ഗള്‍ഫിലെ ജോലി സാധ്യതകള്‍ അവസാനിക്കില്ല: പുതിയ കണക്കില്‍ വന്‍ മുന്നേറ്റം, പ്രത്യേകിച്ച് യുഎഇ

ഗൾഫ് മേഖലയിലുടനീളം തൊഴിലവസരങ്ങൾ സൃഷ്ടിക്കുന്നതിൽ യുഎഇ ഉള്‍പ്പെടേയുള്ള ഗള്‍ഫ് രാജ്യങ്ങള്‍ വലിയ മുന്നേറ്റം നടത്തുന്നതായി റിപ്പോർട്ട്. ഈ വർത്തെ ആദ്യ പാദത്തില്‍ 2024 ലെ ആദ്യ പാദത്തെ അപേക്ഷിച്ച് പുതിയ തൊഴിലവസരങ്ങളിൽ 8 ശതമാനം വർധനയുണ്ടായെന്നാണ് ഒരു പഠനം വ്യക്തമാക്കുന്നത്.

റിയൽ എസ്റ്റേറ്റ്, ഡിജിറ്റൽ, ഡാറ്റ, എഐ എന്നിവയുൾപ്പെടെയുള്ള പ്രധാന മേഖലകളിലെ ശക്തമായ വളർച്ചയാണ് ഈ കുതിച്ചുചാട്ടത്തിന് കാരണമായതെന്ന് ഏറ്റവും പുതിയ കൂപ്പർ ഫിച്ച് ഗൾഫ് എംപ്ലോയ്‌മെൻ്റ് സൂചിക വ്യക്തമാക്കുന്നു. യു എ ഇയുടെ റിയൽ എസ്റ്റേറ്റ് മേഖലയിലാണ് വലിയ മുന്നേറ്റമുണ്ടായത്.

പുതിയ തൊഴിലവസരങ്ങളിൽ 11 ശതമാനം ഉയർച്ച റിയല്‍ എസ്റ്റേറ്റ് മേഖലയിലുണ്ടായി. രാജ്യത്തിൻ്റെ പ്രോപ്പർട്ടി മാർക്കറ്റ് കുതിച്ചുയരുന്നത് തുടരുന്നതിനാൽ ഈ മേഖലയില്‍ ഇനിയും അവസരങ്ങള്‍ വർധിച്ചേക്കും. റിയൽ എസ്റ്റേറ്റിനോടൊപ്പം ഡിസൈൻ, സെയിൽസ് ജോലികൾ എന്നിവയിലും വർധനവ് രേഖപ്പെടുത്തിയിട്ടുണ്ട്.

തൊഴിലവസരങ്ങളിൽ 8 ശതമാനം വർധനവോടെ യുഎഇ മുന്നിലെത്തിയപ്പോൾ, മറ്റ് ജിസിസി രാജ്യങ്ങളും കുതിപ്പ് രേഖപ്പെടുത്തിയിട്ടുണ്ട് എന്നതാണ് ശ്രദ്ധേയം. മേഖലയിലുടനീളം തൊഴിലവസരങ്ങളില്‍ ആറ് ശതമാനം വർധനവ് ഉണ്ടായെന്നാണ് റിപ്പോർട്ട്. സൗദി അറേബ്യ 5 ശതമാനവും ഖത്തറിൽ 3 ശതമാനവും ബഹ്‌റൈനിൽ 1 ശതമാനവും കുവൈത്തിൽ 4 ശതമാനവും ജോലി അവസരങ്ങില്‍ വർധനവ് രേഖപ്പെടുത്തി.

അതേസമയം ഇതേ കാലയളവിൽ തൊഴിലവസരങ്ങൾ സൃഷ്ടിക്കുന്നതിൽ ഒമാന് വലിയ മുന്നേറ്റം സൃഷ്ടിക്കാന്‍ സാധിച്ചിട്ടില്ല. എന്നുവെച്ച് പിന്നോട്ട് പോയിട്ടുമില്ല. യുഎഇയിലെയും സൗദി അറേബ്യയിലെയും പൊതുമേഖല തൊഴിൽ അവസരങ്ങളിൽ 8 ശതമാനം വളർച്ച കൈവരിച്ചു. സൗദി അറേബ്യയുടെ സോവറിൻ വെൽത്ത് ഫണ്ടായ പബ്ലിക് ഇൻവെസ്റ്റ്‌മെൻ്റ് ഫണ്ട് (പിഐഎഫ്) മാനേജ്‌മെൻ്റിന് കീഴിലുള്ള ആസ്തികൾ 940.26 ബില്യൺ ഡോളറിൽ എത്തിയതായും റിപ്പോർട്ട് പറയുന്നു.

2024 ഫെബ്രുവരിയിൽ 596,000 അന്തർദേശീയ സന്ദർശകരെ സ്വാഗതം ചെയ്തുകൊണ്ട് ഖത്തറിൻ്റെ വിനോദസഞ്ചാര വ്യവസായം പകർച്ചവ്യാധിക്ക് ശേഷമുള്ള ശക്തമായ വീണ്ടെടുപ്പ് നടത്തി. ഗൾഫ് കോ-ഓപ്പറേഷൻ കൗൺസിൽ (ജിസിസി) രാജ്യങ്ങളിൽ ഡിജിറ്റൽ, ഡാറ്റ, എഐ എന്നീ മേഖലകളില്‍ 10 ശതമാനത്തിന്റെ വർധനവാണ് രേഖപ്പെടുത്തിയിരിക്കുന്നത്.

നിയമ, നിക്ഷേപ മാനേജ്‌മെൻ്റ് മേഖലകളിൽ ജിസിസിയിലുടനീളം തൊഴിലവസരങ്ങളിൽ 9 ശതമാനം വർധനയുണ്ടായി. ഇത് ആഗോള സാമ്പത്തിക, നിയമ കേന്ദ്രമെന്ന നിലയിൽ മേഖലയുടെ വളർന്നുവരുന്ന പ്രാധാന്യവും എടുത്തുകാണിക്കുന്നു. മനുഷ്യവിഭവശേഷി (6 ശതമാനം വർധന), ഫിനാൻസ്, സീനിയർ ഫിനാൻസ് (യഥാക്രമം 3, 7 ശതമാനം വർദ്ധനവ്), ബാങ്കിംഗ് (7 ശതമാനം വർദ്ധനവ്), വിൽപ്പനയും വിപണനവും (5 ശതമാനം വർദ്ധനവ്), നിർമ്മാണം (5 ശതമാനം വർദ്ധനവ്), വിതരണ ശൃംഖല (7 ശതമാനം വർദ്ധനവ്) എന്നിങ്ങനെയാണ് ജിസിസി മേഖലയിലെ തൊഴില്‍ വളർച്ച.

2024-ൽ 4.2 ശതമാനവും 2025-ൽ 5.2 ശതമാനവും ജിഡിപി വളർച്ച പ്രതീക്ഷിക്കുന്ന യുഎഇയെ സംബന്ധിച്ച് ഈ കണക്കുകള്‍ ഏറെ പ്രതീക്ഷ നല്‍കുന്നതാണ്. ഗൾഫ് മേഖല സാമ്പത്തിക വൈവിധ്യവൽക്കരണം, ഡിജിറ്റൽ പരിവർത്തനം, സുസ്ഥിര വികസനം എന്നിവ സ്വീകരിക്കുന്നത് തുടരുന്നതിനാൽ, 2024 ലെ ഒന്നാം പാദത്തിലെ തൊഴിൽ വിപണിയുടെ മികച്ച പ്രകടനം വിവിധ മേഖലകളിലെ കൂടുതൽ വളർച്ചയ്ക്കും നിക്ഷേപ അവസരങ്ങൾക്കും കളമൊരുക്കുമെന്നുമാണ് വിലയിരുത്തപ്പെടുന്നത്.

English summary

8% increase in new job opportunities in UAE