സർക്കാർ സ്ഥാപനങ്ങളിൽ കരാർ ജോലി വേണോ? 55000 രൂപ ശമ്പളം..ഇപ്പോൾ തന്നെ അപേക്ഷിക്കാം

കേരള ഖരമാലിന്യ സംസ്കരണ പദ്ധതിയിൽ (കെ.എസ്.ഡബ്ല്യു.എം.പി.), വിവിധ തസ്തികകളിലേക്ക് യോഗ്യരായ ഉദ്യോഗാർത്ഥികളിൽ നിന്ന് അപേക്ഷകൾ ക്ഷണിച്ചു. നാല് തസ്തികകളിലാണ് ഒഴിവ്. അപേക്ഷ സമർപ്പിക്കാനുള്ള അവസാന തീയതി ഫെബ്രുവരി 20 ആണ്. www.cmd.kerala.gov.in വഴിയാണ് അപേക്ഷിക്കേണ്ടത്. തസ്തിക, ശമ്പളം തുടങ്ങിയ വിവരങ്ങൾ അറിയാം

എല്ലാ തസ്തികകളിലേക്കും ഉള്ള ഉയർന്ന പ്രായപരിധി 60 വയസ്സാണ്. തിരഞ്ഞെടുക്കപ്പെടുന്നവർക്ക് പ്രതിമാസം 55,000 രൂപ ഏകീകൃത ശമ്പളമായി ലഭിക്കും.

ഡെപ്യൂട്ടി ജില്ലാ കോർഡിനേറ്റർ / ഖരമാലിന്യ സംസ്കരണ എഞ്ചിനീയർ (ഒഴിവുകൾ: 3, പ്രതീക്ഷിക്കുന്നത്: 5). DPMU-വിലാണ് നിയമനം. സിവിൽ/പരിസ്ഥിതി എഞ്ചിനീയറിംഗിൽ എം.ടെക്/എം.ഇ/എം.എസ് ബിരുദവും, നഗര അടിസ്ഥാന സൗകര്യ/ഖരമാലിന്യ സംസ്കരണ മേഖലയിൽ 2 വർഷത്തെ പരിചയവുമാണ് ഒരു യോഗ്യത. സിവിൽ എഞ്ചിനീയറിംഗിൽ ബി.ടെകും അംഗീകൃത എം.ബി.എയും സമാന മേഖലയിൽ 2 വർഷത്തെ പരിചയവും ഉള്ളവർക്കും അപേക്ഷിക്കാം. അതല്ലെങ്കിൽ, സിവിൽ എഞ്ചിനീയറിംഗിൽ ബി.ടെകും നഗര അടിസ്ഥാന സൗകര്യ പദ്ധതികളിൽ 4 വർഷത്തെ പ്രവൃത്തിപരിചയവും മതിയാകും.

ഖരമാലിന്യ സംസ്കരണ എഞ്ചിനീയർ (ഒഴിവുകൾ: 13, പ്രതീക്ഷിക്കുന്നത്: 17). നിയമനം PIU-കളിൽ. സിവിൽ/പരിസ്ഥിതി എഞ്ചിനീയറിംഗിൽ എം.ടെക്/എം.ഇ/എം.എസ് ബിരുദവും നഗര അടിസ്ഥാന സൗകര്യ/ഖരമാലിന്യ സംസ്കരണ മേഖലയിൽ ഒരു വർഷത്തെ പ്രവൃത്തിപരിചയവുമാണ് ഒരു യോഗ്യത. സിവിൽ എഞ്ചിനീയറിംഗിൽ ബി.ടെകും അംഗീകൃത എം.ബി.എയും സമാന മേഖലയിൽ ഒരു വർഷത്തെ പരിചയവും ഉള്ളവർക്ക് അപേക്ഷിക്കാം. അതല്ലെങ്കിൽ, സിവിൽ എഞ്ചിനീയറിംഗിൽ ബി.ടെകും നഗര അടിസ്ഥാന സൗകര്യ പദ്ധതികളിൽ 3 വർഷത്തെ പ്രവൃത്തിപരിചയവും മതിയാകും.

സോഷ്യൽ കം കമ്മ്യൂണിക്കേഷൻ എക്സ്പർട്ട് (ഒഴിവുകൾ: 3, പ്രതീക്ഷിക്കുന്നത്: 5). നിയമന സ്ഥലം DPMU. സോഷ്യൽ സയൻസ് വിഷയങ്ങളായ സോഷ്യൽ വർക്ക്, സോഷ്യോളജി, ഇക്കണോമിക്സ് അല്ലെങ്കിൽ അനുബന്ധ വിഷയങ്ങളിൽ ബിരുദാനന്തര ബിരുദം, ഒപ്പം സാമൂഹിക വികസനം, ലിംഗസമത്വം, ആശയവിനിമയം എന്നീ മേഖലകളിൽ കുറഞ്ഞത് 5 വർഷത്തെ പ്രവൃത്തിപരിചയവുമാണ് യോഗ്യത.

എൻവയോൺമെന്റൽ എഞ്ചിനീയർ (ഒഴിവുകൾ: 2, പ്രതീക്ഷിക്കുന്നത്: 5). നിയമന സ്ഥലം DPMU. സിവിൽ/പരിസ്ഥിതി എഞ്ചിനീയറിംഗ്, എൻവയോൺമെന്റൽ പ്ലാനിംഗ്, പ്രകൃതി വിഭവ പരിപാലനം അല്ലെങ്കിൽ അനുബന്ധ വിഷയങ്ങളിൽ ബിരുദാനന്തര ബിരുദം, കൂടാതെ പരിസ്ഥിതി പ്രവർത്തന മേഖലയിൽ കുറഞ്ഞത് 7 വർഷത്തെ പ്രവൃത്തിപരിചയവും അനിവാര്യമാണ്.

ഡാറ്റ എൻട്രി ഓപ്പറേറ്റർ അഭിമുഖം ഫെബ്രുവരി 11 ന്

മലപ്പുറം ജില്ലാ മെഡിക്കൽ ഓഫീസിൽ ഒഴിവുള്ള ഡാറ്റാ എൻട്രി ഓപ്പറേറ്റർ തസ്തികയിൽ താത്ക്കാലിക നിയമനം നടത്തുന്നതിനുള്ള അഭിമുഖം ഫെബ്രുവരി 11 ന് രാവിലെ 10 ന് ജില്ലാ മെഡിക്കൽ ഓഫീസിൽ നടക്കും.

യോഗ്യതകൾ: ബിരുദം, ഡി.സി.എ അല്ലെങ്കിൽ തത്തുല്യമായ സർക്കാർ അംഗീകൃത യോഗ്യത ഉണ്ടായിരിക്കണം. വയസ്സ് 18-39. വേർഡ് പ്രോസസിങിൽ (മലയാളം & ഇംഗ്ലീഷ്) പരിജ്ഞാനം നിർബന്ധം. യു.ഡി.ഐ.ഡി. ഡാറ്റാ എൻട്രി മേഖലയിൽ മുൻപരിചയമുള്ളവർക്ക് മുൻഗണനയുണ്ട്.

താത്പര്യമുള്ള ഉദ്യോഗാർഥികൾ ബയോഡാറ്റ, തിരിച്ചറിയൽ രേഖ, വിദ്യാഭ്യാസ യോഗ്യത, പ്രായം, പ്രവൃത്തിപരിചയം എന്നിവ തെളിയിക്കുന്ന സർട്ടിഫിക്കറ്റുകളുടെ അസ്സലും പകർപ്പുകളും സഹിതം നിശ്ചിത സമയത്ത് അഭിമുഖത്തിന് ഹാജരാകണം. കൂടുതൽ വിവരങ്ങൾ ജില്ലാ മെഡിക്കൽ ഓഫീസിൽ ലഭിക്കും.