തിരുവനന്തപുരത്ത് ജോലി: ഈ യോഗ്യതയുണ്ടെങ്കിൽ ഇപ്പോൾ തന്നെ അപേക്ഷിക്കാം

തിരുവനന്തപുരം: ക്ലീൻ കേരള കമ്പനി ലിമിറ്റഡിന്റെ തിരുവനന്തപുരം ജില്ലാ കാര്യാലയത്തിൽ ഹെൽപ്പർ തസ്തികയിൽ ഒഴിവ്. പത്താം ക്ലാസ് വിദ്യാഭ്യാസ യോഗ്യതയും ശാരീരികക്ഷമതയും ഉള്ള പുരുഷ ഉദ്യോഗാർഥികൾക്കാണ് അവസരം. അംഗപരിമിതർക്കും സ്ത്രീകൾക്കും അപേക്ഷിക്കാൻ അർഹതയില്ല. തിരുവനന്തപുരം ജില്ലയിൽ താമസിക്കുന്നവർക്ക് മുൻഗണന നൽകുമെന്ന് അധികൃതർ അറിയിച്ചു.

2026 ജൂലൈ 2-ന് രാവിലെ 10 മണിക്ക് തിരുവനന്തപുരം വഴുതക്കാട് സ്റ്റേറ്റ് മുനിസിപ്പൽ ഹൗസിന്റെ രണ്ടാം നിലയിൽ പ്രവർത്തിക്കുന്ന ക്ലീൻ കേരള കമ്പനി ജില്ലാ കാര്യാലയത്തിലാണ് വാക്-ഇൻ-ഇന്റർവ്യൂ നടക്കുക. വഴുതക്കാട് ചിൻമയ സ്കൂളിന് എതിർവശത്താണ് ഓഫീസ് സ്ഥിതി ചെയ്യുന്നത്.

തിരഞ്ഞെടുക്കപ്പെടുന്നവർക്ക് പ്രതിദിനം 750 രൂപ ദിവസ വേതനം ലഭിക്കും.

താൽപര്യമുള്ള ഉദ്യോഗാർഥികൾ വിദ്യാഭ്യാസ യോഗ്യത, പ്രായം, പ്രവൃത്തിപരിചയം, തിരിച്ചറിയൽ എന്നിവ തെളിയിക്കുന്ന അസൽ രേഖകളും അവയുടെ സ്വയം സാക്ഷ്യപ്പെടുത്തിയ പകർപ്പുകളും ഹാജരാക്കണം. കൂടാതെ, ഒരു മാസത്തിനകം ലഭിച്ച പോലീസ് ക്ലിയറൻസ് സർട്ടിഫിക്കറ്റിന്റെ അസലും നിർബന്ധമായും സമർപ്പിക്കേണ്ടതാണ്.

കൂടുതൽ വിവരങ്ങൾക്ക് 9447792058 എന്ന നമ്പറിൽ രാവിലെ 10 മുതൽ വൈകിട്ട് 5 വരെ ബന്ധപ്പെടാം.

പാർട്ട് ടൈം സ്വീപ്പർ, പാർട്ട് ടൈം സാനിറ്ററി വർക്കർ ഒഴിവ്

പട്ടികജാതി വികസന വകുപ്പിന്റെ നിയന്ത്രണത്തിൽ ജില്ലയിൽ പ്രവർത്തിക്കുന്ന മോഡൽ റസിഡൻഷ്യൽ സ്‌കൂളുകൾ, ഹോസ്റ്റലുകൾ എന്നിവിടങ്ങളിൽ പാർട്ട് ടൈം സ്വീപ്പർ, പാർട്ട് ടൈം സാനിറ്ററി വർക്കർ ഒഴിവുണ്ട്. പട്ടികജാതി വിഭാഗത്തിൽപ്പെട്ട ഉദ്യോഗാർത്ഥികൾക്ക് അപേക്ഷിക്കാം. ഏഴാം ക്ലാസാണ് യോഗ്യത. ഡിഗ്രി പരിഗണിക്കില്ല.

താത്പര്യമുള്ളവർ വെള്ള പേപ്പറിൽ തയാറാക്കിയ അപേക്ഷയും സർട്ടിഫിക്കറ്റുകളുടെ അസലും പകർപ്പും സഹിതം ജൂൺ 23 രാവിലെ 11ന് നന്ദാവനത്തുള്ള പട്ടികജാതി വികസന വകുപ്പ് ഡയറക്ടറേറ്റിൽ അഭിമുഖത്തിന് ഹാജരാകണമെന്ന് ജില്ലാ പട്ടികജാതി വികസന ഓഫീസർ അറിയിച്ചു. ഫോൺ: 0471-2314238.

കരാർ നിയമനം

അന്താരാഷ്ട്ര സ്വതന്ത്ര സോഫ്റ്റ്‌വെയർ കേന്ദ്രം ശാസ്ത്ര സാങ്കേതിക വകുപ്പുമായി ചേർന്നു നടത്തുന്ന പ്രോജക്ടിലേക്ക് കരാർ നിയമനത്തിന് ജൂൺ 30ന് അഭിമുഖം നടത്തും. പ്രവൃത്തി പരിചയമുള്ള ബി.ടെക് (ഇലക്ട്രോണിക്സ് ആൻഡ് കമ്മ്യൂണിക്കേഷൻ എൻജിനിയറിങ്/ ഇലക്ട്രോണിക്സ് ആൻഡ് ഇൻസ്ട്രമെന്റേഷൻ എൻജിനിയറിങ്/ മെക്കാനിക്കൽ എൻജിനിയറിങ്) ബിരുദധാരികൾക്ക് സർട്ടിഫിക്കറ്റുകളുടെ അസലും പകർപ്പും ബയോഡാറ്റയുമായി അഭിമുഖത്തിൽ പങ്കെടുക്കാം. താല്പര്യമുള്ളവർ ഐസിഫോസിന്റെ വെബ്‌സൈറ്റ് വഴി മുൻകൂർ രജിസ്റ്റർ ചെയ്യണം. കൂടുതൽവിവരങ്ങൾക്ക്: https://icfoss.in, 0471-2700012/13/14; 0471 2413013; 9400225962.