യുകെയില്‍ പഠിക്കാന്‍ ആഗ്രഹമുണ്ടോ: പൈസയാണ് പ്രശ്നമെങ്കില്‍ ഇതാ ലക്ഷങ്ങളുടെ സ്കോളർഷിപ്പുകള്‍

Updated: Monday, March 4, 2024, 13:05 [IST]

യുകെയിലെ വിദ്യാഭ്യാസ ചിലവുകള്‍ വളരെ അധികം വർധിച്ച് വരുന്ന കാലയളവാണ് ഇത്. ഈ സാഹചര്യത്തില്‍ ലഭ്യമാവുന്ന ഏതൊരു സ്കോളർഷിപ്പിനേയും കുറിച്ച് അറിഞ്ഞിരിക്കുക എന്നുള്ളത് ഏറ്റവും പ്രധാനപ്പെട്ട കാര്യമാണ്. വിവിധ സർവ്വകലാശാലകള്‍ ഇന്ത്യന്‍ വിദ്യാർത്ഥികള്‍ക്കായി പ്രത്യേക സ്കോളർഷിപ്പുകള്‍ നല്‍കുന്നുണ്ട്. അത്തരം ഒരു സർവ്വകലാശാലയാണ് ഈസ്റ്റ് ആംഗ്ലിയ സർവ്വകലാശാല. ഇന്ത്യൻ വിദ്യാർത്ഥികൾക്കായി വിവിധ അക്കാദമിക് പ്രോഗ്രാമുകളിലുടനീളം സർവ്വകലാശാലകള്‍ സ്കോളർഷിപ്പുകൾ നല്‍കുന്നുണ്ട്.

4000 പൗണ്ടിനും അതിനു മുകളിലും മൂല്യമുള്ള, ഈ സ്കോളർഷിപ്പുകൾ 2024-2025 അധ്യയന വർഷത്തേക്കുള്ള ബിരുദ, ബിരുദാനന്തര ബിരുദധാരികൾക്കായിട്ടാണ് നൽകുന്നത്. ഈ സ്കോളർഷിപ്പുകൾ ചിലവ് കുറച്ചുകൊണ്ട് ഇന്ത്യൻ വിദ്യാർത്ഥികൾക്ക് യുകെയിൽ ഉന്നത വിദ്യാഭ്യാസം നേടാനുള്ള സുവർണ്ണാവസരം നൽകുന്നു.

യുകെയിലെ മികച്ച 25 സർവ്വകലാശാലകളിൽ ഇടംപിടിച്ചിട്ടുള്ള സർവ്വകലാശാലയാണ് യൂണിവേഴ്സിറ്റി ഓഫ് ഈസ്റ്റ് ആംഗ്ലിയ (UEA). സ്ഥാപനം വിവിധ അക്കാദമിക് പ്രോഗ്രാമുകളിലുടനീളം ഇന്ത്യൻ വിദ്യാർത്ഥികൾക്കായി രൂപകൽപ്പന ചെയ്ത സ്കോളർഷിപ്പുകളുടെ ഒരു ഘടന അടുത്തിടെ പുറത്തിറക്കിയിട്ടുണ്ട്. ട്യൂഷൻ ഫീസ്, താമസം, ജീവിതച്ചെലവ് എന്നിവ ഉൾക്കൊള്ളുന്ന ഈ സ്കോളർഷിപ്പുകൾ 2024-2025 അധ്യയന വർഷത്തില്‍ പുതുതായി എത്തുന്നവർക്കാണ് ലഭ്യമാകുന്നത്.

സർവ്വകലാശാല നല്‍കുന്ന സ്കോളർഷിപ്പുകള്‍‌

യുഇഎ ഇന്ത്യ അവാർഡ്: 4000 പൗണ്ട് മൂല്യമുള്ള (നാല് ലക്ഷം ഇന്ത്യന്‍ രൂപ) യുഇഎ ഇന്ത്യ അവാർഡ്, സാമ്പത്തികശാസ്ത്രം, ഹ്യുമാനിറ്റീസ്, എഞ്ചിനീയറിംഗ്, രസതന്ത്രം, നിയമം തുടങ്ങിയ വിഷയങ്ങളിൽ അപേക്ഷ നല്‍കുന്ന ഇന്ത്യൻ ബിരുദാനന്തര ബിരുദ വിദ്യാർത്ഥികൾക്കാണ് ലഭ്യമാകുന്നത്. യുഇഎയുടെ എൻട്രി മാനദണ്ഡങ്ങൾ പാലിക്കുമ്പോൾ യോഗ്യതയുള്ള ഉദ്യോഗാർത്ഥികൾ സ്വയമേവ സ്കോളർഷിപ്പിനും യോഗ്യത നേടുന്നു.

യുഇഎ ഇന്ത്യ അണ്ടർ ഗ്രാജുവേറ്റ് സ്കോളർഷിപ്പ്: യുഇഎയിൽ ബിരുദാനന്തര ബിരുദം തേടുന്ന ഇന്ത്യൻ വിദ്യാർത്ഥികൾക്ക് അവരുടെ പ്രോഗ്രാമിൻ്റെ ആദ്യ വർഷത്തേക്ക് 4000 പൗണ്ട് ട്യൂഷൻ ഫീസ് കുറയ്ക്കുന്നതിൽ നിന്ന് പ്രയോജനം നേടാം.

ഗ്ലോബൽ അണ്ടർ ഗ്രാജുവേറ്റ് എക്സലൻസ് സ്കോളർഷിപ്പ്: ഈ സ്കോളർഷിപ്പ് യുഇഎ യിൽ ബിരുദ പ്രോഗ്രാമുകൾ പഠിക്കാന്‍ ആഗ്രഹിക്കുന്നവർക്ക് വലിയ ഒരു അനുഗ്രഹമാണ്. പ്രതിവർഷം 4000 പൗണ്ട് മുതല്‍ 10,000 പൗണ്ട് വരെ സ്കോളർഷിപ്പുകള്‍ ലഭിച്ചേക്കാം.

സോണി ആന്‍ഡ് ഗീതാ മേത്ത ഇന്ത്യ സ്‌കോളർഷിപ്പ്: കഴിവുള്ള ഇന്ത്യൻ എഴുത്തുകാർക്ക് അനുയോജ്യമായ ഈ സ്‌കോളർഷിപ്പ് യുഇഎയുടെ സാഹിത്യം, നാടകം, ക്രിയേറ്റീവ് റൈറ്റിംഗ് വകുപ്പിലെ പഠനങ്ങളെ പിന്തുണയ്ക്കുന്നു. 28500 പൗണ്ടാണ് ഈ സ്കോളർഷിപ്പിലൂടെ ലഭിക്കുന്നത്.

ഡേവിഡ് സെയിൻസ്ബറി ഫുൾ എംഎസ്‌സി സ്കോളർഷിപ്പ്: ഗ്ലോബൽ പ്ലാൻ്റ് ഹെൽത്തിൽ എംഎസ്‌സിക്ക് അപേക്ഷിക്കുന്ന ഉദ്യോഗാർത്ഥികൾക്കാണ് ഈ സ്കോളർഷിപ്പ് ലഭ്യമാകുക. ഈ സ്കോളർഷിപ്പ് മുഴുവൻ ട്യൂഷൻ ഫീസും (£ 31,500) നല്‍കുന്നതിന് പുറമെ മെയിൻ്റനൻസ് ഗ്രാൻ്റും നൽകുന്നു. കൂടാതെ യാത്രാ ചെലവുകൾക്കായി 4000 പൗണ്ട് അധികമായി വാഗ്ദാനം ചെയ്യുന്നു.