തിരുവനന്തപുരത്ത് ജോലി വേണോ?, എറണാകുളം,തൃശൂർ അടക്കം ഒഴിവുകൾ..60,000 വരെ ശമ്പളം

പുതിയതും പുനരുപയോഗിക്കാവുന്നതുമായ ഊർജ്ജ ഗവേഷണ സാങ്കേതികവിദ്യാ ഏജൻസിയായ അനർട്ട് (ANERT) വിവിധ തസ്തികകളിലേക്ക് ഓൺലൈനായി അപേക്ഷ ക്ഷണിച്ചു. ഉദ്യോഗാർത്ഥികൾക്ക് സർക്കാർ അല്ലെങ്കിൽ അർദ്ധസർക്കാർ സ്ഥാപനങ്ങളിലെ പ്രവൃത്തിപരിചയം എല്ലാ തസ്തികകളിലേക്കും നിർബന്ധമാണ്. തസ്തിക , യോഗ്യത, അപേക്ഷിക്കുന്നത് എങ്ങനെ തുടങ്ങിയ വിവരങ്ങൾ അറിയാം

ജില്ലാ പ്രോജക്ട് എഞ്ചിനീയർ തസ്തികയിൽ അഞ്ച് ഒഴിവുകളാണുള്ളത്. കൊല്ലം, പത്തനംതിട്ട, വയനാട്, കാസർഗോഡ്, പാലക്കാട് എന്നീ ജില്ലകളിൽ ഒന്നു വീതമാണ് ഒഴിവുകൾ. ഇലക്ട്രിക്കൽ, ഇലക്ട്രോണിക്സ് അല്ലെങ്കിൽ ഇലക്ട്രോണിക്സ് കമ്മ്യൂണിക്കേഷൻ വിഷയങ്ങളിൽ ബി.ടെക്/ബി.ഇ ബിരുദവും നാല് വർഷത്തെ പ്രവൃത്തിപരിചയവുമാണ് യോഗ്യത. പ്രതിമാസം 40,000 രൂപ ശമ്പളം ലഭിക്കുന്ന ഈ തസ്തികയിലേക്ക് 40 വയസ്സ് വരെ പ്രായമുള്ളവർക്ക് അപേക്ഷിക്കാം.

അസിസ്റ്റന്റ് ജില്ലാ പ്രോജക്ട് എഞ്ചിനീയർ വിഭാഗത്തിൽ ആകെ പതിനൊന്ന് ഒഴിവുകളാണുള്ളത്. തിരുവനന്തപുരത്ത് രണ്ട് ഒഴിവുകളും, പാലക്കാട്, തൃശൂർ, മലപ്പുറം, എറണാകുളം, കൊല്ലം, ഇടുക്കി, ആലപ്പുഴ, കോഴിക്കോട്, കണ്ണൂർ എന്നിവിടങ്ങളിൽ ഓരോ ഒഴിവുകൾ വീതവുമുണ്ട്. ഇലക്ട്രിക്കൽ, ഇലക്ട്രോണിക്സ് അല്ലെങ്കിൽ ഇലക്ട്രോണിക്സ് കമ്മ്യൂണിക്കേഷൻ ബി.ടെക്/ബി.ഇ ബിരുദവും മൂന്ന് വർഷത്തെ പരിചയവുമാണ് യോഗ്യത. 40 വയസ്സാണ് ഉയർന്ന പ്രായപരിധി, പ്രതിമാസം 35,000 രൂപ ശമ്പളം ലഭിക്കും.

സിഇഒയുടെ എക്സിക്യൂട്ടീവ് അസിസ്റ്റന്റ് തസ്തികയിൽ തിരുവനന്തപുരത്ത് ഒരൊഴിവ് മാത്രമാണുള്ളത്. ഇലക്ട്രിക്കൽ, ഇലക്ട്രോണിക്സ് അല്ലെങ്കിൽ ഇലക്ട്രോണിക്സ് കമ്മ്യൂണിക്കേഷൻ ബി.ടെക്/ബി.ഇ ബിരുദത്തോടൊപ്പം ഏതെങ്കിലും വിഷയത്തിൽ എം.ടെക്/എം.ഇ ബിരുദവും അഞ്ച് വർഷത്തെ പ്രവൃത്തിപരിചയവും ആവശ്യമാണ്. ഈ തസ്തികയിലേക്ക് 45 വയസ്സാണ് ഉയർന്ന പ്രായപരിധി, പ്രതിമാസം 60,000 രൂപയാണ് ശമ്പളം.

ടെക്നിക്കൽ അസിസ്റ്റന്റ് തസ്തികയിൽ ആകെ പതിമൂന്ന് ഒഴിവുകളുണ്ട്. ഇതിൽ തിരുവനന്തപുരത്ത് ആറ് ഒഴിവുകളും, കൊല്ലം, പത്തനംതിട്ട, ആലപ്പുഴ, ഇടുക്കി, മലപ്പുറം, പാലക്കാട്, എറണാകുളം എന്നിവിടങ്ങളിൽ ഓരോ ഒഴിവുകൾ വീതവുമുണ്ട്. ഇലക്ട്രിക്കൽ, ഇലക്ട്രോണിക്സ് അല്ലെങ്കിൽ ഇലക്ട്രോണിക്സ് കമ്മ്യൂണിക്കേഷൻ ബി.ടെക്/ബി.ഇ ബിരുദമുള്ളവർക്ക് ഒരു വർഷത്തെയും, ഡിപ്ലോമയുള്ളവർക്ക് രണ്ട് വർഷത്തെയും പ്രവൃത്തിപരിചയം മതി. 40 വയസ്സുവരെ പ്രായമുള്ളവർക്ക് 30,000 രൂപ പ്രതിമാസ ശമ്പളത്തിൽ അപേക്ഷിക്കാം.

അസിസ്റ്റന്റ് അക്കൗണ്ട്സ് ഓഫീസർ തസ്തികയിൽ തിരുവനന്തപുരത്ത് രണ്ട് ഒഴിവുകളുണ്ട്. ബി.കോം ബിരുദത്തോടൊപ്പം സിഎംഎയും, ഒരു വർഷത്തെ പ്രവൃത്തിപരിചയവുമാണ് ഇതിലേക്ക് വേണ്ടത്. 40 വയസ്സാണ് ഉയർന്ന പ്രായപരിധി; പ്രതിമാസം 30,000 രൂപയാണ് ശമ്പളം.

കമ്പ്യൂട്ടർ അസിസ്റ്റന്റ് ഒഴിവുകളുണ്ട് തിരുവനന്തപുരത്ത് മൂന്നെണ്ണം. ഏതെങ്കിലും വിഷയത്തിൽ ബിരുദവും ഡി.സി.എ./ഡി.ടി.പി കോഴ്സും, രണ്ട് വർഷത്തെ പ്രവൃത്തിപരിചയവും വേണം. കോൺഫിഡൻഷ്യൽ അസിസ്റ്റന്റ് തസ്തികയിൽ തിരുവനന്തപുരത്ത് ഒരൊഴിവുണ്ട്. ബിരുദവും പി.ജി.ഡി.സി.എ.യും, രണ്ട് വർഷത്തെ പ്രവൃത്തിപരിചയവുമാണ് യോഗ്യത. ഈ രണ്ട് തസ്തികകളിലേക്കും 40 വയസ്സുവരെ പ്രായമുള്ളവർക്ക് 22,000 രൂപ പ്രതിമാസം ശമ്പളത്തിൽ അപേക്ഷിക്കാം. അപേക്ഷിക്കാനുള്ള അവസാന തീയതി ജനുവരി 28. കൂടുതൽ വിവരങ്ങൾക്ക് https://cmd.kerala.gov.in/wp-content/uploads/2026/01/Anert-Notification-1.pdf

English summary

ANERT invites online applications for multiple posts across Kerala, including district project engineers, executive assistants, technical and accounts roles. Eligibility spans BE/BTech or related diplomas with varying experience and age limits; salaries range from 22,000 to 60,000 INR monthly, with district-wise vacancies across several districts.