പ്ലാന്റേഷന് കോര്പ്പറേഷനില് ഒഴിവുകള്; ഏഴാം ക്ലാസ് പാസായവര്ക്ക് അപേക്ഷിക്കാം, ഡിഗ്രി ഉണ്ടാകരുത്..!
പ്ലാന്റേഷന് കോര്പ്പറേഷന് ഓഫ് കേരള ലിമിറ്റഡില് വര്ക്കര് തസ്തികകളില് ഒഴിവ്. ഇത് സംബന്ധിച്ച വിജ്ഞാപനം പ്ലാന്റേഷന് കോര്പ്പറേഷന് പുറത്തിറക്കി. കേരളത്തിലുടനീളം 460 ഒഴിവുകളാണ് റിപ്പോര്ട്ട് ചെയ്തിരിക്കുന്നത്. താല്പര്യവും യോഗ്യതയുമുള്ള ഉദ്യോഗാര്ത്ഥികള്ക്ക് ആഗസ്റ്റ് 30 വരെ ഓഫ്ലൈന് വഴി ( തപാല് വഴി ) തസ്തികയിലേക്ക് അപേക്ഷിക്കാവുന്നതാണ്.
രാജപുരം 75, ഓയില് പാം 13, നിലമ്പൂര് 92, മണ്ണാര്ക്കാട് 60, കൊടുമണ് 55, ചന്ദനപ്പള്ളി 90, തണ്ണിത്തോട് 50, അതിരപ്പള്ളി 25 എന്നിങ്ങനെയാണ് ഒഴിവുകള്. ഉദ്യോഗാര്ത്ഥികളുടെ പ്രായപരിധി 18 വയസിനും 50 വയസിനും ഇടയില് ആയിരിക്കണം. ( അതായത് അപേക്ഷകര് 02.01.1975 നും 01.01.2007 നും ഇടയില് ജനിച്ചവരായിരിക്കണം, രണ്ട് തിയതിയും ഉള്പ്പെടെ). എസ് സി / എസ് ടി, ഒ ബി സി ഉദ്യോഗാര്ത്ഥികള്ക്ക് പ്രായപരിധിയില് നിയമാനുസൃത ഇളവ് ലഭിക്കും.
റബ്ബര് തോട്ടം മേഖലയില് കുറഞ്ഞത് മൂന്ന് വര്ഷത്തെ പരിചയമുള്ള ഉദ്യോഗാര്ത്ഥികള്ക്ക് ഉയര്ന്ന പ്രായപരിധിയില് ഇളവ് ലഭിക്കും. അപേക്ഷകര് ഏഴാം ക്ലാസ് പാസായിരിക്കണം, പക്ഷേ ബിരുദം നേടിയിരിക്കരുത്. അപേക്ഷകര് ബിരുദം നേടിയിട്ടില്ലെന്ന് വ്യക്തമാക്കുന്ന ഒരു സമ്മതപത്രവും അറ്റാച്ചുചെയ്ത ഫോര്മാറ്റില് സമര്പ്പിക്കണം. തോട്ടങ്ങളില് ജോലി ചെയ്യാന് ശാരീരികമായി യോഗ്യരായിരിക്കണം.
റബ്ബര് ബോര്ഡില് നിന്നോ പ്ലാന്റേഷന് കോര്പ്പറേഷനില് നിന്നോ ടാപ്പിംഗ് പരിശീലന സര്ട്ടിഫിക്കറ്റ് ഉള്ളവരായിരിക്കണം. തിരഞ്ഞെടുക്കപ്പെടുന്നവര്ക്ക് മാനദണ്ഡപ്രകാരമുള്ള ശമ്പളം ലഭിക്കണം. പ്ലാന്റേഷന് കോര്പ്പറേഷന് റിക്രൂട്ട്മെന്റിന് ഏതെങ്കിലും തരത്തിലുള്ള അപേക്ഷാ ഫീസ് ആവശ്യമില്ല. തിരഞ്ഞെടുപ്പിനായി ഉദ്യോഗാര്ത്ഥികള്ക്ക് നേത്ര പരിശോധന, ബിഎംഐ ടെസ്റ്റ്, അഭിമുഖം എന്നിവ ഉണ്ടായിരിക്കും.
ഇതിനായി കോര്പ്പറേഷന് നിശ്ചയിക്കുന്ന സ്ഥലത്തും സമയത്തും അഭിമുഖത്തിനും മറ്റ് പരീക്ഷകള്ക്കും ഉദ്യോഗാര്ത്ഥികള് ഹാജരാകണം. താല്പ്പര്യമുള്ളവരും യോഗ്യരുമായ ഉദ്യോഗാര്ത്ഥികള് അവരുടെ വിദ്യാഭ്യാസ യോഗ്യത, പ്രായം, ജോലി പരിചയം, ജാതി, നോണ്-ക്രീമി ലെയര് മുതലായവ തെളിയിക്കുന്ന സര്ട്ടിഫിക്കറ്റുകളുടെ ഒറിജിനല്, പകര്പ്പുകള് എന്നിവ സഹിതമാണ് അപേക്ഷിക്കേണ്ടത്.
നിര്ദ്ദിഷ്ട ഫോര്മാറ്റിലുള്ള അപേക്ഷ 'മാനേജര്, അതിരപ്പിള്ളി എസ്റ്റേറ്റ്, കാലടി പ്ലാന്റേഷന് പി.ഒ.എം. അങ്കമാലി, എറണാകുളം- 683581' എന്ന വിലാസത്തില് ആഗസ്റ്റ് 30-നോ അതിനുമുമ്പോ അയയ്ക്കണം. അവസാന തിയതിയ്ക്ക് ശേഷം ലഭിക്കുന്ന അപേക്ഷകള് ഒരു കാരണവശാലും പരിഗണിക്കുന്നതല്ല.
Click it and Unblock the Notifications
Sign in with Google