കേന്ദ്ര സർക്കാരിൽ ജോലി സ്വപ്നമാണോ? പ്ലസ് ടു പാസായവർക്ക് സുവർണ്ണാവസരം! സ്റ്റെനോഗ്രാഫർ വിജ്ഞാപനം പുറത്ത്

കേന്ദ്ര സർക്കാർ സർവീസിൽ ഒരു സ്ഥിര ജോലി ആഗ്രഹിക്കുന്ന ഉദ്യോഗാർത്ഥികൾക്ക് സുവർണാവസരം. സ്റ്റാഫ് സെലക്ഷൻ കമ്മീഷൻ (SSC) സ്റ്റെനോഗ്രാഫർ ഗ്രേഡ് സി, ഗ്രേഡ് ഡി തസ്തികകളിലേക്കുള്ള 2026-ലെ ഔദ്യോഗിക വിജ്ഞാപനം പുറപ്പെടുവിച്ചു. വിവിധ കേന്ദ്ര മന്ത്രാലയങ്ങളിലും വകുപ്പുകളിലുമായി നൂറുകണക്കിന് ഒഴിവുകളിലേക്കാണ് അപേക്ഷ ക്ഷണിച്ചിരിക്കുന്നത്. സ്റ്റെനോഗ്രഫിയിൽ നൈപുണ്യമുള്ളവർക്കും പ്ലസ് ടു പാസായവർക്കും ഈ സുവർണ്ണാവസരം പ്രയോജനപ്പെടുത്താം.

ഒഴിവുകളും തസ്തികകളും

നിലവിൽ ഏകദേശം 731 താൽക്കാലിക ഒഴിവുകളാണ് എസ്എസ്സി റിപ്പോർട്ട് ചെയ്തിരിക്കുന്നത്. ഗ്രേഡ് സി (ഗ്രൂപ്പ് ബി - നോൺ ഗസറ്റഡ്), ഗ്രേഡ് ഡി (ഗ്രൂപ്പ് സി) എന്നീ രണ്ട് വിഭാഗങ്ങളിലായാണ് നിയമനം നടക്കുന്നത്. ഫൈനൽ വേക്കൻസി വിവരങ്ങൾ പരീക്ഷാ സമയത്തോ അതിനുശേഷമോ എസ്എസ്സിയുടെ വെബ്സൈറ്റിൽ ലഭ്യമാക്കും.

പ്രധാന തീയതികൾ

അപേക്ഷാ സമർപ്പണം ആരംഭിച്ചത്: 2026 ഏപ്രിൽ 24

അവസാന തീയതി: 2026 മെയ് 15 (രാത്രി 11 മണി)

ഫീസ് അടയ്ക്കാനുള്ള അവസാന തീയതി: 2026 മെയ് 16

തിരുത്തലുകൾ വരുത്താൻ (Correction Window): 2026 മെയ് 20 മുതൽ 21 വരെ.

പരീക്ഷാ തീയതി (CBE): 2026 ജൂലൈ അല്ലെങ്കിൽ ഓഗസ്റ്റ് മാസങ്ങളിൽ നടക്കും.

യോഗ്യതാ മാനദണ്ഡങ്ങൾ

വിദ്യാഭ്യാസ യോഗ്യത: ഉദ്യോഗാർത്ഥികൾ ഏതെങ്കിലും അംഗീകൃത ബോർഡിൽ നിന്നോ സർവ്വകലാശാലയിൽ നിന്നോ പ്ലസ് ടു (12th Standard) അല്ലെങ്കിൽ തത്തുല്യ പരീക്ഷ വിജയിച്ചിരിക്കണം. 2026 ഓഗസ്റ്റ് 1-ന് മുൻപ് യോഗ്യത നേടിയവരായിരിക്കണം അപേക്ഷകർ.

പ്രായപരിധി (01.08.2026 പ്രകാരം):

ഗ്രേഡ് സി: 18 മുതൽ 30 വയസ്സ് വരെ (02.08.1996 - 01.08.2008 കാലയളവിൽ ജനിച്ചവർ).

ഗ്രേഡ് ഡി: 18 മുതൽ 27 വയസ്സ് വരെ (02.08.1999 - 01.08.2008 കാലയളവിൽ ജനിച്ചവർ).

കേന്ദ്ര സർക്കാർ ചട്ടപ്രകാരം എസ്‌സി/എസ്ടി വിഭാഗക്കാർക്ക് 5 വർഷവും, ഒബിസി വിഭാഗക്കാർക്ക് 3 വർഷവും വയസ്സിളവ് ലഭിക്കും.

തിരഞ്ഞെടുപ്പ് പ്രക്രിയയും പരീക്ഷാ രീതിയും

രണ്ട് പ്രധാന ഘട്ടങ്ങളിലായാണ് തിരഞ്ഞെടുപ്പ് നടക്കുന്നത്.

കമ്പ്യൂട്ടർ അധിഷ്ഠിത പരീക്ഷ (CBE): ഇതാണ് ആദ്യ ഘട്ടം. ആകെ 200 മാർക്കിന്റെ പരീക്ഷയിൽ താഴെ പറയുന്ന മൂന്ന് വിഷയങ്ങളാണുള്ളത്:

ജനറൽ ഇന്റലിജൻസ് & റീസണിംഗ്: 50 ചോദ്യങ്ങൾ (50 മാർക്ക്)

ജനറൽ അവയർനസ്: 50 ചോദ്യങ്ങൾ (50 മാർക്ക്)

ഇംഗ്ലീഷ് ലാംഗ്വേജ് & കോംപ്രിഹെൻഷൻ: 100 ചോദ്യങ്ങൾ (100 മാർക്ക്)
പരീക്ഷാ സമയം 2 മണിക്കൂറാണ്. ഓരോ തെറ്റായ ഉത്തരത്തിനും 0.25 മാർക്ക് വീതം നെഗറ്റീവ് മാർക്ക് ഉണ്ടായിരിക്കും.

സ്റ്റെനോഗ്രാഫി സ്കിൽ ടെസ്റ്റ്: എഴുത്തുപരീക്ഷയിൽ നിശ്ചിത കട്ട് ഓഫ് മാർക്ക് നേടുന്നവരെ സ്കിൽ ടെസ്റ്റിനായി വിളിക്കും. ഇതിൽ ഒരു നിശ്ചിത വേഗതയിൽ ഡിക്റ്റേഷൻ നൽകുകയും അത് കമ്പ്യൂട്ടറിൽ ടൈപ്പ് ചെയ്യുകയുമാണ് വേണ്ടത്. ഗ്രേഡ് സി തസ്തികയിലേക്ക് മിനിറ്റിൽ 100 വാക്കുകളും ഗ്രേഡ് ഡി തസ്തികയിലേക്ക് മിനിറ്റിൽ 80 വാക്കുകളുമാണ് ടൈപ്പിംഗ് വേഗത വേണ്ടത്.

അപേക്ഷാ ഫീസും അപേക്ഷിക്കേണ്ട രീതിയും

ഉദ്യോഗാർത്ഥികൾ ssc.gov.in എന്ന പുതിയ വെബ്സൈറ്റിലൂടെയാണ് ഓൺലൈനായി അപേക്ഷിക്കേണ്ടത്. ഇതിനായി വൺ ടൈം രജിസ്ട്രേഷൻ (OTR) നിർബന്ധമാണ്. പൊതുവിഭാഗത്തിന് (General/OBC) 100 രൂപയാണ് അപേക്ഷാ ഫീസ്. എന്നാൽ സ്ത്രീകൾ, എസ്‌സി/എസ്ടി, ഭിന്നശേഷിക്കാർ (PwBD), വിമുക്തഭടന്മാർ (ESM) എന്നിവർക്ക് അപേക്ഷാ ഫീസ് നൽകേണ്ടതില്ല. യുപിഐ, നെറ്റ് ബാങ്കിംഗ്, ഡെബിറ്റ്/ക്രെഡിറ്റ് കാർഡുകൾ വഴി ഫീസ് അടയ്ക്കാം.

കേന്ദ്ര സർക്കാരിന്റെ വിവിധ മന്ത്രാലയങ്ങളിൽ മികച്ച ശമ്പളത്തോടും ആനുകൂല്യങ്ങളോടും കൂടി ജോലി ചെയ്യാൻ ആഗ്രഹിക്കുന്നവർക്ക് ഇതൊരു മികച്ച അവസരമാണ്. കൂടുതൽ വിവരങ്ങൾക്കും അപേക്ഷാ ഫോമിനും എസ്എസ്സിയുടെ വെബ്സൈറ്റ് സന്ദർശിക്കുക.