കെഡിസ്കിൽ 11 ഒഴിവുകൾ; 1.20 ലക്ഷം രൂപ വരെ ശമ്പളം..ഇപ്പോൾ അപേക്ഷിക്കാം

കെ-ഡിസ്ക് (K-DISC) നടത്തുന്ന എമർജിംഗ് ടെക്നോളജീസ് ഡിവിഷനിലെ പ്രോഗ്രാം മാനേജ്‌മെന്റ് യൂണിറ്റിൽ വിവിധ തസ്തികകളിലേക്ക് അപേക്ഷ ക്ഷണിച്ചു. കരാർ അടിസ്ഥാനത്തിലാണ് നിയമനം. സീനിയർ പ്രോഗ്രാം മാനേജർ/ടീം ലീഡ്, പ്രോഗ്രാം മാനേജർ, സീനിയർ പ്രോഗ്രാം എക്സിക്യൂട്ടീവ്, സീനിയർ പ്രോഗ്രാം എക്സിക്യൂട്ടീവ് - ബിസിനസ് അനലിസ്റ്റ് എന്നീ തസ്തികകളിലാണ് ഒഴിവുകളുള്ളത്. നവംബർ 18 വരെ അപേക്ഷിക്കാം. യോഗ്യത, ശമ്പളം തുടങ്ങിയ വിവരങ്ങൾ അറിയാം.

സീനിയർ പ്രോഗ്രാം മാനേജർ ടീം ലീഡ് (ഒഴിവ്: 1)

ബി.ടെക് (ഏതെങ്കിലും വിഷയത്തിൽ), എം.സി.എ അല്ലെങ്കിൽ എം.എസ്‌സി കമ്പ്യൂട്ടർ സയൻസ് ബിരുദമാണ് അടിസ്ഥാന യോഗ്യത. പ്രോജക്ട് മാനേജ്‌മെന്റ് സർട്ടിഫിക്കേഷൻ അധിക യോഗ്യതയായി കണക്കാക്കും.

പ്രോജക്ട്/പ്രോഗ്രാം മാനേജ്‌മെന്റിൽ മുൻപരിചയം, എമർജിംഗ് ടെക്നോളജികളിലെ സോഫ്റ്റ്‌വെയർ ഡെവലപ്‌മെന്റ് പ്രക്രിയകളിലെ അറിവ്, കുറഞ്ഞത് 10 അംഗങ്ങളുള്ള സാങ്കേതിക ടീമിനെ നയിച്ച പരിചയം എന്നിവ അത്യാവശ്യമാണ്. കൂടാതെ, സോഫ്റ്റ്‌വെയർ ആർക്കിടെക്ചർ രൂപകൽപ്പന ചെയ്യാനും ബിസിനസ്, യൂസർ, നോൺ-ഫങ്ഷണൽ ആവശ്യകതകൾ എഴുതാനും അവലോകനം ചെയ്യാനുമുള്ള കഴിവ് ഉണ്ടായിരിക്കണം.

മികച്ച ആശയവിനിമയ ശേഷിയും നവീകരണത്തോടുള്ള താൽപ്പര്യവും നിർബന്ധമാണ്. സർക്കാർ പദ്ധതികളിൽ പ്രവർത്തിച്ച പരിചയം അഭികാമ്യം. കുറഞ്ഞത് 10 വർഷത്തെ കോർപ്പറേറ്റ് ഐ.ടി പ്രവൃത്തിപരിചയവും അതിൽ 8 വർഷം വരെ ഐ.ടി ബിസിനസ് അനാലിസിസ് അല്ലെങ്കിൽ അനുബന്ധ സാങ്കേതിക മേഖലയിലും പ്രോജക്ട് മാനേജ്‌മെന്റിലുമായിരിക്കണം. പ്രതിമാസം 1,10,000 രൂപ മുതൽ 1,20,000 രൂപ വരെയാണ് ശമ്പളം.

പ്രോഗ്രാം മാനേജർ (ഒഴിവ്: 2)

ബി.ടെക് (ഏതെങ്കിലും വിഷയത്തിൽ), എം.സി.എ അല്ലെങ്കിൽ എം.എസ്‌സി കമ്പ്യൂട്ടർ സയൻസ് ബിരുദമാണ് അടിസ്ഥാന യോഗ്യത. പ്രോജക്ട് മാനേജ്‌മെന്റ് സർട്ടിഫിക്കേഷൻ അഭിലഷണീയമാണ്. ബിസിനസ് അനാലിസിസിൽ മുൻപരിചയം, ബിസിനസ്, യൂസർ, നോൺ-ഫങ്ഷണൽ ആവശ്യകതകൾ എഴുതാനും അവലോകനം ചെയ്യാനുമുള്ള കഴിവ്, കുറഞ്ഞത് 10 അംഗങ്ങളുള്ള സാങ്കേതിക ടീമിനെ നയിച്ച പരിചയം എന്നിവ അത്യാവശ്യം. 6 മുതൽ 10 വർഷം വരെ കോർപ്പറേറ്റ് ഐ.ടി പ്രവൃത്തിപരിചയം വേണം. അതിൽ 3 വർഷം വരെ ഐ.ടി ബിസിനസ് അനാലിസിസ് അല്ലെങ്കിൽ അനുബന്ധ സാങ്കേതിക മേഖലയിലും 5 വർഷം പ്രോജക്ട് മാനേജ്‌മെന്റിലുമായിരിക്കണം. കുറഞ്ഞത് ഒരു വർഷത്തെ എമർജിംഗ് ടെക്നോളജീസ് പ്രവൃത്തിപരിചയം നിർബന്ധം. പ്രതിമാസം 70,000 രൂപ മുതൽ 80,000 രൂപ വരെയാണ് ശമ്പളം.

സീനിയർ പ്രോഗ്രാം എക്സിക്യൂട്ടീവ് (ഒഴിവ്: 6)

ബി.ടെക് (ഏതെങ്കിലും വിഷയത്തിൽ), എം.സി.എ അല്ലെങ്കിൽ എം.എസ്‌സി കമ്പ്യൂട്ടർ സയൻസ് ബിരുദമാണ് അടിസ്ഥാന യോഗ്യത. വിശകലന ശേഷി, മലയാളത്തിലും ഇംഗ്ലീഷിലും മികച്ച ആശയവിനിമയ കഴിവുകൾ, അഡ്വാൻസ്ഡ് കമ്പ്യൂട്ടർ പരിജ്ഞാനം, സമയബന്ധിതമായി ജോലികൾ പൂർത്തിയാക്കാനുള്ള കഴിവ്, വിവിധ സ്റ്റേക്ക്‌ഹോൾഡർമാരുമായി സഹകരിക്കാനുള്ള കഴിവ്, നവീകരണത്തോടുള്ള താൽപ്പര്യം എന്നിവ അത്യാവശ്യം.

സർക്കാർ/സ്വയംഭരണ സ്ഥാപനങ്ങളിലോ പ്രശസ്തമായ കമ്പനികളിലോ 5 വർഷത്തെ ഐ.ടി/എമർജിംഗ് ടെക്നോളജി പ്രോഗ്രാം മാനേജ്‌മെന്റ് പരിചയം ഉണ്ടായിരിക്കണം. സാങ്കേതികവിദ്യയിലോ മാനേജ്‌മെന്റിലോ 2 മുതൽ 4 വർഷം വരെ പ്രവൃത്തിപരിചയം, എമർജിംഗ് ടെക്നോളജികളിൽ പ്രകടമായ പരിചയം എന്നിവയും നിർബന്ധം. പ്രതിമാസം 40,000 രൂപ മുതൽ 50,000 രൂപ വരെയാണ് ശമ്പളം.

സീനിയർ പ്രോഗ്രാം എക്സിക്യൂട്ടീവ് (ബിസിനസ് അനലിസ്റ്റ്) (ഒഴിവ്: 2)

ബി.ടെക് (ഏതെങ്കിലും വിഷയത്തിൽ), എം.സി.എ അല്ലെങ്കിൽ എം.എസ്‌സി കമ്പ്യൂട്ടർ സയൻസ് ബിരുദമാണ് അടിസ്ഥാന യോഗ്യത. സർട്ടിഫൈഡ് ബിസിനസ് അനാലിസിസ് പ്രൊഫഷണൽ (CBAP) അല്ലെങ്കിൽ ISEB ബിസിനസ് അനാലിസിസ് ഡിപ്ലോമ അഭികാമ്യം. സർക്കാർ/സ്വയംഭരണ സ്ഥാപനങ്ങളിലോ പ്രശസ്തമായ അക്കാദമിക്/ഗവേഷണ/വ്യവസായ സ്ഥാപനങ്ങളിലോ 5 വർഷത്തെ ബിസിനസ് അനാലിസിസ് പരിചയം നിർബന്ധം. എമർജിംഗ് ടെക്നോളജികളിൽ പ്രകടമായ പരിചയം, ടെക്നിക്കൽ റൈറ്റിംഗിൽ പരിചയം, സാങ്കേതികവിദ്യയിലോ മാനേജ്‌മെന്റിലോ 2 മുതൽ 4 വർഷം വരെ പ്രവൃത്തിപരിചയം എന്നിവയും ആവശ്യമാണ്. പ്രതിമാസം 40,000 രൂപ മുതൽ 50,000 രൂപ വരെയാണ് ശമ്പളം.

അപേക്ഷിക്കാൻ

പ്രാരംഭ നിയമനം 2026 ജൂൺ 30 വരെയായിരിക്കും. ഉദ്യോഗാർത്ഥിയുടെ പ്രകടനവും പി.എം.യു പ്രവർത്തനങ്ങളുടെ തുടർച്ചയും അടിസ്ഥാനമാക്കി കാലാവധി നീട്ടാം. പൂരിപ്പിച്ച അപേക്ഷയും വിശദമായ സി.വി.യും വിദ്യാഭ്യാസ യോഗ്യത, പ്രവൃത്തിപരിചയം എന്നിവ തെളിയിക്കുന്ന സർട്ടിഫിക്കറ്റുകളുടെ പകർപ്പുകളും [email protected] എന്ന ഇമെയിൽ വിലാസത്തിലേക്ക് അയയ്ക്കണം. കൂടുതൽ വിവരങ്ങൾക്ക് https://cmd.kerala.gov.in/wp-content/uploads/2025/11/Notification-1-V2.1.pdf