ചു.
Click it and Unblock the Notifications
Sign in with Google