ലുലു ഗ്രൂപ്പില് ആയിരത്തിലേറെ തൊഴില് അവസരം; അതും ഗള്ഫില്: വന് പദ്ധതികള് വരുന്നു
ഗള്ഫ് രാഷ്ട്രങ്ങളിലെ പ്രവർത്തനങ്ങള് അനുദിനം വ്യാപിപ്പിച്ചുകൊണ്ടിരിക്കുകയാണ് ലുലു ഗ്രൂപ്പ്. അടുത്തഘട്ടത്തില് പ്രധാന നഗരങ്ങളുടെ പ്രാന്തപ്രദേശങ്ങളില് തങ്ങളുടെ കൂടുതല് പുതിയ സ്റ്റോറുകള് തുറക്കുമെന്നാണ് ലുലു ഗ്രൂപ്പ് ചെയർമാനും എംഡിയുമായ എംഎ യൂസഫലി തന്നെ അറിയിക്കുന്നത്. ഈ പുതിയ ഔട്ട്ലെറ്റുകൾ യുഎഇയിലെ റീട്ടെയിൽ മേഖലയിൽ നൂറുകണക്കിന്, ആയിരക്കണക്കിന് പുതിയ തൊഴിലവസരങ്ങൾ സൃഷ്ടിക്കുമെന്നും അദ്ദേഹം കൂട്ടിച്ചേർത്തു.
'ദുബായിലും വടക്കൻ എമിറേറ്റുകളിലും തങ്ങളുടെ പതിനഞ്ച് പുതിയ പദ്ധതികൾ വരുന്നു. യു എഇയിലെ എല്ലാ പ്രധാന നഗരങ്ങളിലും പട്ടണങ്ങളിൽ നിന്ന് പ്രാന്തപ്രദേശങ്ങളിലേക്ക് ജനസംഖ്യ വർദ്ധിച്ചുകൊണ്ടിരിക്കുകയാണ്. അതിനാൽ, ഞങ്ങളും ആ പ്രദേശങ്ങൾ പര്യവേക്ഷണം ചെയ്യുകയാണ്. ഒരു ഹൈപ്പർമാർക്കറ്റായാലും എക്സ്പ്രസ് സ്റ്റോറായാലും, അത് ആ പ്രദേശങ്ങളിലെ ജനസാന്ദ്രതയെ ആശ്രയിച്ചിരിക്കും' എം എ യൂസഫലി പറഞ്ഞു.
വിദേശ തൊഴിലാളികളുടെ കുടിയേറ്റം ദുബായ്, അബുദാബി, ഷാർജ, മറ്റ് പ്രധാന നഗരങ്ങൾ എന്നിവിടങ്ങളിലെ ജനസംഖ്യ ക്രമാതീതമായി വർദ്ധിച്ചു. നഗരങ്ങളുടെ ഡൗണ്ടൗണുകളിലും മധ്യ ജില്ലകളിലും ഉയർന്ന വാടക കാരണം ചിലവ് കുറയ്ക്കാനായി പല ആളുകളും പ്രാന്തപ്രദേശങ്ങളാണ് ഇപ്പോള് താമസിക്കാനായി തിരഞ്ഞടുക്കുന്നത്. യു എ ഇയിലെ ജനസംഖ്യാ വളർച്ചയോടെ, ഗ്രൂപ്പിന് ഇവിടെ വളരാൻ മികച്ച അവസരങ്ങളാണ് ലഭിച്ചുകൊണ്ടിരിക്കുന്നതെന്ന് ലുലു റീട്ടെയിൽ സി ഇ ഒ സൈഫി രൂപാവാലയും അഭിപ്രായപ്പെട്ടു.
"ഞങ്ങൾ നിരവധി ഡെവലപ്പർമാരുമായി ചർച്ച നടത്തുകയാണ്. ഞങ്ങളെ ഒരു പ്രധാന ഇടപാടുകാരായി കണക്കാക്കിയ പ്രധാന ഡെവലപ്പർമാർക്ക് ഞങ്ങൾ നന്ദി പറയുന്നു. അവർ ഞങ്ങൾക്ക് അവസരം നൽകി, യു എ ഇയിൽ എല്ലായിടത്തും ലുലു സ്റ്റോറുകള് സ്ഥാപിക്കാന് ഞങ്ങളിൽ അവർ വിശ്വാസം അർപ്പിച്ചു. യു എ ഇയിൽ മാത്രം 30 പദ്ധതികൾ ചർച്ചയിലുണ്ട്, പക്ഷേ ഇതുവരെ അക്കാര്യത്തില് അന്തിമ തീരുമാനമായിട്ടില്ല," അദ്ദേഹം പറഞ്ഞു.
യു എ ഇയും സൗദി അറേബ്യയും റീട്ടെയിലർമാരുടെ ശ്രദ്ധാകേന്ദ്രമായ വിപണികളാണ്. ഞങ്ങള് ജി സി സി മേഖലയിലെ ഒന്നാം നമ്പർ റീട്ടെയിലർമാരാണ്. സൗദി അറേബ്യയില് കമ്പനിക്ക് വ്യക്തമായ വളർച്ചാ പദ്ധതികളുണ്ട്. ഞങ്ങൾ ഒന്നാം നിര, രണ്ടാം നിര നഗരങ്ങളിലേക്ക് പോകുകയാണ്. ജനസംഖ്യാശാസ്ത്രവും ജനസംഖ്യാ സാന്ദ്രതയും അനുസരിച്ച്, ലുലു ഔട്ട്ലെറ്റുകളുടെ വലുപ്പം ഞങ്ങൾ തീരുമാനിക്കും. സൗദി അറേബ്യയിൽ ഞങ്ങൾക്ക് 37 സ്റ്റോറുകൾ കൂടി വരാനിരിക്കുന്നു.
2028 ആകുമ്പോഴേക്കും സൗദി അറേബ്യയിൽ ഇടത്തരം കാലയളവിൽ 100 സ്റ്റോറുകൾ തുറക്കാൻ ഞങ്ങൾ ലക്ഷ്യമിടുന്നു. നിലവില് 16 നഗരങ്ങളിൽ മാത്രമേ ഞങ്ങൾക്ക് സാന്നിധ്യമുള്ളൂ. അവിടെ വളരാൻ വലിയ അവസരങ്ങളാണുള്ളത്. വിഷന് 2030 അടിസ്ഥാനമാക്കി 31 നഗരങ്ങളിലേക്ക് കൂടി പദ്ധതി വ്യാപിപ്പിക്കാനാണ് ഞങ്ങളുടെ നീക്കമെന്നും ഖലീജ് ടൈംസിന് നല്കിയ അഭിമുഖത്തില് സൈഫി രൂപാവാല വ്യക്തമാക്കി.
യുഎഇ, സൗദി അറേബ്യ, മറ്റ് ഗൾഫ് രാജ്യങ്ങൾ എന്നിവിടങ്ങളിലെ പുതിയ സ്റ്റോറുകള് നിരവധി തൊഴില് അവസരങ്ങളും സൃഷ്ടിക്കപ്പെടും. സാധാരണഗതിയില് ഒരു ഹൈപ്പർമാർക്കറ്റിൽ ശരാശരി 290 ജീവനക്കാരെയാണ് ലുലു നിയമിക്കുന്നത്യ എക്സ്പ്രസ് സ്റ്റോറാണെങ്കില് ഇത് 55 പേരിലേക്കും മിനി മാർക്കറ്റിൽ മൂന്ന് പേരിലേക്കും ചുരുങ്ങും. 2024 ജൂൺ 30 അവസാനത്തോടെ ലുലു ഗ്രൂപ്പ് ഏകദേശം 55000 മുഴുവൻ സമയ ജീവനക്കാരെ തങ്ങളുടെ സ്ഥാപനങ്ങളില് നിയമിച്ചിട്ടുണ്ട്.
അതേസമയം, ജി സി സിയിലെ ലുലുവിന്റെ 252-ാമത്തെ സ്റ്റോർ കഴിഞ്ഞ ദിവസം ദുബായിലെ അൽ സത്വയിൽ ആരംഭിച്ചിരുന്നു. അൽ ജദ്ദാഫ്, ജെഎൽടി, നാദ് അൽ ഹമ്മർ, ദുബായ് എക്സ്പോ സിറ്റി, ഖോർഫഖാൻ, ഔദ് അൽ മുതിന എന്നിവയുൾപ്പെടെയുള്ള പ്രധാന മേഖലകളിൽ കൂടുതൽ സ്റ്റോറുകൾ ഉടൻ തുറക്കും.
Click it and Unblock the Notifications
Sign in with Google