ബാങ്ക് ജോലി ആഗ്രഹിക്കുന്നവർക്ക് സുവർണ്ണാവസരം; 1000 ഓഫീസർ തസ്തികകളിലേക്ക് വിജ്ഞാപനം

ബാങ്കിംഗ് മേഖലയിൽ കരിയർ ആഗ്രഹിക്കുന്ന ഉദ്യോഗാർത്ഥികൾക്ക് സന്തോഷവാർത്ത. പ്രമുഖ പൊതുമേഖലാ ബാങ്കായ പഞ്ചാബ് ആൻഡ് സിന്ദ് ബാങ്ക് (Punjab and Sind Bank) ലോക്കൽ ബാങ്ക് ഓഫീസർ (LBO) തസ്തികയിലേക്ക് വൻതോതിൽ നിയമനം നടത്തുന്നു. ജൂനിയർ മാനേജ്‌മെന്റ് ഗ്രേഡ് സ്കെയിൽ-1 (JMGS-I) കേഡറിലായി ആകെ 1000 ഒഴിവുകളിലേക്കാണ് അപേക്ഷ ക്ഷണിച്ചിരിക്കുന്നത്. മാർച്ച് 31 മുതൽ ഓൺലൈൻ അപേക്ഷാ നടപടികൾ ആരംഭിച്ചു കഴിഞ്ഞു.

ഒഴിവുകളുടെ എണ്ണം: കേരളത്തിലും അവസരം

രാജ്യത്തെ 17 സംസ്ഥാനങ്ങളിലായാണ് ഈ 1000 ഒഴിവുകൾ റിപ്പോർട്ട് ചെയ്തിരിക്കുന്നത്. ഏറ്റവും കൂടുതൽ ഒഴിവുകൾ ഉത്തർപ്രദേശിലാണെങ്കിലും (200), കേരളത്തിലും ഉദ്യോഗാർത്ഥികൾക്ക് അവസരമുണ്ട്. കേരളത്തിൽ 10 ഒഴിവുകളാണ് നിലവിലുള്ളത്. ഓരോ സംസ്ഥാനത്തെയും പ്രാദേശിക ഭാഷാ പരിജ്ഞാനം ഈ തസ്തികയിലേക്ക് അനിവാര്യമാണ്. കേരളത്തിൽ അപേക്ഷിക്കുന്നവർക്ക് മലയാളം സംസാരിക്കാനും എഴുതാനും വായിക്കാനും അറിഞ്ഞിരിക്കണം.

യോഗ്യതയും പ്രായപരിധിയും

ഈ തസ്തികയിലേക്ക് അപേക്ഷിക്കാൻ താല്പര്യമുള്ളവർ താഴെ പറയുന്ന യോഗ്യതകൾ പാലിച്ചിരിക്കണം.

*വിദ്യാഭ്യാസ യോഗ്യത: അംഗീകൃത സർവ്വകലാശാലയിൽ നിന്നുള്ള ബിരുദമാണ് അടിസ്ഥാന യോഗ്യത.

*പ്രവൃത്തിപരിചയം: ഏതെങ്കിലും ഷെഡ്യൂൾഡ് കൊമേഴ്‌സ്യൽ ബാങ്കിലോ റീജിയണൽ റൂറൽ ബാങ്കിലോ (RRB) ഓഫീസർ കേഡറിൽ കുറഞ്ഞത് 18 മാസത്തെ പ്രവൃത്തിപരിചയം നിർബന്ധമാണ്. 2026 ഏപ്രിൽ 20-ന് മുമ്പായി ഈ പരിചയം നേടിയിരിക്കണം.

*പ്രായപരിധി: 2026 മാർച്ച് 1 പ്രകാരം 20 വയസ്സിനും 30 വയസ്സിനും ഇടയിലായിരിക്കണം പ്രായം. പട്ടികജാതി/പട്ടികവർഗ്ഗ വിഭാഗക്കാർക്ക് 5 വർഷവും ഒബിസി (നോൺ-ക്രീമി ലെയർ) വിഭാഗക്കാർക്ക് 3 വർഷവും പ്രായമിളവ് ലഭിക്കും.

*സിബിൽ സ്കോർ (CIBIL Score): ജോലിയിൽ പ്രവേശിക്കുന്ന സമയത്ത് അപേക്ഷകർക്ക് 650-ലോ അതിന് മുകളിലോ സിബിൽ സ്കോർ ഉണ്ടായിരിക്കണം.

ശമ്പളവും മറ്റ് ആനുകൂല്യങ്ങളും

തിരഞ്ഞെടുക്കപ്പെടുന്നവർക്ക് ആകർഷകമായ ശമ്പള പാക്കേജാണ് ബാങ്ക് വാഗ്ദാനം ചെയ്യുന്നത്. 48,480 രൂപ മുതൽ 85,920 രൂപ വരെയുള്ള പേ സ്കെയിലിലായിരിക്കും നിയമനം. ഇതിന് പുറമെ ഡിഎ, എച്ച്ആർഎ, മെഡിക്കൽ സൗകര്യങ്ങൾ, യാത്രാ ആനുകൂല്യങ്ങൾ എന്നിവയും ലഭിക്കും. തുടക്കത്തിൽ ആറുമാസത്തെ പ്രൊബേഷൻ കാലാവധി ഉണ്ടായിരിക്കും. കൂടാതെ, മൂന്ന് വർഷത്തെ സർവീസ് ബോണ്ട് (ഏകദേശം മൂന്ന് മാസത്തെ ശമ്പളത്തിന് തുല്യമായ തുക) ഒപ്പിടേണ്ടതുണ്ട്.

തിരഞ്ഞെടുപ്പ് പ്രക്രിയ

പ്രധാനമായും മൂന്ന് ഘട്ടങ്ങളിലൂടെയാണ് ഉദ്യോഗാർത്ഥികളെ തിരഞ്ഞെടുക്കുന്നത്

*ഓൺലൈൻ പരീക്ഷ: 120 മാർക്കിന്റെ ഒബ്ജക്റ്റീവ് പരീക്ഷയായിരിക്കും ഇത്. ഇംഗ്ലീഷ് ലാംഗ്വേജ്, ബാങ്കിംഗ് നോളജ്, ജനറൽ അവയർനസ്, കമ്പ്യൂട്ടർ ആപ്റ്റിറ്റ്യൂഡ് എന്നീ വിഷയങ്ങളിൽ നിന്നുള്ള ചോദ്യങ്ങൾ ഉണ്ടാകും.

*പേഴ്സണൽ ഇന്റർവ്യൂ: പരീക്ഷയിൽ നിശ്ചിത മാർക്ക് നേടുന്നവരെ ഇന്റർവ്യൂവിന് വിളിക്കും.

*ഭാഷാ പരീക്ഷ: പത്താം ക്ലാസ്സിലോ പന്ത്രണ്ടാം ക്ലാസ്സിലോ പ്രാദേശിക ഭാഷ (കേരളത്തിൽ മലയാളം) ഒരു വിഷയമായി പഠിക്കാത്തവർക്ക് പ്രത്യേക ലാംഗ്വേജ് പ്രൊഫിഷ്യൻസി ടെസ്റ്റ് നടത്തും.

എങ്ങനെ അപേക്ഷിക്കാം?

താൽപ്പര്യമുള്ളവർ ബാങ്കിന്റെ ഔദ്യോഗിക വെബ്സൈറ്റായ punjabandsind.bank.in വഴി ഓൺലൈനായി അപേക്ഷിക്കണം. അപേക്ഷ സ്വീകരിക്കുന്ന അവസാന തീയതി 2026 ഏപ്രിൽ 20 ആണ്. ജനറൽ, ഇഡബ്ല്യുഎസ്, ഒബിസി വിഭാഗക്കാർക്ക് 850 രൂപയും എസ്‌സി, എസ്ടി, പിഡബ്ല്യുഡി വിഭാഗക്കാർക്ക് 100 രൂപയുമാണ് അപേക്ഷാ ഫീസ്. ഓൺലൈൻ വഴിയോ ഡെബിറ്റ്/ക്രെഡിറ്റ് കാർഡ് വഴിയോ ഫീസ് അടയ്ക്കാം.