യുകെ ഇത് എന്ത് ഭാവിച്ചാണ്, അടുത്ത എട്ടിന്റെ പണി;ആ വരുമാന പരിധി ഉയർത്തി..കുടിയേറ്റക്കാർ പെട്ടു

ലണ്ടൻ: ഫാമിലി വിസ സ്പോൺസർ ചെയ്യുന്നതിനുള്ള വരുമാന പരിധി വർധിപ്പിച്ച് യുകെ. 55 ശതമാനം വർധനവാണ് വരുത്തിയത്. ഇതോടെ കുടുംബാംഗത്തിന് വിസ സ്പോൺസർ ചെയ്യുന്നതിന് വരുമാന പരിധി 18,600 പൗണ്ടിൽ നിന്ന് 29,000 പൗണ്ടായി. അടുത്ത വർഷം ആദ്യം വീണ്ടും ഈ പരിധി ഉയർത്തും. 38,700 പൗണ്ടായാണ് ഉയർത്തുക. കുടിയേറ്റം കുറയ്ക്കാനുള്ള പ്രധാനമന്ത്രി ഋഷി സുനകിന്റെ പദ്ധതികളുടെ ഭാഗമായാണ് നടപടി.

യുകെയിൽ തിരഞ്ഞെടുപ്പ് നടക്കാനിരിക്കെയാണ് ഈ സുപ്രധാന തീരുമാനം കൈക്കൊണ്ടിരിക്കുന്നത്. പൊതുതിരഞ്ഞെടുപ്പിലെ ഏറ്റവും പ്രധാനരാഷ്ട്രീയ വിഷയമാണ് കുടിയേറ്റം. സുനകിന്റെ പാർട്ടിയായ കൺസർവേറ്റീവ് പാർട്ടി തിരഞ്ഞെടുപ്പിൽ കനത്ത പരാജയം രുചിച്ചേക്കുമെന്നുള്ള സർവ്വേകൾ പുറത്തുവന്നിരുന്നു. ഈ സാഹചര്യത്തിൽ കൂടിയാണ് തീരുമാനം. അനധികൃത കുടിയേറ്റങ്ങൾ കുറയ്ക്കുക, കുടിയേറന്നവർക്ക് നികുതിദായകർക്ക് ഭാരമാകുന്നില്ലെന്ന് ഉറപ്പാക്കുക തുടങ്ങിയ പദ്ധതികളുടെ ഭാഗാമായാണ് പുതിയ നിയന്ത്രണങ്ങൾ ഋഷി സുനക് സർക്കാർ അവതരിപ്പിക്കുന്നത്. കുടിയേറ്റം മൂലമുണ്ടാകുന്ന ബുദ്ധിമുട്ടുകൾ ലഘൂകരിക്കേണ്ടത് പ്രധാനമാണെന്ന് യുകെ ഇന്റീരിയർ മന്ത്രി ജെയിംസ് ക്ലവേർലി പറഞ്ഞു.

'കുടിയേറ്റം അതിരുവിടുന്നൊരു ഘട്ടത്തിലെത്തി നിൽക്കുകയാണ് രാജ്യം. ബ്രിട്ടീഷ് ജനതയ്ക്ക് സ്വീകാര്യമായ തലത്തിലേക്ക് സംഖ്യ കുറക്കുന്നതിന് എളുപ്പവഴികളോ ലളിതമായോ നിർദ്ദേശങ്ങളോ ഇല്ല', അദ്ദേഹം പറഞ്ഞു. 'നടപടി സ്വീകരിക്കുമെന്ന വാഗ്ദാനം നൽകി, അത് വളരെ പെട്ടെന്ന് തന്നെ നടപ്പാക്കി.ബ്രിട്ടീഷ് തൊഴിലാളികളെയും അവരുടെ വേതനത്തെയും സംരക്ഷിക്കാൻ അനധികൃത കുടിയേറ്റം അവസാനിപ്പിക്കാൻ ഞങ്ങൾ തീരുമാനിച്ചു, യുകെയിലേക്ക് കുടിയേറുന്നവർ ഇവിടുത്തെ നികുതി ദായകർക്ക് ഒരു ഭാരമാകാതിരിക്കാനുള്ള നടപടികൾ സ്വീകരിച്ചു. മാത്രമല്ല ഭാവിയിലേക്ക് യോജിച്ച കുടിയേറ്റ നയം ഞങ്ങൾ നടപ്പാക്കി', ക്ലവേർലി പറഞ്ഞു.

അടുത്തിടെ യുകെയിൽ വിദഗ്ദ തൊഴിലാളി വിസയ്ക്ക് അപേക്ഷിക്കുന്നതിനുള്ള ശമ്പള പരിധി സർക്കാർ ഉയർത്തിയിരുന്നു. 38,700 ആയാണ് ഈ പരിധി ഉയർത്തിയത്. അതായത് നാട്ടിലെ 40 ലക്ഷത്തോളം രൂപ. ഇതുകൂടാതെ വിദ്യാർത്ഥി വിസകളിലും സർക്കാർ നിയന്രണം ഏർപ്പെടുത്തിയിട്ടുണ്ട്. ദേശീയ ആരോഗ്യ സേവനത്തിന് (NHS) വിദേശ പൗരൻമാർക്കുള്ള സർചാർജ് 66 ശതമാനം വർധിപ്പിച്ചിരുന്നു.

അതേസമയം പുതിയ നിയന്ത്രണങ്ങളോടെ യുകെയിലേക്കുള്ള ഇന്ത്യൻ കുടിയേറ്റത്തിൽ വലിയ കുറവ് രേഖപ്പെടുത്തുമെന്നാണ് വിലയിരുത്തപ്പെടുന്നത്. നേരത്തേ കാനഡയും കുടിയേറ്റം നിയന്ത്രിക്കാനുള്ള നടപടികൾ സ്വീകരിച്ചിരുന്നു.

English summary

UK Job Opportunities: Government Raises Income Threshold for UK Family Visas, a Significant Setback - Here's Why