KEAM 2026; ഇനി വെറും 7 ദിവസം മാത്രം! അപേക്ഷയിൽ ഈ 5 തെറ്റുകൾ ഒഴിവാക്കണേ..!

കേരളത്തിലെ പ്രൊഫഷണൽ കോഴ്‌സുകളിലേക്കുള്ള പ്രവേശന പരീക്ഷയായ കീം (KEAM 2026) അപേക്ഷാ നടപടികൾ അവസാന ഘട്ടത്തിലേക്ക് കടക്കുകയാണ്. 2026 ജനുവരി 31-നാണ് അപേക്ഷ സമർപ്പിക്കാനുള്ള അവസാന തീയതി. എൻജിനീയറിങ്, ഫാർമസി, ആർക്കിടെക്ചർ, മെഡിക്കൽ, മെഡിക്കൽ അനുബന്ധ കോഴ്‌സുകളിലേക്ക് പ്രവേശനം ആഗ്രഹിക്കുന്ന വിദ്യാർത്ഥികൾക്ക് ഈ സമയപരിധിക്കുള്ളിൽ ഓൺലൈനായി അപേക്ഷിക്കാം. അവസാന നിമിഷത്തെ തിരക്ക് ഒഴിവാക്കാനും അപേക്ഷകളിൽ സംഭവിക്കാനിടയുള്ള ഗുരുതരമായ പിഴവുകൾ പരിഹരിക്കാനും വിദ്യാർത്ഥികൾ ശ്രദ്ധിക്കേണ്ട പ്രധാന കാര്യങ്ങൾ താഴെ നൽകുന്നു.

അവസാന തീയതിയും സമയക്രമവും
കീം 2026-ന് ഓൺലൈനായി അപേക്ഷിക്കാനുള്ള അവസാന തീയതി ജനുവരി 31 വൈകുന്നേരം 5 മണിയാണ്. പത്താം ക്ലാസ് സർട്ടിഫിക്കറ്റ്, ജനനത്തീയതി, നേറ്റിവിറ്റി തെളിവ് എന്നിവ അപ്‌ലോഡ് ചെയ്യുന്നതിനും ഇതേ സമയം വരെ മാത്രമേ സാവകാശമുള്ളൂ. എന്നാൽ മറ്റ് അനുബന്ധ രേഖകൾ (ഉദാഹരണത്തിന് ജാതി സർട്ടിഫിക്കറ്റ്, വരുമാന സർട്ടിഫിക്കറ്റ് തുടങ്ങിയവ) അപ്‌ലോഡ് ചെയ്യുന്നതിന് ഫെബ്രുവരി 7 വൈകുന്നേരം 5 മണി വരെ സമയം അനുവദിച്ചിട്ടുണ്ട്.

അപേക്ഷകൾ നിരസിക്കപ്പെടാതിരിക്കാൻ ഒഴിവാക്കേണ്ട പ്രധാന തെറ്റുകൾ

അപൂർണ്ണമായ രേഖകൾ: പത്താം ക്ലാസ് സർട്ടിഫിക്കറ്റ്, നേറ്റിവിറ്റി സർട്ടിഫിക്കറ്റ് എന്നിവ കൃത്യമായ ഫോർമാറ്റിൽ അപ്‌ലോഡ് ചെയ്തില്ലെങ്കിൽ അപേക്ഷ തള്ളിക്കളയാൻ സാധ്യതയുണ്ട്. ഓരോ വിഭാഗത്തിനും നിശ്ചയിച്ചിട്ടുള്ള അപേക്ഷാ ഫീസ് കൃത്യമായി അടച്ചിട്ടുണ്ടെന്ന് ഉറപ്പുവരുത്തുക.

ഫോട്ടോയും ഒപ്പും: സി.ഇ.ഇ (CEE) നിർദ്ദേശിച്ചിട്ടുള്ള നിശ്ചിത അളവിലും വ്യക്തതയിലുമുള്ള ഫോട്ടോയും ഒപ്പും മാത്രമേ അപ്‌ലോഡ് ചെയ്യാവൂ. അവ്യക്തമായ ഫോട്ടോകളോ ഒപ്പോ ഉള്ള അപേക്ഷകൾ നിരസിക്കപ്പെടും.

ഒന്നിലധികം അപേക്ഷകൾ: എല്ലാ കോഴ്സുകൾക്കുമായി ഒരു അപേക്ഷ മാത്രമേ സമർപ്പിക്കാവൂ. എൻജിനീയറിംഗിനും മെഡിക്കലിനും പ്രത്യേകം അപേക്ഷകൾ നൽകുന്നത് അപേക്ഷ നിരസിക്കപ്പെടാൻ കാരണമാകും.

വിവരങ്ങളിലെ കൃത്യത: പേര്, ജനനത്തീയതി എന്നിവ പത്താം ക്ലാസ് സർട്ടിഫിക്കറ്റിലെ പോലെ തന്നെ നൽകുക. സജീവമായ ഒരു മൊബൈൽ നമ്പറും ഇമെയിൽ ഐഡിയും മാത്രം രജിസ്ട്രേഷന് ഉപയോഗിക്കുക. തുടർന്ന് ലഭിക്കുന്ന ആപ്ലിക്കേഷൻ നമ്പറും പാസ്‌വേഡും സുരക്ഷിതമായി സൂക്ഷിക്കുക.

നേറ്റിവിറ്റി തെളിവ്: കേരളീയനാണെന്ന് തെളിയിക്കുന്നതിന് ആവശ്യമായ കൃത്യമായ രേഖകൾ അപ്‌ലോഡ് ചെയ്യണം. ജാതി സംവരണമോ മറ്റ് ആനുകൂല്യങ്ങളോ അവകാശപ്പെടുന്നവർ അതിനുള്ള മതിയായ രേഖകൾ ഓൺലൈനായി തന്നെ നൽകണം. തപാൽ വഴി അയക്കുന്ന സർട്ടിഫിക്കറ്റുകൾ സ്വീകരിക്കില്ല.

അപേക്ഷാ ഫീസിലെ മാറ്റങ്ങൾ
ഇത്തവണ അപേക്ഷാ ഫീസിൽ വർദ്ധനവുണ്ടായിട്ടുണ്ട്. ഓരോ പ്രോഗ്രാമിനും വെവ്വേറെ ഫീസാണ് അടയ്ക്കേണ്ടത്. എൻജിനീയറിങ്, ഫാർമസി വിഭാഗങ്ങളിൽ ജനറൽ വിഭാഗത്തിന് 920 രൂപയും പട്ടികജാതി വിഭാഗത്തിന് 400 രൂപയുമാണ് ഫീസ്. ആർക്കിടെക്ചർ, മെഡിക്കൽ അനുബന്ധ കോഴ്സുകൾക്ക് ജനറൽ വിഭാഗത്തിന് 650 രൂപയും പട്ടികജാതി വിഭാഗത്തിന് 260 രൂപയുമാണ് നിശ്ചയിച്ചിരിക്കുന്നത്.

അപേക്ഷ സമർപ്പിച്ചു കഴിഞ്ഞാൽ കൺഫർമേഷൻ പേജിന്റെ (Acknowledgement Page) പ്രിന്റൗട്ട് എടുത്ത് സൂക്ഷിക്കേണ്ടതാണ്. എന്തെങ്കിലും സാങ്കേതിക ബുദ്ധിമുട്ടുകൾ നേരിടുന്നുണ്ടെങ്കിൽ ഹെൽപ്പ്‌ലൈൻ നമ്പറുകളായ 0471-2332120, 2338487 എന്നിവയിൽ ബന്ധപ്പെടാവുന്നതാണ്.