എഴുത്തുപരീക്ഷയില്ല... അഭിമുഖം മാത്രം! ഐആര്സിടിസിയില് 84 ഒഴിവുകള്, കേരളത്തിലും നിയമനം
ഇന്ത്യന് റെയില്വേ കാറ്ററിംഗ് ആന്ഡ് ടൂറിസം കോര്പ്പറേഷന് (IRCTC) ഹോസ്പിറ്റാലിറ്റി മോണിറ്റര് തസ്തികകളിലേക്ക് അഭിമുഖത്തിലൂടെ നിയമനം നടത്തുന്നു. ആകെ 84 ഒഴിവുകളാണുള്ളത്. യോഗ്യരായ ഉദ്യോഗാര്ത്ഥികള്ക്ക് 2026 ഏപ്രില് 25, 27, 28 തീയതികളില് നേരിട്ടുള്ള അഭിമുഖത്തില് പങ്കെടുക്കാവുന്നതാണ്.
ഹോസ്പിറ്റാലിറ്റി & ഹോട്ടല് അഡ്മിനിസ്ട്രേഷന്/ഹോട്ടല് മാനേജ്മെന്റ് & കാറ്ററിംഗ് സയന്സ് എന്നിവയില് ബി.എസ്.സി. യോഗ്യതയുള്ളവര്ക്ക് അപേക്ഷിക്കാം. ടൂറിസം മന്ത്രാലയത്തിന്റെ കീഴിലുള്ള ഇന്ത്യന് കലനറി ഇന്സ്റ്റിറ്റ്യൂട്ടുകളില് നിന്നുള്ള ബി.ബി.എ./എം.ബി.എ (കലനറി ആര്ട്ട്സ്) അല്ലെങ്കില് അംഗീകൃത സര്വ്വകലാശാലകളില് നിന്നുള്ള എം.ബി.എ (ടൂറിസം & ഹോട്ടല് മാനേജ്മെന്റ്) എന്നിവയും പരിഗണിക്കും.
ഫ്രഷേഴ്സിനും അപേക്ഷിക്കാം. അഭിമുഖം ഏപ്രില് 25, 27, 28 തീയതികളില് രാവിലെ 10:30 മുതല് വൈകുന്നേരം 5:30 വരെ നടക്കും. ചെന്നൈയിലെ IRCTC സോണല് ഓഫീസാണ് വേദി. വിലാസം: 6A, The Rain Tree Place, No.9, Mc Nichols Road, Chetpet, Chennai - 600031. ഈ തസ്തികകളിലേക്ക് അപേക്ഷാ ഫീസ് ഇല്ല. അപേക്ഷിക്കുന്നവര്ക്ക് 2026 ഏപ്രില് 1-ന് 27 വയസ്സ് കവിയരുത്. സര്ക്കാര് നിയമങ്ങള് പ്രകാരം പ്രായപരിധിയില് ഇളവുകള് ലഭ്യമാണ്.
തിരഞ്ഞെടുക്കപ്പെടുന്നവര്ക്ക് പ്രതിമാസം 30,000 രൂപ ഏകീകൃത ശമ്പളം ലഭിക്കും. ഇത് നിയമപരമായ കിഴിവുകള് ഉള്പ്പെടെയുള്ളതാണ്. ആവശ്യമുള്ള അപേക്ഷാ ഫോം ഡൗണ്ലോഡ് ചെയ്ത് പൂരിപ്പിക്കുക. യഥാര്ത്ഥ സര്ട്ടിഫിക്കറ്റുകള്, സ്വയം സാക്ഷ്യപ്പെടുത്തിയ പകര്പ്പുകള്, മൂന്ന് സമീപകാല പാസ്പോര്ട്ട് സൈസ് ഫോട്ടോകള് എന്നിവ സഹിതം അഭിമുഖത്തിന് എത്തണം.
ഓണ്ലൈന് അപേക്ഷകളൊന്നും സ്വീകരിക്കുന്നതല്ല. അഭിമുഖത്തിനായി യാത്രാബത്തയും ദൂരയാത്രാബത്തയും (TA/DA) ലഭിക്കില്ല. അഭിമുഖത്തിലൂടെ മാത്രമാണ് തിരഞ്ഞെടുപ്പ്. വിദ്യാഭ്യാസ യോഗ്യത, പ്രവൃത്തിപരിചയം (എന്തെങ്കിലുമുണ്ടെങ്കില്), വ്യക്തിഗത അഭിമുഖത്തിലെ പ്രകടനം എന്നിവയുടെ അടിസ്ഥാനത്തിലാണ് ഷോര്ട്ട്ലിസ്റ്റ് ചെയ്യല്. മെറിറ്റ് ക്രമത്തില് നിയമനം നല്കും.
ഒഴിവുകളില് കുറവുണ്ടായാല് ഉപയോഗിക്കാന് ഒരു റിസര്വ് പാനലും തയ്യാറാക്കും. നിയമനം IRCTCയുടെ മെഡിക്കല് ഫിറ്റ്നസ് മാനദണ്ഡങ്ങള് പാലിക്കുന്നവര്ക്ക് മാത്രമായിരിക്കും. നിയമനം രണ്ട് വര്ഷത്തെ കരാര് അടിസ്ഥാനത്തിലാണ്, ഇത് പ്രകടനവും ആവശ്യകതയും അനുസരിച്ച് ഒരു വര്ഷം കൂടി നീട്ടാം. ഇത് IRCTCയില് സ്ഥിരം നിയമനത്തിനുള്ള അവകാശം നല്കുന്നില്ല. ഒരു മാസത്തെ നോട്ടീസ് നല്കി ഇരു കക്ഷികള്ക്കും കരാര് അവസാനിപ്പിക്കാം.
തിരഞ്ഞെടുക്കപ്പെടുന്നവര് 25,000 രൂപ സെക്യൂരിറ്റി ഡെപ്പോസിറ്റായി നല്കണം. ഇന്ത്യന് പൗരന്മാര്ക്ക് മാത്രമാണ് ഈ നിയമനത്തിന് യോഗ്യത. സര്ക്കാര്/പൊതുമേഖലാ സ്ഥാപനങ്ങളിലെ ജീവനക്കാര് അഭിമുഖസമയത്ത് എന്ഒസിയും, നിയമനം ലഭിക്കുമ്പോള് റിലീവിംഗ് ലെറ്ററും നിര്ബന്ധമായും ഹാജരാക്കണം. കമ്പ്യൂട്ടര് പരിജ്ഞാനം (MS Office), റിപ്പോര്ട്ട് തയ്യാറാക്കാനുള്ള കഴിവ്, ഇംഗ്ലീഷ്, ഹിന്ദി ഭാഷകളില് മികച്ച ആശയവിനിമയ ശേഷി എന്നിവ അത്യാവശ്യമാണ്.
പ്രാദേശിക ഭാഷാ അറിവ് അധിക യോഗ്യത. തിരഞ്ഞെടുക്കപ്പെടുന്നവരെ തമിഴ്നാട്, കേരളം, കര്ണാടക എന്നിവിടങ്ങളില് നിയമിക്കാന് സാധ്യതയുണ്ട്, എന്നാല് IRCTCയുടെ ആവശ്യകതയനുസരിച്ച് രാജ്യത്തെവിടേയും നിയമനം ലഭിക്കാം. അപേക്ഷകര് എല്ലാ യോഗ്യതാ മാനദണ്ഡങ്ങളും പാലിക്കുന്നുണ്ടെന്ന് ഉറപ്പാക്കണം. തെറ്റായ വിവരങ്ങള് കണ്ടെത്തിയാല് അപേക്ഷ റദ്ദാക്കും. വിജ്ഞാപനം റദ്ദാക്കാനോ ഭേദഗതി വരുത്താനോ IRCTCക്ക് അവകാശമുണ്ട്.
ഒഴിവുകളുടെ എണ്ണം ആവശ്യകതയനുസരിച്ച് കൂടുകയോ കുറയുകയോ ചെയ്യാം. എല്ലാ അറിയിപ്പുകള്ക്കും തിരുത്തലുകള്ക്കുമായി ഉദ്യോഗാര്ത്ഥികള് IRCTCയുടെ ഔദ്യോഗിക വെബ്സൈറ്റായ www.irctc.com പതിവായി സന്ദര്ശിക്കണം. ഏതെങ്കിലും തരത്തിലുള്ള സ്വാധീന ശ്രമങ്ങള് അയോഗ്യതയിലേക്ക് നയിക്കുന്നതാണ്.
Click it and Unblock the Notifications
Sign in with Google