യൂണിയൻ ബാങ്കിൽ വൻ റിക്രൂട്ട്‌മെന്റ്; 1865 ഒഴിവുകളിലേക്ക് ഉടൻ അപേക്ഷിക്കൂ!

ബാങ്കിംഗ് മേഖലയിൽ മികച്ച തൊഴിൽ നേടാൻ ആഗ്രഹിക്കുന്നവർക്ക് സുവർണ്ണാവസരമൊരുക്കി യൂണിയൻ ബാങ്ക് ഓഫ് ഇന്ത്യ (UBI). രാജ്യത്തുടനീളമുള്ള വിവിധ ശാഖകളിലായി 1865 അപ്രന്റിസ് ഒഴിവുകളിലേക്കാണ് ബാങ്ക് അപേക്ഷ ക്ഷണിച്ചിരിക്കുന്നത്. ഒരു വർഷത്തെ പരിശീലന പരിപാടിയാണിത്. 2026 ഏപ്രിൽ 29 മുതൽ മെയ് 19 വരെ ഉദ്യോഗാർത്ഥികൾക്ക് ഓൺലൈനായി അപേക്ഷിക്കാവുന്നതാണ്.

ഒഴിവുകളുടെ വിശദാംശങ്ങൾ

ആകെ 1865 ഒഴിവുകളാണുള്ളത്. വിവിധ സംസ്ഥാനങ്ങളിലായി വ്യാപിച്ചു കിടക്കുന്ന ഈ ഒഴിവുകളിൽ കേരളത്തിൽ 39 അവസരങ്ങളുണ്ട്. തമിഴ്‌നാട്ടിൽ 95-ഉം കർണാടകയിൽ 131-ഉം ഉത്തർപ്രദേശിൽ 335-ഉം ഒഴിവുകളാണുള്ളത്. ലക്ഷദ്വീപ്, പുതുച്ചേരി തുടങ്ങിയ കേന്ദ്രഭരണ പ്രദേശങ്ങളിലും ഒഴിവുകൾ റിപ്പോർട്ട് ചെയ്തിട്ടുണ്ട്.

യോഗ്യതയും പ്രായപരിധിയും

അംഗീകൃത സർവ്വകലാശാലയിൽ നിന്നുള്ള ഏതെങ്കിലും വിഷയത്തിലുള്ള ബിരുദമാണ് അടിസ്ഥാന യോഗ്യത. എന്നാൽ ബിരുദം 2022 ഏപ്രിൽ ഒന്നിന് മുൻപ് നേടിയതാകാൻ പാടില്ല. അതായത് കഴിഞ്ഞ നാല് വർഷത്തിനുള്ളിൽ ബിരുദം പൂർത്തിയാക്കിയവർക്കാണ് മുൻഗണന. 2026 ഏപ്രിൽ ഒന്നിന് ഉദ്യോഗാർത്ഥിക്ക് 20 നും 28 നും ഇടയിൽ പ്രായമുണ്ടായിരിക്കണം. സംവരണ വിഭാഗക്കാർക്ക് (SC/ST/OBC/PwBD) സർക്കാർ മാനദണ്ഡങ്ങൾ പ്രകാരം പ്രായപരിധിയിൽ ഇളവുകൾ ലഭിക്കും.

പ്രധാനമായും ഒരു ഓൺലൈൻ പരീക്ഷയുടെ അടിസ്ഥാനത്തിലായിരിക്കും തിരഞ്ഞെടുപ്പ്. ജനറൽ/ഫിനാൻഷ്യൽ അവയർനസ്, ജനറൽ ഇംഗ്ലീഷ്, ക്വാണ്ടിറ്റേറ്റീവ് ആന്റ് റീസണിംഗ് ആപ്റ്റിറ്റ്യൂഡ്, കമ്പ്യൂട്ടർ നോളജ് എന്നിങ്ങനെ നാല് വിഭാഗങ്ങളിലായി 100 ചോദ്യങ്ങളുണ്ടാകും. പരീക്ഷയിൽ വിജയിക്കുന്നവർക്കായി ലോക്കൽ ലാംഗ്വേജ് ടെസ്റ്റ് (പ്രാദേശിക ഭാഷാ പരിശോധന) ഉണ്ടായിരിക്കും. അപേക്ഷിക്കുന്ന സംസ്ഥാനത്തെ ഭാഷ സംസാരിക്കാനും എഴുതാനും വായിക്കാനും അറിഞ്ഞിരിക്കേണ്ടത് നിർബന്ധമാണ്.

സ്റ്റൈപ്പൻഡും ഫീസും

തിരഞ്ഞെടുക്കപ്പെടുന്നവർക്ക് പ്രതിമാസം 15,000 രൂപ സ്റ്റൈപ്പൻഡായി ലഭിക്കും. അപേക്ഷാ ഫീസ് പൊതുവിഭാഗത്തിനും ഒബിസിക്കും 800 രൂപയും (ജിഎസ്ടി പുറമെ), എസ്‌സി/എസ്ടി/വനിതകൾക്ക് 600 രൂപയുമാണ്. അംഗപരിമിതർക്ക് 400 രൂപയാണ് ഫീസ്. ബാങ്കിന്റെ ഔദ്യോഗിക വെബ്‌സൈറ്റ് ആയ https://www.unionbankofindia.bank.in/en/home വഴി മെയ് 19-ന് മുൻപായി താൽപ്പര്യമുള്ളവർക്ക് അപേക്ഷ സമർപ്പിക്കാവുന്നതാണ്.