യുഎഇയില്‍ ജോലി നേടാം: നിരവധി അവസരങ്ങള്‍, എവിടെയെന്ന് അറിയാം; യോഗ്യതകളും

Updated: Thursday, June 1, 2023, 7:28 [IST]

ദുബായി: മലയാളികളുടെ ഗള്‍ഫ് കുടിയേറ്റത്തിന്റെ പ്രധാന കേന്ദ്രമാണ് യു എ ഇ. അറുപതുകളുടെ അവസാനത്തോടെ തുടങ്ങിയ യു എ ഇ കുടിയേറ്റം ഇടക്ക് ചില ഏറ്റക്കുറച്ചിലുകള്‍ ഉണ്ടായെങ്കിലും ഇന്നും ശക്തമായി തന്നെ തുടരുന്നു. ഡ്രൈവിങ്, കഫ്റ്റീരിയകള്‍, വീട്ടു ജോലിക്കാർ, മാളുകള്‍, നിർമ്മാണ മേഖല തുടങ്ങി കായികാധ്വാന ശേഷി കൂടുതലായി വേണ്ട ജോലികളിലേക്കായിരുന്നു ഇതുവരേയുള്ള കുടിയേറ്റങ്ങളില്‍ അധികവും. എന്നാല്‍ അടുത്ത കാലത്തോടെ യു എ ഇയിലെ തൊഴില്‍ രംഗം വലിയ തോതില്‍ മാറിയിരിക്കുകയാണ്.

പരമ്പരാഗത തൊഴില്‍ മേഖലകള്‍ പ്രതിസന്ധി നേരിടുമ്പോള്‍ ഏതെങ്കിലും മേഖലയില്‍ വൈദഗ്ധ്യവും ഉയർന്ന വിദ്യാഭ്യാസ യോഗ്യതയും ഉള്ളവർക്ക് നിരവധി അവസരങ്ങളാണ് യു എ ഇ അടുത്തിടെ തുറന്നിരിക്കുന്നത്. വിദ്യാഭ്യാസം, വ്യോമയാനം, ആരോഗ്യം, റിയൽ എസ്റ്റേറ്റ് തുടങ്ങിയ മേഖലകളിലെ അവസരങ്ങള്‍ രാജ്യത്ത് വലിയ തോതില്‍ ഉയർന്നിരിക്കുന്നുവെന്നാണ് റിപ്പോർട്ടുകള്‍ വ്യക്തമാക്കുന്നത്.

മേല്‍പ്പറഞ്ഞ നാല് മേഖലകളിലും ഇപ്പോള്‍ ധാരാളം റിക്രൂട്ട്മെന്റുകളാണ് യു എ ഇയില്‍ നടക്കുന്നത്. ഏതൊക്കെ സ്ഥാപനങ്ങളിലാണ് റിക്രൂട്ട്മെന്റ് നടക്കുന്നത്, തന്റെ വിദ്യാഭ്യാസ യോഗ്യത ഈ ജോലി നേടാന്‍ പര്യാപ്തമാണോ, അപേക്ഷിക്കേണ്ട എങ്ങനെ, ആനുകൂല്യങ്ങള്‍ എന്തൊക്കെ തുടങ്ങിയ കാര്യങ്ങള്‍ അറിഞ്ഞിരിക്കേണ്ടത് പ്രധാനമാണ്. അത്തരത്തില്‍ യു എ ഇയില്‍ അടുത്തിടെ റിപ്പോർട്ട് ചെയ്യപ്പെട്ട ഏതാനും ഒഴിവുകളാണ് ഇനി സൂചിപ്പിക്കാന്‍ പോവുന്നത്.

സ്കൂള്‍

യുഎഇയിലെ ഏറ്റവും വലിയ സ്‌കൂൾ ഗ്രൂപ്പായ ജെംസ് എഡ്യൂക്കേഷൻ അടുത്തിടെ അദ്ധ്യാപക-അധ്യാപക ജോലികൾക്കായി 260 തസ്തികകളിലേക്ക് റിക്രൂട്ട്മെന്റ് നടത്തുന്നുണ്ട്. ദുബായ്, അബുദാബി എന്നിവയുൾപ്പെടെ യുഎഇയിലുടനീളം ഈ അധ്യാപക, അനധ്യാപക ഒഴിവുകളുണ്ട്. കൂടാതെ, ഈജിപ്തിലും സൗദി അറേബ്യയിലും ജോലി ഒഴിവുകൾ ലഭ്യമാണ്.

'വിദ്യാലയങ്ങളില്‍ മികച്ച സേവനം നൽകുന്നുവെന്ന് ഉറപ്പാക്കാൻ ജെംസ് എഡ്യൂക്കേഷൻ ഞങ്ങളുടെ സ്റ്റാഫിന്റെ ഗുണനിലവാരം നിരന്തരം അവലോകനം ചെയ്യുന്നു. ഇതോടൊപ്പം ഞങ്ങളുടെ വിവിധ സ്‌കൂളുകളിലെയും ദുബായിലെ സ്‌കൂൾ സപ്പോർട്ട് സെന്ററിലെയും സ്റ്റാഫിംഗ് ആവശ്യങ്ങളേയും ആശ്രയിച്ചിരിക്കുന്നു. വ്യക്തിഗത നിയമനങ്ങളുടെ വിശദാംശങ്ങൾ ഞങ്ങളുടെ കരിയറിന്റെ വെബ്‌സൈറ്റ് വിഭാഗത്തിൽ ലഭ്യമാണ്.'- ജെംസ് കമ്മ്യൂണിക്കേഷൻസ് വൈസ് പ്രസിഡന്റ് ജൊനാഥൻ ബ്രാംലി പറയുന്നു.

വ്യോമയാനം

ഫ്ലൈ ദുബായ് ഈ വർഷം 1,000-ത്തിലധികം തൊഴിലവസരങ്ങൾ സൃഷ്ടിക്കുന്ന ഒരു വലിയ വിപുലീകരണ പദ്ധതി ആവിഷ്കരിച്ചുകൊണ്ടിരിക്കുകയാണ്. മിഡിൽ ഈസ്റ്റ്, ആഫ്രിക്ക, യൂറോപ്പ്, ഏഷ്യ എന്നിവിടങ്ങളിലെ 110 ലധികം ലക്ഷ്യസ്ഥാനങ്ങളിലേക്ക് സർവ്വീസ് നടത്തുന്ന എയർലൈൻ ക്യാബിൻ ക്രൂ, പൈലറ്റുമാർ, എഞ്ചിനീയർമാർ, ഗ്രൌണ്ട് സ്റ്റാഫ് തുടങ്ങി വിവിധ ഒഴിവുകളിലേക്കാണ് ഉദ്യോഗാർത്ഥികളെ ക്ഷണിച്ചിരിക്കുന്നത്.

എയർലൈനിന്റെ വെബ്‌സൈറ്റില്‍ നിന്നും ലഭ്യമാവുന്ന വിവരം അനുസരിച്ച്, ക്യാബിൻ ക്രൂവിന് 7,380 ദിർഹം രൂപ അടിസ്ഥാന ശമ്പളവുമുണ്ടായിരിക്കും. ഇതോടൊപ്പം 3,800 ദിർഹത്തിന്റെ പ്രതിമാസ മറ്റ് ആനുകൂല്യങ്ങളും ലഭിക്കും. ആവശ്യമായ ഫ്ലൈറ്റ് സമയം, ലൈസൻസുകൾ, സർട്ടിഫിക്കേഷനുകൾ എന്നിവയുള്ള യോഗ്യതയുള്ള പൈലറ്റുമാർക്ക് 31,900 ദിർഹം അടിസ്ഥാന ശമ്പളവും 11,410 ദിർഹത്തിന്റെ മറ്റ് ആനുകൂല്യവും ലഭിക്കും.

അതേസമയം, എമിറേറ്റ്‌സ് എയർലൈൻസ് ക്യാബിൻ ക്രൂ, സിന്തറ്റിക് ഫ്‌ളൈറ്റ് ഇൻസ്ട്രക്ടർ, സീനിയർ ടെക്‌നിക്കൽ പ്രൊഡക്‌റ്റ്, മെയിന്റനൻസ് ഓഫീസർമാരുടെ തസ്തികകൾ എന്നിവയ്‌ക്ക് ആകർഷകമായ നികുതി രഹിത ശമ്പളവും നിരവധി ആനുകൂല്യങ്ങളും വാഗ്ദാനം ചെയ്യുന്ന നിരവധി തൊഴിലവസരങ്ങളും ഫ്ലൈ ദുബായ് വെബ്‌സൈറ്റിൽ പോസ്റ്റ് ചെയ്തിട്ടുണ്ട്. കമ്പനി സൈറ്റ് വഴി ഒഴിവുകളിലേക്ക് അപേക്ഷിക്കാം.

ഹെല്‍ത്ത്

യുഎഇയിലെ ഹെൽത്ത് കെയർ പ്രൊഫഷണലുകളുടെ ആവശ്യവും വരും വർഷങ്ങളിൽ ഗണ്യമായ വളർച്ച കൈവരിക്കുമെന്നാണ് പ്രതീക്ഷിക്കുന്നത്. 2030 ആകുമ്പോഴേക്കും രാജ്യത്തിന് 33,000 നഴ്സുമാരും അനുബന്ധ ആരോഗ്യ വിദഗ്ധരും ആവശ്യമായി വരും. 2030ഓടെ അബുദാബിയിൽ 11,000 നഴ്‌സുമാരുടെയും 5,000 അനുബന്ധ ആരോഗ്യ വിദഗ്ധരുടെയും കുറവുണ്ടാകുമെന്നാണ് കോളിയേഴ്‌സ് ഹെൽത്ത്‌കെയർ ആന്‍ഡ് എജ്യുക്കേഷൻ ഡിവിഷന്റെ മാർക്കറ്റ് ഇന്റലിജൻസ് റിപ്പോർട്ടിൽ പറയുന്നത്.

2023 ഓടെ ദുബായിൽ 6,000 ഫിസിഷ്യൻമാരും 11,000 നഴ്‌സുമാരും ആവശ്യമായി വരും. ജനസംഖ്യാ വർധനവ്, മെഡിക്കൽ ടൂറിസത്തിന്റെ ഉയർച്ച, വിട്ടുമാറാത്ത രോഗങ്ങളുടെ വർദ്ധിച്ചുവരുന്ന കണക്ക്, പ്രായമാകുന്ന ജനസംഖ്യ, ചികിത്സാ കണ്ടുപിടിത്തത്തിലും സാങ്കേതികവിദ്യയിലും ദ്രുതഗതിയിലുള്ള മുന്നേറ്റം തുടങ്ങിയ ഘടകങ്ങളാണ് ഈ ആവശ്യങ്ങളെ പ്രധാനമായും ശക്തമാക്കുന്നത്.